其實減肥呢樣嘢，唔止需要決心，仲需要時間同金錢。
呢兜「七彩仙子」係用朋友畀我嘅蔬果斷食法menu榨出嚟，內含多種菜同水果，加上要買一個識得另外隔渣嘅榨汁機，健康同減肥嘅代價真係唔細；其次係時間，唔好睇少每樣嘢洗乾淨再切件然後拎去榨呢個過程，真係有排你玩㗎！最地獄係~~~洗，話就話隔渣，但部榨汁機仲有好多窿窿罅罅沾滿生果同蔬菜渣，洗都洗到精神錯亂。
由於近年都係work from home，郁動少咗好多，坦白講呢一兩年係我人生最肥嘅階段，同以前啲相對比，我真係樣衰咗好多（以前都夠樣衰㗎喇），衣櫃裡面3分2嘅衫已經唔啱著，每次見返啲slim cut同埋中碼衫，我都想狠狠地車自己一巴。蔬果斷食法要維持兩個月，趁住呢排冇晒飯局，我同朋友講：「今次真係決心減肥喇！」朋友：「你三個月前已經咁講啦！」我好嬲，因為我同佢只不過識咗兩年左右，佢根本就唔了解我！！！其實減肥呢樣嘢，我已經講咗十幾年㗎喇……