其實同Kelly拍拖之後，我真係慳咗好多錢，呢樣嘢要多謝佢。
每次想買衫，佢都會同我講：「你咪有件差唔多囉！」雖然我知屋企嗰件並唔係差唔多，但畀Kelly講下講下，又會有種「好似係喎」嘅感覺，見佢一路唱淡，搞搞下已經好冇癮，購物意欲直線下降。
想買Game、買零食、買模型、買家居用品，仲有想買其他嘢，Kelly都會畀好多理性分析（全部唱淡），例如：「係都唔好呢度買啦，貴咁多！」又或者係：「冇用㗎，呃人㗎，都唔好用！」再唔係就會講：「超唔抵囉，擺明呃你呢啲傻仔。」
我成日同呢條淡友講：「你係全球經濟發展嘅絆腳石。」
假設呢個世界多幾個Kelly，成個經濟體系好快會崩潰，零售業亦會365日處於寒冬，但係有個識得慳錢，又會喝住你唔好亂使錢嘅另一半，講到尾都係幸福嘅，總好過無王管洗腳唔抹腳吖嘛！