早幾日商台DJ梁文禮單嘢，個人感受好深，因為我喺舊公司都試過有相同遭遇，分別只係梁文禮係公眾人物，而我就只係職場小薯一名，不過自此以後我就唔敢再喺Facebook同埋其他社交媒體post任何嘢喇。
試問有邊個打工仔唔會呻做嘢辛苦、唔會私底下鬧老細衰格、鬧啲客麻煩、埋怨下公司福利，甚至係對其他同事有意見呢？講真好平常啫，如果連「私人地方」都唔可以宣洩，咁樣會唔會太抑鬱呀？
當年喺舊公司嘅多餘嘢就唔講喇，淨係某一日開始發覺經理好似識讀心術咁，有次呢個經理4:30嗌開會，然後大大聲喺個meeting裡面講：「今日咁早開會冇意見啦係咪？唔好一陣又話我臨放工先嚟call meeting呀！」
佢講呢句嘅時候係用眼神掃射晒同team所有同事，我唔係驚，而係有啲愕然，因為早兩日我先喺Facebook呻完「次次都係5:55分嗌開會，OT又冇錢，約親人食飯都唔敢太早，下次可唔可以早少少講聲呀？」
嗰陣時我心諗，可能經理都知道自己放工先嗌開會好乞人憎，所以就提早咗啦，但係久而久之我仲發覺佢講啲嘢timing好奇怪，有次佢畀嘢我做，擺低份文件時講咗句：「得一個file啫，你睇清楚呀，唔係一疊，ok？」
好似極普通嘅一句說話，但其實我前一日先喺Facebook打過一段：「當我千手觀音咩，成疊file放喺我枱面，仲叫我weekend前交，係咪愈肯做嘢嘅人就要比多啲嘢佢做，愈懶嘅人就由得佢唔使做呀？有責任心就換嚟更多workload？」
後來我發覺經理嘅「讀心術」愈嚟愈勁，只要我喺自己Facebook呻過啲咩都好，隔一排佢就會有意無意講啲語帶相關嘅說話，我都曾經檢查過自己係咪出咗地球post（人人都睇到），但明明唔係吖，我個setting係朋友先睇到㗎喎！
其實除此之外，仲有一個隔籬team嘅同事係無啦啦嬲咗我，從某一日開始，對我嘅態度180度轉變，我早排先喺Facebook講過有同事中午去supermarket買榴槤，然後擺喺公司雪櫃，搞到pantry好大陣味。
有次我喺pantry斟水，咁啱撞到呢位同事，佢冇頭冇尾喺我身後好晦氣咁講：「唔好意思喎，啲榴槤臭親你，都係一次啫，我驚放工畀人揀晒吖嘛！」
因為完全冇心理準備佢會咁講，我一時畀唔到反應，但係佢已經走咗去。
第一，唔係人人都食榴槤，你lunch買返嚟擺喺公司雪櫃唔通覺得自己冇問題？第二，點解連呢個同事都好似識得「讀心術」咁呢，我Facebook冇add佢，個post又唔係地球post，加埋之前經理啲反應，會唔會太巧合呀？
不過我已經唔使求證喇，後來經理叫咗我入房，劈頭就問我係咪好唔滿意加薪幅度……我應該唔夠24小時之前先喺Facebook呻過咋喎！
我：「點解你咁問我呢？我的確係唔滿意。」
然後經理就遞部電話畀我睇，係一幅截圖，內容係我私人Facebook裡面一個post，我當場覺得好驚震。
經理：「你有咩唔滿意同我講咪得囉，唔使周圍講公司壞話喎！」
我：「我喺自己身私人account講嘢，得朋友睇到，我唔覺係周圍唱公司喎，點解你會有呢幅圖？」
經理：「若要人不知，唔好以為私底下講就冇嘢，梗有人話返畀我知啦！」
我公司有成百人，而我嘅Facebook只係Add咗3個同事做朋友，3個都一齊喺呢度做咗超過5年，講真有返咁上下熟先會互add，如果經理有呢張截圖，肯定係其中一個出賣我啦！
從頭到尾諗返成件事更加恐怖，即係佢哋其中一個次次都cap低我呻工作嘅post，再畀返公司裡面相關嘅人睇，有冇咁大仇口呀？就算我得罪你，都唔使咁陰濕啩？
我知大家會講私人Facebook add同事係多餘，不過呢3個同事都識咗好多年喇，我又唔係個個都add，應該唔止我一個人會add幾個同事啩，所以梁文禮單嘢發生之後，我都覺得好難避免，亦都好難「捉鬼」，當時我問過呢3個同事，3個都話冇做過，其實問嚟都多餘，唔通有人會認咩？
至於有人話梁文禮係「雙面人」，得罪講句，邊個鬧公司鬧老細鬧客會當面鬧？梗有人搶答話：「我會喎！我夠膽喎！」好，咁100個人裡面有幾多個會咁做？
冇當面鬧人你可以讀解為「雙面人」，但有冇諗過係一種修養，例如榴槤單嘢咁，當時Admin已經出面叫嗰個同事下次唔好，唔通我又走埋去鬧佢兩句咩？有人出咗聲咪算囉，我都係私人account發表下感受，講下有件咁嘅事啫，真係做錯咩？
如果防人要防到一個咁嘅地步，連私人Facebook講感受都唔得，咁做人真係辛苦到一個點，以後有咩只可以收收埋埋屈住喺心，真話唔可以講，連呻下嘅權利都冇，係咪咁樣先叫正常？
延伸舊文
男同事突然出post Tag第三者向老婆道歉
https://hkofficedaily.com/?p=18784
阿頭：出席Farewell飯局嘅人唔該自己辭職
https://hkofficedaily.com/?p=17948