作為一個Sales……間唔中吞下pop就天經地義㗎啦，我唔知開唔開得舖頭名呀，總之嗰日喺Delifrance食下午茶hea時間嗰陣，見到有條仔30歲咁上下，成套老西好正統，一隻手拎公事包，一隻手拎住個黃色透明file，裡面有啲文件。
條西裝友就坐我隔籬枱，原來一早已經有條女坐咗喺度等佢，又係行政look嗰隻，佢哋先嚟握手同埋互相講自己叫咩名，然後條女就開始連環發炮問問題，我下意識望一望，發覺條仔又緊張又唔自然，有一刻諗過使唔使轉枱等佢輕鬆啲interview，可惜當時餐廳已經好full。
女：「可唔可以介紹下你自己？」
男：「可以呀，你都睇過我啲資料啦，5年前加拿大返嚟，跟住入咗紙品公司做，其實份工都ok嘅，學到好多嘢，所以一做就做咗4年，上年先轉去而家呢間公司。」
女：「你頭先話學到嘢又ok，咁點解最後要轉工呀？我見你喺紙品公司嘅月薪都唔少喎！」
男：「哦，因為我Looking for new challenges，紙品公司嗰度唔係唔好，不過佢哋個架構係論資排輩，如果我上面啲人唔走或者退休，咁應該好難升職。」
女：「明白，咁你又可唔可以講下而家呢份工？我見你直情係轉埋行喎！」
男：「係呀，而家呢間公司係做軟件設計，有冇聽過Salesforce？類似呢一啲服務，仲可以幫客人度身訂造，例如一個請假系統，一樣會提供售後training，不過我主要做銷售嗰部分。」
女：「Salesforce我梗係聽過啦，但我就未聽過你呢間公司？係咪好細間？」
男：「比起Salesforce當然細好多啦，不過都有40幾人㗎！」
條女開始好不屑：「咁即係細公司啦！你講下自己有咩優點同缺點？」
男：「我嘅優點係好努力做嘢，缺點可能就係太上心，始終呢個年紀都係要搏。」
Sorry，作為旁觀者，我覺得呢個答案太公式，太over，又演譯得太空泛喇，肯定係google完啲model answer嚟答啦！
女：「優點同缺點係同一樣嘢喎，但係你公司咁細，搏嚟都好似冇用，我見你而家呢份工底薪係$22,000，佣金方面點計？或者咁講，你最高嗰個月幾多，最低又試過幾多？」
男：「最高試過3萬幾，最低好難衡量，因為有時個客遲咗找數會計落下個月……」
女：「咁即係有試過淨係出底薪$22,000啦，咁你啲資料又話current salary有$33,000？其實呢方面你要誠實啲喎，一睇糧單就知㗎喇！」
條女都幾西，質疑完人哋嗰間係細公司，又質疑埋人工，搵食真係艱難，好想嗱嗱聲飲完杯咖啡就出去見多兩個客，睇到呢啲咁西嘅HR，真係唔想再出去見工。
男嘅明顯窒晒Q：「如果你需要睇糧單，我都可以show畀你睇嘅……」
女：「唔使住，頭先未用英文介紹自己，你而家用英文講下吖！想睇下你嘅會話程度。」
條仔即刻轉講英文，然後我另一邊張枱有pair學生都望住，冇計啦，間餐廳唔算太嘈，忽然有人一輪咀講英文的確會引嚟其他人八卦，何況佢兩個嘅對話都頗大聲。
個男仔都留意到我同埋隔籬枱嗰pair學生望，所以有啲唔自然，唉，為人為到底，我望住嗰pair學生打咗個眼色，再搖一搖頭，示意佢哋唔好望喇，等人哋順順利利見埋份工啦，吖！而家啲學生又幾醒目喎，即刻唔望再低頭飲嘢，乖！
