貨倉個大佬泉哥因為老婆有病，所以較早前辭職，呢個位有啲難請，好多時要落手落腳同工人一齊搬，仲要搞好多文件嘢，真係要文又得武又得。
我見咗好幾個candidate，最後淨返Dennis同Ray係ok，好可惜Ray有另一個offer而自動棄權，所以Dennis亦順理成章受聘成為新嘅貨倉主管，佢哋班工人通常叫呢個position做大佬，其實我哋office工都一樣啦，對住啲department head都會嗌阿哥或者阿姐。
Dennis有倉經驗，英文都ok，平時睇document完全冇問題，只不過Dennis對住貨倉工人有啲串，好似覺得自己高高在上咁，我間唔中先去倉嗰邊都親眼見過Dennis鬧人，作為大佬鬧班細唔係唔得，問題係你返咗一個月工唔夠，人際關係好重要㗎，之前個貨倉大佬泉哥雖然英文麻麻，但同班伙記就打成一片，個個都肯為佢賣命，出嚟做嘢唔通周圍樹敵咩！
其他office同事覺得Dennis冇乜嘢，咁梗係，佢對住我都好恭敬㗎，因為我請佢吖嘛，只要係寫字樓呢邊嘅同事，Dennis就會客客氣氣，不過對住倉嗰班下屬，佢就會擺出另一副嘴臉。
終於有一日Dennis搞出個大頭佛，條友仔打去我直線，話佢翻睇貨倉同事啲入職資料（上手泉哥有一set留底，for工人如果唔小心整親，可以搵對方嘅聯絡人，因為倉嗰邊曾經有員工做嘢時受傷。）Dennis想根據佢哋嘅程度同經驗分配工作，然後發現其中一個下屬阿權有案底。
Dennis：「請問阿權衰咩？點解有案底？」
我：「唔知喎，阿權入職嗰陣我都未入嚟做，更何況呢啲係佢私隱，當年就算check都要佢自己簽名同意啦，何況隔咗咁耐，阿權喺度做咗5年喇，不嬲紀錄良好。」
Dennis：「如果佢衰偷嘢咁點呀？我都要衡量邊啲位適合佢做，可能掂到錢或者好敏感就唔畀佢經手㗎喇。」
我：「Dennis哥，我都跟佢哋叫你做大佬啦！你哋有幾何要掂錢呀？公司又唔係做網購貨到付款。」
如果Dennis同班下屬感情好，直接問阿權都得啦，唔使chok我喇，而且人誰無過，我哋咁大間公司都畀機會員工重投新生活，你都係嚟咗一陣啫，講年資講performance阿權比你更有保證，挖返人哋啲陳年舊事同案底出嚟做咩啫！
又過多兩日，貨倉另一個同事打畀我，聲線好緊張。
「人事部姐姐，大佬同阿權打交喎，我哋勸唔掂呀，你要唔要落嚟睇睇？」乜咁大鑊呀！你哋成班麻甩佬都勸唔掂兩個男人，唔通期望我一個女人仔嚟到搞得掂？你當我Captain Nancy呀？
求其叫咗個男同事陪我行落去倉，邊係打交啫？係阿權扯高Dennis個polo領，推咗佢埋牆撳實之嘛，打交係指兩個人拳來腳往，而家一睇都知道Dennis唔夠打啦，兩個人身型已經差好遠，阿權好大隻㗎，讓單手都夠贏。
我同男同事落到去嘅時候，相信佢兩個已經僵持到尾聲，淨係見到阿權好兇咁講：「警告你！再叫多聲監躉我就唔客氣！」然後阿權望一望我同埋個男同事就放手。
睇得出Dennis唔忿氣又唔夠膽再惹阿權，成個裙腳仔咁行埋嚟向我投訴：「你睇下佢吖。」睇睇睇睇乜鬼吖，睇到你成隻鵪鶉咁啦！
後來我問返其他貨倉同事，原本Dennis係咁針對阿權，仲喺其他人面前稱呼阿權做監躉，真係要叫你做大佬🤦🏻♂️呢度個個都做咗好多年，好似兄弟一樣㗎，梗係會同返阿權講啦，結果就出現頭先嗰一幕。
聽貨倉同事話，Dennis入職後未試過好聲好氣，平時都係喝班下屬做嘢，自己啱啱嚟做乜都未熟又從來唔幫手，態度超串，同以前個泉哥差好遠。
故事發展落去係阿權辭職，唔使問點解啦，畀個大佬叫監躉監躉真係好難長做，何況仲郁埋手。阿權激到寧願賠錢都要即走，早有準備成疊銀紙拎出嚟畀我，呢單嘢要驚動會計，會計就走去驚動老細，高潮嚟喇，老細知道後衝去貨倉Diu到Dennis反艇，講真句，我從未見過老細行去貨倉，真係第一次，可想而知佢係幾咁嬲，老細鬧埋我點解請Dennis咁嘅人，我都唔想㗎，當日另一個candidate阿Ray高班好多，不過人哋有其他offer先揀Dennis咋！
Dennis冇得留低，但阿權都唔肯再返嚟做，我初時以為老細係因為出於正氣，唔鍾意Dennis歧視阿權，怕影響公司形象先至咁嬲，後來聽返另一個老臣子講，我哋老細以前都有少少江湖背景，阿權係佢啲兄弟嘅兄弟，出返嚟就被老細安排喺公司做倉。（補充少少，呢單嘢我同自己朋友講過，朋友唔係做HR，所以奇怪點解老細介紹仲要填入職form，原因係正式公司始終要有員工record，其中一part問candidate有冇案底，阿權都有照剔，相信係佢唔想講大話或者skip，加上入硬嚟做，所以如實剔都唔驚。）
阿權喺貨倉好受歡迎，佢說話唔多，真係做實事，其他同事搞唔掂或者射波嗰陣，阿權會第一時間衝出嚟幫拖，可能呢啲就係江湖中人所講嘅義氣啩，佢將義氣帶咗落工作嘅地方囉！我仲收到風，阿權當年係大佬，因為幫個門生出頭所以衰傷人，返出嚟之後洗心革面，唔怪得阿權成個款頭都係打仔格咁啦！
下屬畀面先會叫Dennis呢個主管做大佬，原來阿權先係真正嘅大佬（雖然已經係過去式）。我唔知阿權之前傷人案嘅詳情，不過佢喺度工作真係盡心盡力，冇製造過任何麻煩，貨倉同事仲對佢評價好高，Dennis叫人監躉的確先撩者賤，老細炒咗佢之後，貨倉同事都話大快人心，只可惜阿權點都唔肯返嚟做，而家我又要請人喇。
投稿讀者：Nancy