將最重要嘅嘢擺喺最開頭，呢篇嘢可能會得罪好多香港人，亦隨時會引嚟一班企喺道德高地嘅人圍攻，但既然係個人嘅真實經歷，我都唔怕講下自己嘅心路歷程，唔啱聽可以繞路。
某日收到電話被告知有工見，我阿媽講咗以下呢番說話：「公司喺灣仔呀？好吖！樓下有架969巴士去銅鑼灣，經灣仔㗎！雖然喺天水圍有排兜，不過你第日返工早啲出門口囉，一程車直接到好方便！」人哋請我先算啦，可能interview之後冇下文，唔使日日搭969呢！
約咗4:30見工，由我屋企天水圍出去嗰陣算舒服嘅，見工嘅過程亦都好愉快，見完HR就直接見埋嗰位叫Anson嘅經理，不過佢最終都係講呢句例牌嘢作結：「我哋仲有幾個candidate要見，如果有消息會叫HR通知你。」
預咗㗎喇，希望真係有消息啦！拎部手提電話出嚟睇下，噢，原來已經5:50，不過難得出嚟灣仔，我就去咗買啲嘢先搭巴士，最終喺菲林明道又等969返屋企，有少少後悔頭先唔一早離開港島，因為到咗放工時間勁多人。
等咗5分鐘左右就見到架969駛到，但因為太多人，加上架車由銅鑼灣開嚟沿途已經有幾個站，所以我上車嗰陣基本上已經full晒，下層一眼睇晒冇位，唯有上上層搏一搏，結果見到接近車尾仲有個吉位。
行到去車尾嘅時候，有個阿叔坐咗喺尾二行嘅路口位，佢將自己嘅背囊放喺入面窗口位，即係畀一個人嘅車錢霸晒兩個位，不意外，因為呢度係香港，最多就係呢種人，Hong Kong Style！
當時架969一路行駛，其實我都幾難平衡，好不容易行到埋去巴士上層尾二嗰行，個阿叔望一望我，完全冇打算拎起佢放喺窗口位個背囊畀我坐，我唯有同佢講：「唔該！」示意佢拎起個袋畀我行入去坐。
唔識點同你形容，個阿叔嘅嘴臉係非常唔順氣同埋唔情願，不過我相信如果你係香港人，應該唔使睇我用文字描述都想像到，因為大家對呢種情況同埋嘴臉應該唔會陌生，喺呢個地方生活，或多或少都肯定遇過。
個阿叔一路用怨恨嘅眼神睥住我，一路好唔情願咁拎開個袋，嗰陣我已經chok住條氣，有冇咁自私呀？斷估佢都唔會畀兩個位嘅車費啦，更何況呢度係灣仔，架車入天水圍，佢又坐到巴士尾二嗰排，望都望到全架車full晒，大家都有畀錢，點解會覺得佢個背囊可以霸佔一個位，然後要人哋企到返天水圍呢？有得揀我都唔坐你隔籬啦！
呢程969好唔舒服，個阿叔好唔忿氣咁畀我行入去坐，同時將個背囊放喺兩個位中間，差唔多霸咗我半個座位，不過我忍，心諗呢個城市就係咁，你爆得幾多次？改變唔到呢度啲人，你就要改變自己嘅心態。
其實我真係好憎呢種人，由細到大，我嘅意識係你有好多嘢要擺，例如有個行李箱或者一大袋嘢要放路邊，又或者係好早要落車先至會坐小巴或者巴士嘅雙座位路口位，就算上述兩個point都唔中，當你坐路口位純粹個人喜好，咁都應該要讓畀人入，而唔係黑口黑面覺得要坐入去嘅人欠咗你。
結果呢個阿叔並唔係早落車，首先向唔熟悉天水圍嘅朋友解釋下，呢架車總站係天水圍市中心，我落車嘅麗湖居就係尾二嗰站，最終我落車個阿叔都未落，即係佢總站啦！你總站又唔坐入去，又唔歡迎人坐入去，咁你想點呀？
無可奈何之下，我又要同呢個自私阿叔講唔該，唔係幫自己辯護，無論係上車叫佢讓我入去嗰次，抑或係落車叫佢借一借呢次，我都係好好禮貌，絕無粗聲粗氣又或者撩交打，不過你敬人一尺，唔代表對方會敬你一丈。