女：「你啲英文好港式，你唔係加拿大畢業咩？啲口音都係唔好聽。」
嘩！呢條女再西啲吖嘛！然後條仔聽完之後又冇嘢喎，淨係以笑遮醜咁，見工啫，唔使咁卑躬屈膝嘅！
女：「咁我都開門見山問下喇，你有冇話黃定藍？可唔可以畀一畀你啲social media我睇？Facebook同IG嗰啲，或者你add我吖！」
條女一路講一路拎部手提電話出嚟，似乎準備好要check個男仔嘅私人account平時post啲咩，我真係睇唔過眼，一早聽過而家好多公司會檢查求職者嘅社交媒體，但無論黃又好藍又好，個人認為咁樣做都係嚴重侵犯私隱。
男：「我冇玩Facebook，IG就有account嘅，但睇人哋啲嘢多。」
女：「你個IG係咪假㗎？淨係睇嘢？一個post都冇？」
呢個moment我要爆喇！個求職者唔敢出聲吖嘛！等阿叔幫你出呢啖氣！
我喺旁邊用一個肯定佢哋聽到嘅聲浪講咗句：「搞L錯呀！見工要睇人哋Facebook IG？請咗都唔係老奉要add你啦！山水有相逢，又踩人公司又踩人哋份糧，其實呢，你做HR都係打份工㗎咋，你都有見工嘅一日，將心彼己啦！」
講完之後全場靜晒……誇張咗，係餐廳裡面我嗰個area靜晒啫，我見到另一邊嗰pair學生都向我投以欣賞目光，得！收到晒！路見不平睇唔過眼啫！求職者唔敢出聲咪我做醜人囉！
條女聽完望過嚟，跟住好冷靜咁同返條仔講：「我趕住返公司，再聯絡。」
可能我講嘅說話令條仔冇咗份工，sorry囉！但係你真係想入呢間公司咩？畀人踩完仲要攤晒自己嘅社交媒體出嚟，咁嘅工有咩前途呀請問？
睇住條女走咗出門口，又見到條仔尷尷尬尬咁，我都係咁易同佢講兩句：「喂，唔好意思呀兄弟，應該搞到你冇咗份工，不過你諗清楚啦，呢啲工做到都喊三聲，個HR咁唔識尊重人，間公司好得去邊吖！」
條仔再笑得比頭先尷尬：「唔緊要呀，我唔係見工，我都唔想同佢講，不過走咗去又好似冇禮貌，而家咁樣仲好啦！」
我：「唔係見工？見客呀？」乜9呀，佢唔係interview咩！
條仔嘅尷尬笑容再升一級：「Speed dating呀，人哋幫我約……」
我：「即係相睇嗰啲呀？而家相睇問呢啲㗎咩？我以為個女仔係HR咋，我都覺得奇怪，個女仔好後生咁。」眼尾見到側邊嗰pair學生笑到震晒……
條仔：「嗰啲基本資料係Speed dating公司畀佢㗎，佢唔係HR，哈哈，我都走先喇……」
Oh No，原來我唔係搞到佢冇咗份工，而係搞到佢冇咗條女，甚至係冇咗個未來老婆，我人生未試過相睇呀，乜相睇咁恐怖㗎咩？又要講學歷，又要講人工，好似睇條件交易咁喎！不過算啦，條仔話冇所謂雖然未必真心，但都係嗰句，態度衰成咁，工又好女又好，執到都係喊三聲㗎喇！想同條仔講聲唔好意思，忘記咗佢話自己冇Facebook，唔緊要，都祝佢早日搵到另一半啦！(完）
哦！原來係愛情故事，咁睇呢啲吖嘛！
男同事騎呢溝女 柒到出鴻圖道
https://hkofficedaily.com/?p=16418
秘書似瘦版陳瀅 男友背景仲好勁
https://hkofficedaily.com/?p=18348
唔覺意錫咗一啖 上司約我情人節去街
https://hkofficedaily.com/?p=15422