我入咗間公司做，呢度得9個人，已經包括我同老細，不過office就有10個位，初初入嚟做其實未覺得怪嘅，因為我未摸清呢度啲人，只係返咗兩個禮拜之後，我發現有個位係擺滿嘢，而又唔見個同事返工，第一個諗法梗係對方放大假啦，辭咗職就應該執走晒啲嘢㗎嘛！
嗰張枱有幾個相架，有相嘅，但我係新人當然唔想咁八卦走埋去睇，另外仲有杯同埋幾個日本神社嘅御守，亦都有一隻手掌咁大size嘅熊bear bear，不過就冇任何文件或者file，睇落係好整齊同埋乾淨。
後來有一次我斟完水準備行返埋位，行行下醒起自己漏低咗個電話喺水機上面，因為我嗰杯係熱茶嚟，咁啱經過嗰個「唔知邊個同事坐嘅位」，我就貪方便隨手放低杯熱茶，然後走去水機想拎返個電話，跟住就有個女同事喝我。
「喂！唔好擺喺度呀！拎返走佢！」呢位女同事真係喝出嚟，好大聲嗰隻，咁我梗係講聲唔好意思然後拎返起杯熱茶走人啦！
其實我冇唔開心，畢竟係好小事，雖然個女同事緊張咗啲，咁講到尾我都唔應該亂放嘢喺人哋張枱嘅，調返轉有人路過擺啲嘢喺我個位，我都想對方快啲拎開啦，只係佢頭先咁大聲喝出嚟有少少嚇親啫，9個人嘅office又唔係好大，其他同事都第一時間望晒過嚟。
當日轉個頭我都忘記咗件事㗎喇，點知lunch time同另外兩位同事出去買飯嘅時候，佢哋反而叫我唔好有hard feeling。
「你唔好介意喎，阿Ling同Amanda以前係最friend，所以佢今朝係緊張咗少少，佢冇心㗎！」阿Ling就係今朝喝我嘅同事，不過Amanda係邊個，我就未聽過。
我：「Amanda即係冇返工嗰位？」其實我仲想問點解佢話「以前最friend」，不過我由得呢位同事繼續講落去，唔想用自己把口問太多，始終當時未get到佢哋邊啲位會介意。
「Amanda走咗㗎喇，前年2月嘅事，阿Ling當年結婚都係搵Amanda做伴娘，所以感情好好。」
我：「走咗嘅意思係已經唔喺度？」我get到喇，係有啲唔敢相信呢個吉咗嘅位屬於一個已故同事。
「係呀，佢病呀，過咗去喇，其實我提議過你坐埋嚟，因為大家痴住會容易啲工作，但係老細想keep住Amanda個位，即係有啲好偉大嘅球員如果走咗，球隊會永遠封印佢個號碼，唔再畀其他新球員著，差唔多咁嘅道理。」
一個員工如果已經不在人世，間公司仲會封印佢個位唔畀其他人坐，坦白講我真係未聽過，但係我相信呢位員工一定貢獻好大，而且深得老細同埋其他同事歡心，所以個個人都好想用封印呢種方式去懷念故人。
後來聽返同事講，Amanda的確係好幫到手，佢一畢業就喺呢間公司做嘢，一做就做咗10年半，同老細經歷咗好多高山低谷，據聞做嘢仲好有交帶，連啲客都對Amanda讚口不絕，直至而家都會間唔中提起。
從同事嘅角度而言，佢哋話Amanda份人好友善，基本上所有嘢都唔會say no，好肯教人，好熱情亦都好鍾意笑，幫阿Ling做伴娘只係其中一件事，仲有多不勝數嘅幫人例子，所以當日Amanda離開，大家嘅心情都好難受，需要一段時間先可以平復。
我冇追問Amanda嘅病情細節，只知道佢發現有問題嘅嗰陣已經好後期，曾經停工一排去接受治療，可惜最終都係離開咗，同事仲透露老細其實好自責，成日會諗係咪工作量太重，以致Amanda冇時間檢查，所以先冇及早發現身體出問題。
有時我從自己個位望過去Amanda個位，個感覺係幾奇妙，我從未見過佢，但係呢位「舊同事」又受到其他人熱烈愛戴，據我所知呢間位於葵涌嘅工廈office係老細買落嚟，換言之除非將來賣咗，否則係唔會搬，即係話Amanda個位會永久封印。
我對新公司老細同埋同事嗰種「有情有義」係好尊重，不過有時諗諗下始終會覺得匪夷所思，相信香港甚至其他地方應該唔會有一個咁嘅office，加上我未同Amanda相處過，所以難免會有種怪怪嘅感覺。
我有同屋企人講呢件事，阿爸阿媽係咁叫我唔好做，佢哋話我班同事尊重故人係一件事，但咁樣好唔正常，驚我會見到污糟嘢……我覺得還好啦，雖然感覺係怪，so far都冇任何靈異事件嘅，除非搵到更好嘅工作，如果唔係會暫時做住先。(完）
關於office嘅「鬼故事」，以下呢兩個對我嚟講好經典，故事裡面冇出現過鬼，睇到最後仲有「驚喜」。
同一棟有紙紮廠 行過都唔敢多望
https://hkofficedaily.com/?p=21183
《Office有鬼》 陰陽眼同事叫唔好留太夜
https://hkofficedaily.com/?p=15628