個阿叔見我要落車，再睥我一次，但佢雙腳都係冇讓開，第一個動作係拎起佢個背囊，留意，呢下都仲未移開對腳，仍然係封住我出路，個阿叔第二個動作就係再將佢個背囊擺去我個位，仲要係大大力，發脾氣嗰隻，佢個態度就好似話我麻L煩，終於可以畀返個位佢擺袋，或者我讀解錯，但at least佢畀我感覺就係咁。
繼續講重點，由於我當時已經企咗起身叫佢借借，佢一路冇移開身體同對腳之餘，再「怒掟」自己個背囊落去我原本個窗口位，掟完都係未讓畀我落㗎！呢個時候我忍唔到喇，一嘢撞咗出去，佢成對腳畀我撞到轉向路邊。
呢個時候阿叔向我講咗句粗口：「DLLM！」
我嘅回應好簡單，擰轉身同佢講返句：「DLLM！」再加一腳，冇錯，我係兜腳向住佢小腿踢埋去……承接返呢篇文一開頭嗰句，企喺高地嘅人可以唔睇喇，話我「踢人就係唔啱」嘅朋友都可以唔睇落去，我認，我係一腳重轟咗落阿叔上五寸下五寸嗰度。
個阿叔即場呆咗，佢應該估唔到一個好聲好氣同佢講借借，仲有全程車畀佢個背囊「un」住都唔出聲嘅後生仔，最後會咁直接撞開佢行出嚟，再要轉身送佢一腳，跟住佢就不斷講粗口同好嬲，我行到出去上層中間嘅時候，個阿叔仲想追出嚟同我打交，不過我唔記得交代一件事……
我由小學開始一直都係踢波，除咗係校隊，都踢過香港乙組，只係本地足球員搵唔到食，我唯有放棄呢個夢想去搵其他工，介紹返，我由細到大都司職後衛，腳法唔好，不過好硬淨，踢乙組嘅時候食過幾張紅牌，我未必可以踢斷你隻腳，但一定可以踢到你－－－好・L・痛！
而作為一位有乙組經驗嘅後衛，我都覺得呢腳值85分，因為踢中阿叔嗰下好應，如果係解圍，大約可以將個波由自己小禁區清到去對方後半場，而我當日著皮鞋，究竟畀皮鞋踢中小腿痛啲，定係畀波boot踢中痛啲呢？咁就要我嘅對手先知喇。
我一路由上層嘅中間位置行到去落樓梯個位，阿叔嘅粗口都未停過，佢想追出嚟但行唔到，見佢企咗起身，但個身斜晒，最衰巴士唔係球場，呢度冇軍醫，不過放心啦，只要唔係斷腳，佢由麗湖居呢個站坐到去天水圍市中心嘅時候應該行到㗎喇，男子漢，唔係少少痛都唔捱得呀？
阿叔痛到原地爆粗無力衝出嚟「覆桌」，只可以用各式各樣嘅粗口離遠目送我離開，我邊行邊回頭向阿叔笑，然後大大聲同佢講：「做人唔好咁仆街，畀一份車錢霸兩個位，仲要唔畀人坐入去，下次我就唔踢你隻腳，直接踢落你個柒頭度，鼻屎都飛埋出嚟呀！」
巴士上層大家都坐過啦，踩落頭幾級樓梯嘅時候，你個身係會轉返向巴士上層車尾㗎嘛，最後一個眼神交流，我再向阿叔微笑告別，但一秒後我就笑唔出喇……
因為已經去到尾二個站，當時969嘅上層應該得返三分一乘客，有一個人好熟口面，佢一直睇住頭先件事，回頭望下阿叔，又望住我，呢個人喺邊度見過呢……
記起喇！係同我interview個經理，係佢呀，係Anson呀！
更嚴重嘅係，我見到Anson皺眉，皺得好明顯，佢真係望住我皺眉，乜咁窄呀？佢又住天水圍？我好憎自己頭先見完工去買嘢，如果唔係遲咗搭969，我就唔會撞到呢個阿叔，更加唔會撞到個Manager！（未完待續）
先撩者賤，最後又兵敗如山倒嘅例子，我印象中就有以下呢兩單：
笑同事飯盒得幾條菜：我想咁窮㗎？我阿媽有病呀
https://hkofficedaily.com/?p=13025
主管叫下屬做監躉 貨倉大佬撞正真大佬
https://hkofficedaily.com/?p=18413