我有三間防盜器材公司，規模唔算好大㗎啫，行頭話窄唔窄，話闊唔闊，算係專門啦，因為忠於某一個範疇，生意嘅嘢做生不如做熟吖嘛。
咁呢，有個員工某日就向我請假（我通常坐鎮喺A公司），而佢請假當日嘅下午我就收到個電話，係名下嘅B公司同事打嚟，內容係講A公司員工嚟咗B公司interview，正唔正呀？
「因為新嚟個HR阿珊做咗冇耐，佢知你有幾間公司，不過唔知你另外啲公司叫咩名，又見個求職者有相關工作經驗，所以就嗌咗上嚟見。」
我：「咁搞笑？然後呢？」
「阿珊見完話好適合，叩房門問我要唔要即刻in埋，我拎張CV一睇，妖！咪一__樣！做緊你另一間公司既。」
好難怪阿珊同埋錯send CV嗰位員工，始終求職者去interview之前唔會查冊，呢啲細公司嘅網頁亦唔會刊登我個名。
我開三間公司係好低調，主要方便工作同埋議價，好難具體解釋畀大家聽，呢個係商業上嘅決定，係策略問題，簡單啲講，好多時啲客經電郵或者網頁即時對話問嘢，其實A公司係我答，B公司同C公司都係我答，客人當然唔知啦！三間公司各自有啲貨平啲，有啲貨貴啲，咁樣答大家會唔會更易明白？
呢種方式唔係我自創，你哋知唔知旺角波鞋街好多舖頭雖然唔同名，不過都係同一個老闆㗎？例如一間叫發財，一間叫好運，睇落風馬牛不相及，但係老闆同個倉都係一樣㗎！據我所知，好多藥房都有呢種情況。
老闆背後有幾間公司又選擇咁低調，除咗為生意，有時仲會驚樹倒猢猻散，如果其中一間公司大吉利是出咗事，唔使火燒連環船全部一齊收檔吖嘛，咁當然啦，有啲大集團就隱藏唔到嘅，例如富臨改頭換面開好多甜品店或者西式餐廳，個名完全冇關係，一樣有好多人查到，我哋呢啲係公司仔做小生意，出發點當然同富臨唔同啦，起碼我唔係出於政治方面嘅考慮，純粹風險管理。
過咗一排，我嘅C公司又收到呢位員工嘅CV🤦🏻♂️阿仔，其實你老細我唔係得一間公司㗎……但今次係嗰邊個partner見到即刻同我講，所以冇約到interview，幾貼心吖，幫我員工慳咗一日假。
趁住最近要做Appraisal，我開心見誠咁問呢位同事有冇咩不滿同唔開心，初初佢唔肯講，後來我好有耐性咁傾，終於迫到佢講真話，原來人工佢係冇問題嘅，主要係唔鍾意個直屬上司，雙方喺工作方面有好多分歧，呢位員工仲坦白承認最近搵緊工。
我：「其實我唔想你走，因為你好有potential，新人嚟講好突出，作為老細一定想留住人才。」
「多謝你先，知你畀好多機會，我自己都有心喺呢行發展，不過同阿Ben唔夾。」阿Ben係佢直屬上司。
我：「明白，阿Ben性急，老細角度我需要呢種員工，佢幫我好多，但站喺同事角度，阿Ben真係會令人抖唔到氣，所以立場唔同，作用同感受都有唔同，有冇興趣去另一間防盜器材公司做？」
「有呀，我之前send CV出去都係搵同一行，唔想浪費學到嘅嘢。」
我：「會唔會考慮去XX（B公司）？」
「呀……我有in過，不過冇回音。」
我：「嗰間公司我有股份，如果你真係唔想留喺度對住阿Ben，不如去嗰邊試下啦，最緊要都係繼續幫我啫！」
「你有股份？」
我：「其實你老細我唔係得一間公司㗎，所以你去咗interview我都知。」
呢位員工雖然好驚訝同尷尬，不過最終都接受咗我嘅offer，係呀，A公司B公司同C公司都係我㗎，所以咪一__樣，佢做得開心，我又賺到錢就足夠啦！
基本上做得耐嘅員工都知道我三間公司嘅事，絕對唔係有心隱瞞，只係適當時候先講，或者佢哋適當時候自然會知，大家將來搵工都可以睇清楚啲，老細好古惑㗎，可能你兜兜轉轉搵過份工，之後個結果都係：「妖！咪一__樣！」