阿叔單嘢太勞氣，加上畀interviewer見到整件事又實在太挫敗，我真係冇辦法唔向人傾訴，首先梗係返屋企同阿爸阿媽講啦，點知兩老完全唔撐我，佢哋話：「總之你踢人就唔啱！你出聲叫人讓咪得囉，好聲好氣點會唔畀你出呀！」
阿爸仲要嚇我：「而家份工凍過水啦！我冇嘢驚呀，驚人哋報警咋，你呢啲係咪蓄意傷害他人身體？你見完工，嗰個經理又見到你踢人，佢有晒你資料，一報警你就玩完，等陣隨時有差佬上門添呀！你個衰仔！」
另外我同咗一個朋友講，佢話我踢得好，又同時擔心個manager有我資料會追究，仲學人分析：「嗱，佢兩個都總站落，隨時係街坊，可能係識嘅，你份CV有晒電話地址……唔係喎，小心啲喎，報警事小，我驚佢哋尋仇，一陣畀人斬都唔知咩事。」
聽完佢哋講，我由好火變成好驚，雖然對於踢阿叔一腳絕不後悔，但係個manager有我聯絡方式係事實，我點知落車之後佢同個阿叔有冇交流呀？結果我成晚都瞓得唔好。
第二日朝早我畀個電話嘈醒，個number好陌生，雖然我仲係朦朦朧朧嘅狀態，但個心仍然好虛。
我：「喂，邊位？」
「Hello，我係Anson，想約你今日上嚟公司，4:30 ok？」
我：「喔……即係……second in？」
「咁你4:30 ok？」咦，做咩避而不答嘅？你唔係call定差佬到時捉我呀？但係我縮又縮得幾耐呢？你有心搵人拉我都係走唔甩，咁都要上去㗎啦！
4:30 準時上到去，Anson喺房裡面第一句就同我講：「噚日見到你踢個阿叔喎！」佢有少少笑容，唔多，加上當日我只係第二次見Anson，所以完全摸唔到佢咁樣笑係友善吖，抑或係代表：「你仆街喇，我睇到你踢人！」
我：「係呀，畀你見到，係個阿叔唔讓位在先，一個人霸兩個位，上車嗰陣叫佢讓畀我入已經忍咗一次，好似欠咗佢咁，我有畀錢㗎！點解你個袋可以霸一個位，我就唔可以坐？落車又係咁，發脾氣掟袋都唔讓我出……」
Anson：「唔係要話你，我係想讚你啫，大家都搭969，你估我冇遇過呢啲人咩？不過我冇你咁有guts，通常我會唔出聲。」
我：「其實我都唔係好你好多，喺公開場合咁樣嘈人，個心會唔舒服，我心理質素差，試過有次買外賣，香港真係好得意，排隊一定要條jer痴住前面個人嘅屎忽先叫排隊，我特登有啲距離預留一個身位啫，咁就有個女人攝咗入嚟，我話佢打尖啦，個女人仲話唔知我排緊隊，然後我反問一句係咪我錯，個女人就笠水話唔係唔係，仲講唔好意思，跟住我個心就好唔舒服喇！」
Anson：「喂！我又係喎，我寧願你同我鬥屌！」聽到Anson講粗口，我就知可以講得再放啲。
我：「係呀！所以噚日踢個阿叔真係好爽，佢完全唔知自己有問題吖嘛！咁咪一腳踢鳩佢囉！踢完都唔知衰，咁我就放心喇，我知自己冇踢錯人，仲要佢追唔到我，嘩！幾心涼呀！」
Anson：「佢梗係追唔到你啦，我見佢落車嗰陣隻腳彎晒，呢啲撚屌一定要畀個教訓佢呀，成個天水圍都多謝你呀！邀請你加入我同朋友個group，專分享香港啲閪嘢！」
畀Anson加咗入去之後，我見到佢個group名好正：「你個group叫《香港盛產仆街》呀？」
Anson：「係呀，冇改錯名啦，每個地方都有自己盛產嘅嘢，香港冇嘢多，仆街最多，有冇試過搭地鐵或者出電梯，梗有條仆街企正正喺中間，DLLM，你唔行開我點出？我唔出你點入？」
我：「有冇試過？呢啲仆街日日遇到㗎喎！搭地鐵成個人挨住碌柱，你完全扶唔到㗎！有冇遇過？」
Anson：「點會未遇過呀？頭先你話排隊吖嘛，有次我銀行排隊feel到耳仔好痕，你老味原來有個男人痴住我後面企，差啲錫咗佢一啖，真係好似你講嗰種條jer貼住屎忽先叫排隊！」
我：「明呀！咁你有冇試過搭電梯，最後入嚟條撚樣唔撳閂門掣？佢真係由鳩全部人等時間過自動閂門㗎喎！」
Anson：「多的是！有冇試過出入商場要推門，有啲陷家鏟喺另一邊早過你行埋度門，不過就唔推，等你推！」
