上個月老細打內線叫我入房，以為有咩大鑊嘢，點知佢一嚟就問我：「Rebecca，而家香港邊個歌星最紅呀？噚日我問個仔，佢又話自己淨係聽英文歌，唔識香港啲歌星，你有聽中文歌呀？」
心諗佢問嚟做咩呢？忽然咁關心香港樂壇？不過老細問到都要答啦，所以我就隨口講咗幾個畀佢聽：「張敬軒、MIRROR、MC、林家謙，咩事呀？你想download啲歌嚟聽呀？」
老細：「唔係，痴線，邊有時間聽歌，就嚟annual dinner吖嘛，早兩年疫情都冇搞，今年搞得好好睇睇囉！」
我：「即係點？」
老細：「請佢哋嚟表演囉！你話唱全晚好，定係唱其中一part大約半個鐘至一個鐘好呀？唱全晚就搵你頭先講嗰啲其中兩個啦，如果得一part就搵一個夠喇，搞下氣氛，最好叫佢哋幫手抽埋獎。」
我要深呼吸一下先可以反問佢：「點請呀？邊有咁多budget呀？」
老細：「咩budget呀？要錢㗎咩？」
我：「唔使錢點叫人嚟唱歌做表演嘉賓？」
老細：「我畀機會佢哋宣傳喎！」
我：「宣傳啲咩？」
老細：「嗰晚我哋有美國、加拿大、馬來西亞，同埋新加坡啲同事過嚟，咁佢哋唱歌咪多啲人識囉！」
你自己唔識咋，唔代表出面個世界唔識㗎！夠鐘點解唔食藥呀老細？
我：「佢哋應該夠晒紅，唔使宣傳㗎喇，其實唔好話一線歌手，就算你請啲冇咁大名氣嘅都應該要錢……」
老細忽然好激動：「點會呀！你知唔知一個藝人最重要係咩？係曝光率，冇曝光率邊個記得你？冇人記得你又邊會有其他job？冇其他job又邊會有收入？等我話你知吖，佢哋嚟annual dinner唱歌，呢度啲同事未必個個都係佢哋fans，例如我吖，我已經唔識佢哋啦，咁我聽完鍾意咗，可能會買佢隻碟，呢啲咪互惠互利囉！仲有其他地區飛嚟嘅同事呢！」
我：「我知我知，美國、加拿大、馬來西亞，同埋新加坡啲同事吖嘛，不如咁啦，請人免費嚟annual dinner唱歌就冇可能㗎喇，傳咗出去仲會畀人話我哋公司小家，一陣有啲咩公關災難就唔好啦，何況annual dinner就快到，我諗你搵過氣歌手都度唔到期㗎喇，不如就咁算啦！」
老細聽到公關災難4個字之後果然冷靜咗，應該係意識到比人唱嘅後果會好嚴重，跟住就改口風：「咁都係，容乜易佢哋搏宣傳又走去同記者講，我再諗諗。」
好在佢都識得驚，最後梗係冇搵張敬軒、MIRROR、MC，同埋林家謙啦！咁annual dinner表演環節單嘢又點解決呢？我哋有嘉賓呀，老細請咗佢老婆唱歌，仲有佢個仔上台玩牧童笛……
佢個仔吹牧童笛就算喇，不過不失，他只是個孩子，應該係個青山走犯老豆迫佢吹㗎啫，但係老細個老婆唱歌呢part就簡直係破地獄級別，難聽走音不特止，佢揀嘅歌仲好正，包括《忘盡心中情》、《那天再重聚》、《變幻原是永恆》、《上海灘》，同埋《婚紗背後》。
首首金曲係咪？但係我哋搞annual dinner喎，你隻隻歌都死人冧樓妻離子散咁，想點呀？仲有把走晒音嘅哭腔，坐我隔籬位個同事都細細聲講咗句：「咩事呀？咁L慘嘅……」我都想知咩事呀！搵人答下我吖！
正所謂自己唔尷尬，尷尬嘅就係人哋，最緊要老細個老婆enjoy啦，同埋老細識得知難而退，冇叫我真係走去搵張敬軒、MIRROR、MC，同埋林家謙quote價已經好好，我幾驚要搵軒公個經理人問下免費表演接唔接呀！
同事當鬧劇咁睇，老細仲以為個個都鍾意聽佢老婆唱歌，annual dinner之後夠膽死問我：「點呀？我老婆唱歌ok呀？拍得住啲歌星㗎！」
我：「直頭正啦！」
老細：「下年你早少少搵嗰個張敬軒，睇下佢想唔想嚟同我老婆合唱，你到時問下幾多錢先啦！」
同你老婆合唱一定係歌手嘅榮幸啦，幫你問埋Bruno Mars同Lady Gaga好唔好？叫佢哋自己出機票飛嚟香港，一於咁話！（完）
講開annual dinner，點可以唔提以下呢單呀😂
被同事老婆當仇人 原來File黃頁咁厚
https://hkofficedaily.com/?p=15360
對老細烚熟狗頭 對家人惡過狼狗
https://hkofficedaily.com/?p=17224