[下午茶 Afternoon Tea] [打卡好去處] [灣仔] ULURU 手繪2D黑白Cafe
相信各位近來都見到唔少朋友post相曬staycation同酒店下午茶，其實想搵個地方同朋友傾下計嘆下午茶之餘又可以打卡呃like嘅地方又點止酒店丫～ 今次就同大家介紹一個一入門口就已經想瘋狂打卡嘅cafe!
呢間ULURU位於灣仔春園街，就係利東街(即係以前嘅喜帖街)附近，由灣仔站 B2 出口，行唔洗5分鐘就到，非常就腳。
成間cafe 都畫滿黑白色嘅手繪圖案，以黑白色做設計主調，門口、樓梯、走廊、餐枱紙等都係黑白色，每一個角落都係打卡位！
呢到嘅下午茶set – Uluru Afternoon Tea《彩花之里 溫室下午茶》
2人set已經包括咗兩款鹹點、八款甜點同埋兩杯飲品。
呢個Tea set 用一個三層嘅玻璃層架裝住，另外仲有一個好似盆栽咁嘅甜品，真係靚到忍唔住要即刻影番張相先。
兩款鹹點包括有泰式炸魚、吉列炸蝦
八款甜點就有：
最頂層 －馬卡龍、Truffle 朱古力
中層 － 三隻唔同味道嘅蛋糕仔 （分別係Mocha ／柚子／藍莓乳酪）
底層－ 迷你朱古力牛角飽、迷你玫瑰奶凍
而最後一款就係放係圖形玻璃入面好似盆栽咁嘅朱古力糖果溫室
呢個盆栽其實係朱古力Brownie上面舖滿朱古力餅碎再加上一朵玫瑰花乾做裝飾，一見到呢個甜品就令人聯想起小王子嘅故事。
跟set 可以揀嘅飲品入面，其中一款就係呢款Rose Tea。平時去食下午茶跟set嘅飲品外表都係普普通通，唔會有太大驚喜，但呢杯Rose Tea嘅外型真係為打卡而設， 證明呢間舖好用心設計呢個afternoon tea set，連飲品都裝飾得咁有心思！
而且呢杯嘢飲唔係淨係得個樣，味道都值得一讚，係好清新嘅玫瑰香，唔似假嘅玫瑰味，杯內亦有唔少玫瑰花瓣碎再配上Rosemary，岩晒用嚟中和食完甜品之後嘅口渴～
－－－
ULURU
灣仔春園街1-11號春暉大廈1樓
1/F, Chun Fai Building, 1-11 Spring Garden Lane, Wan Chai
下午茶供應時間： 下午2：30 －下午5：00
一位＄188 ／兩位＄338 （另收加一服務費）
圖文：C
版權所有，不得轉載
仲想睇下有咩好嘢食推介，就睇下👉呢到👈啦～