我：「等你推都不特止，你推完佢要過先，好似係為佢服務咁，仲有啲係你推完度門呢，佢一支箭標前攝埋嚟，女人都算啦，好多麻甩佬係咁，仆你個街度門柄有劇毒咩，係咪推一推門都懶要攞著數呀！」
Anson：「你講開攞著數，我早兩日出街搭巴士，一家三口分開三個雙座位坐，全部坐出面，即係3個人坐6個位，一有人想入去就好唔耐煩，CLS，你哋一家三口都立心不良啦！喂，我影咗張相好代表香港，唔係咩星光大道金紫荊，呢張相你一睇就知道身處香港。」
然後Anson遞咗佢部手提電話過嚟，我一睇，即刻會心微笑，真係好Hong Kong Style～
嗰張相係Anson喺一架巴士上面影，佢頭站上車由天水圍去銅鑼灣，前面五排兩座位全部有人坐單邊，係路口嗰邊，而Anson當日要去總站落車，呢5個坐單邊嘅人只有一個唔係尾站落車，中途有人想坐入去窗口位，外面嘅人一係不情不願，一係「㗩㗩聲」，一係睥柒你，既然你咁唔想讓，又唔想煩，加上頭站上尾站落，點解唔直接坐入去呢？其實有啲小巴都會貼張紙同人講盡量坐入去方便乘客出入上落，特別係遲落車嘅人士。
我：「其實香港呢個地方係咪有病？」
Anson：「病入膏肓！唔止咁少㗎！我哋頭先都係講交通工具咋，仲有好鍾意比較，例如邊個靚啲，邊個唱歌好聽啲，總之一定要分高低，分輸贏，唔可以接受百花齊放，所有嘢都係二元對立。」
我：「我有個朋友，佢做寬頻裝線，個背囊裝住好多架生好漲好重，有次同佢去間餐廳食飯，因為左右都坐滿人，接近手踭撞手踭嗰隻，想問個侍應拎張凳擺袋，sorry，係冇㗎！」
Anson：「但你呢啲嘢唔可以公開同人講，因為你會被標籤為西客，會有人同你講香港租貴地方細，要體諒，但我又會諗，得你開餐廳辛苦？我做嘢唔辛苦？我食飯想舒舒服服都有錯？邊個體諒我？」
我：「真，你呢幾句說話絕對唔講得，一講就畀人鬧。」
Anson：「所以我同朋友先有個《香港盛產仆街》嘅group，好似你噚日踢鳩個阿叔咁，唔係個個會理解，我喺個群組同班friend講，佢哋全部撐你！」
我：「多謝！不過講開又講，我今次係唔係second in？你會唔會因為呢件事……」叫我上嚟，又全程冇講interview嘅事，即係點……
Anson：「我班friend叫我一定要請你，仲話要拉你入我哋個《香港盛產仆街》group，恭喜你，第日可以一齊搭969！」
嘩！大佬，你早講吖，我驚咗成晚呀！結果我同Anson傾到忘晒形，一眨眼已經6:30，我問佢係咪返天水圍，想唔想一齊搭969，佢反問我：「呢個鐘數……驚唔驚撞返噚日個阿叔？」🤣🤣🤣
我順利入咗呢間公司做，搵到個志同道合嘅人一齊工作，絕對係開心嘅事，不過Anson透露自己今年內會移民加拿大，佢老婆已經過咗去搞買屋啲嘢，Anson仲話，預期香港之後嘅日子會更難捱，愈嚟愈多人從國內嚟香港，無論係居住嘅地方、社區資源、工作機會等等，都會出現惡性循環同埋緊張嘅局面。
Anson講嘅嘢我都知，以上仲未計其他民生嘢，例如引入內地醫生嚟香港執業，無論你係咩政治立場都好，連專業名稱同藥名都有分別，你真係有信心睇佢？警員入職條件下調，嚟緊直頭唔使喺香港居住七年或以上，你……真係覺得冇問題？
Sorry，本身講見工，講下自己喺969踢阿叔，點知愈講愈遠，但係諗真啲，以上問題其實這麼遠，那麼近，當大家喺呢個城市生活得咁唔舒服，怨氣只會愈嚟愈重，到時周街鬧交打交將會成為日常生活一部分。
唔係每個人想離開香港，都有能力買張機票話走就走，有啲人即使經濟能力許可，亦有家庭方面嘅顧慮，雖然知道Anson好快會走，但我仍然衷心祝福佢一切順利，唯有珍惜當下可以一齊共事嘅時光啦！
我唔擔心喺969撞返嗰個阿叔，我最擔心其實係遇到更多自私嘅仆街，不過喺香港呢個地方，似乎真係無可避免。(完）
未睇上集嘅朋友可以睇呢度
《我在969巴士踢了阿叔一腳》
上集 一個人霸兩個位仲要唔讓人出入
https://hkofficedaily.com/?p=23558