對老細烚熟狗頭 對家人惡過狼狗

星期六去咗商場買嘢,排緊隊嘅時候,見到前面有個男人大大聲喝仔:「收聲!我叫你收聲呀!」然後再喝埋個老婆:「話咗星期六唔好出嚟㗎啦!咁多人!又熱!」

把聲好熟,雖然我嘅角度只係見到個男人嘅背脊,但呢個人我好似係識,望望下見到佢嘅七三面,哦,原來係舊同事James,係喎,佢住元朗,喺呢個商場出現好合理。

佢畀完錢轉身走嘅時候見到我,即刻好殷切咁行埋嚟打招呼同吹水,問我而家撈緊乜,有咩好路數,去咗邊間公司。我話自己搞緊小生意,佢都未知我做乜,瞳孔已經即時放大,又要拎卡片,又要講實下星期出嚟食飯,最終我話呢期忙緊個project,keep住聯絡先,James臨走再千叮萬囑要搵一晚dinner,好強調要由佢請客。

James喺舊公司坐我隔籬,日子耐咗,我單憑語氣就會分到James幾時同老婆傾電話,因為佢對老婆嘅語氣係特別差,記得有次佢對住個電話咁講:「自己開google map啦!問問問,你唔識搵㗎?正一死蠢!」跟手bye bye都唔講就cut線。

當時我同James講:「其實google map成日錯㗎,有時仲會delay。」

James:「話知佢啦!唔識咪喺街問人囉!豬頭炳咁,搵唔到路自己諗辦法吖嘛。」

我測試下自己估得準唔準:「阿嫂嚟㗎?」

James:「係呀,你又知嘅。」

我:「估下咋,照計唔會有客打畀你問路嘛。」

與此同事,James枱頭電話響起,呢次真係客打嚟,James即刻變聲:「喂,點呀?梗係冇問題啦!你叫我上刀山落油鑊都幫你,你抄低我email address先,james@my……唔係唔係,James,J-A-M…唔係N,M,大M……」我feel到佢個客先係死蠢,但係James好有耐性,態度一直好好。

唔止對客,佢平時對住高層同老細都係烚熟狗頭咁,好記得有次公司annual dinner,James斟咗杯酒猛咁要敬老細,其實老細掛住同其他高層傾計都唔得閒理佢,甚至可以話係無視,James坐返埋嚟,佢擺喺枱面嘅電話彈咗個WhatsApp預覽出嚟,我見到係佢老婆send msg話「有湯喺廚房,記得飲呀。」James連電話都冇拎起,望一望句msg就:「妖!煩!」跟住又走返去老細身邊話要敬酒。

我唔鍾意呢種對老細對高層對客千依百順,但係對屋企人就態度極差同埋唔耐煩嘅人,更加唔希望自己成為呢一種男人,我明白搵食艱難,人在江湖身不由己,出嚟做嘢為五斗米折腰可能冇得揀,不過對家人嘅態度其實有得揀,所以同James嘅關係止於舊同事就足夠,見到佢對老婆同埋小朋友嘅態度,我會覺得唔舒服。

=====

🥺 呢一對夫婦嘅相處之道,完全係我最想追求嘅關係同埋方式。
《家有惡妻,Happy Hour都要簽回條》
https://hkofficedaily.com/?p=13094

error: