我間公司成立咗啱啱好10年，創業初期除咗自己之外，仲請咗3個員工，托賴有班熟客撐住，咁多年嚟都算順利，而家規模已經有20人。
開業以嚟公司都係全男班，其實唔係刻意，只係初頭咁啱都係請到男仔，同埋我公司喺一座舊式工廈租咗兩個相連單位，電梯仲係手動拉閘嗰種，連我老婆都好嫌棄，所以佢好少上嚟。
呢度一個單位做office，另一邊做貨倉，倉嘅同事比較豪邁，始終要搬搬抬抬又熱又辛苦，佢哋大部分時間都係赤裸上身行嚟行去，無所謂啦，全男班冇咩好介意。
招聘嗰陣當然收過女仔CV，只係叫咗佢哋上嚟interview最後no show，又試過有個女candidate本來符合要求，但我打去叫佢返工嘅時候，對方喺電話度拒絕我，問佢係咪人工唔滿意啦，個女仔話interview嗰陣聽到出面班男同事大大聲講粗口，覺得我間公司唔適合佢喎，唉！
因為以上嘅原因，加上呢度流失率唔高，所以公司不知不覺間竟然產生咗一個紀錄，就係開業10年從未請過女員工，唔知仲以為我呢個老闆性別歧視。
早排公司要請多個會計，一如以往咁樣出job ad，可能係工種嘅緣故，今次好多CV都係女仔。
我：「喂喂喂，你班撚樣靜少少先！一陣有人上嚟見工，唔好再咁撚大聲講粗口呀！」
阿權：「痴鳩線！唔撚想聽到粗口就返學校讀書啦！出咩嚟做嘢呀？」
Carson：「戇鳩鳩，使唔使知乎者也咁撚樣講嘢呀！」
Kelvin：「返學讀書大把粗口聽啦，而家啲學生壞撚過我同你呀！」
我：「嘩，我講一句，你哋屌十句，都話之前有個女仔上嚟見工，本身請佢㗎！人哋話你班老粗好撚爛口呀！」
阿恆：「屌！多撚鳩柒餘！你出街唔會聽到粗口呀？咪撚出街囉笨撚柒柒！」
你睇阿恆，本身「多餘」都係兩個字講完，佢係要演繹為「多撚鳩柒餘」，另外講「笨柒」都夠啦，係要加粒粗口再疊字變成「笨撚柒柒」，呢班老粗邊撳得住吖。
Office嗰班已經係咁，貨倉嗰度更加不得了，佢哋嘅阿頭雄哥平時係咁樣打招呼嘅：「喂撚樣，仲未死咩你？食咗早餐未？」我從來未聽過雄哥講「早晨」兩個字，佢基本上係用「撚樣」、「仆街」、「撚屌」、「木咀」、「傻hi」、「柒頭皮」、「死磨碌」、「柒軲轆」去取代晒全部開場白同歡迎語，真係冇句好嘢，佢班貨倉手足都係一樣，就算新年都係咁樣拜年：「恭喜發財呀屌你！開工利是呢你老味！」
係咪好正呀？
老實講，份合約又真係冇講明唔畀講粗口嘅，何況我哋成班麻甩佬咁樣講嘢同相處都已經好多年，要佢哋改就冇可能㗎喇，見工嘅人或者新同事覺得唔適合都冇辦法，同埋近朱者赤，近墨者黑呢句好啱，呢度都有外型比較斯文嘅男同事，例如Derek，佢啱啱嚟做嗰陣係唔講粗口，久而久之咪又係句句都有啲撚撚屌屌鳩鳩柒柒，作為老細，我有時都覺得對唔住Derek嘅父母，sorry，係我害咗你哋個仔。
有一日下晝，office突然靜晒，Carson敲門入房同我講：「老細，有個女仔上嚟見工。」
我：「哦，咁填完form你叫佢入嚟吖。」
之後大約15分鐘，我間office好寂靜，因為平時太嘈喇，當時仲要係tea time，照道理班友仔應該起晒哄叫tea，同埋你身處喺殺聲震天嘅地方太耐，突然環境變得咁靜係好怪，甚至會因為唔適應而出現耳鳴。
叩叩叩，嗰個女仔填完form入嚟喇，有啲驚喜喎，因為CV冇照片，我都係第一次見佢真人，長頭髮，靚靚女女，有啲日本女團成員嗰種feel，我終於明白點解頭先office會靜咗15分鐘喇。
呢個靚女叫Jacqueline，其實見完之後佢只係第二人選，因為之前見咗另外一位candidate更適合，無論係experience同interview嘅表現都勝一籌，好可惜人哋有更好offer，結果turn down咗我公司。
我用咗幾日時間見人，公司班友仔就煩足我幾日，不斷問諗掂未，甚至以「威嚇」手段叫我請Jacqueline，阿權係咁講：「都唔撚明你諗乜春，反正都係畀錢請人啦，梗係請個靚啦，仲諗乜撚嘢呢？」
阿恆：「警撚告你呀，如果唔請上次個靚女，我哋集體辭職唔撚撈㗎，到時你間公司就冚家剷㗎喇！」
始終覺得Jacqueline喺我哋公司會格格不入，好可惜之後再見多幾個candidate都唔啱心水，所以我唔係驚咗公司班人，而係當時Jacqueline已經係second choice喇。
我：「打咗畀靚女啦，人哋下星期一返工呀！」整個office好齊咁Yeah咗一聲，Yeah乜鬼吖，好肯定Jacqueline返工第一日已經嚇親啦，我估呢個女仔唔會做超過3日，Anyway，公司終於打破10年傳統，第一次請咗個女員工。
星期一，作為老細嘅我如常返10點，一入office見到成班人圍埋，我淨係見到一堆背脊。
我：「咩事咩事，係咪死撚咗人？定係圍埋睇咸片？」
阿權擰過嚟好惡咁望住我講：「喂，唔好講粗口吖！」
我：「做乜撚嘢呀你？」
Kelvin：「都話唔好講粗口，你嚇親Jacqueline㗎！」
原來呢班人係圍住Jacqueline個位，好熱情咁同女新人傾計，佢哋叫我唔好講粗口都未算陌生，最陌生係班老粗著晒西裝返工，咩事呀？阿權件西裝明顯唔係呢個年代㗎喎，你幾耐冇著過呀？Carson、阿恆、Kelvin、Derek，仲有其他男同事都全部變身，就算冇西裝褸都係咁易著返恤衫西褲，呢班禽獸平時唔係咁㗎……
貨倉雄哥仲犀利，同佢幾個倉嘅手足拎住啲咖啡行入嚟，話要請大家飲嘢慶祝新同事返工喎，我冇眼花吖嘛，全部有著衫嘅，我上次見雄哥有著上身應該係半年前喇。
我：「屌你班仆街，我係咪入錯office？」
雄哥：「喂，唔好大教壞細啦，講嘢斯文啲得唔得呀？積家Lin第一日返工咋！」
屌你啦雄哥，咩積家Lin呀！人哋叫Jacqueline呀！幾廿歲仲想溝女呀？報個夜校同我讀100次Jacqueline先啦！
其實我都唔知應該開心定唔開心，總之Jacqueline返咗工之後，成個office嘅氣氛都變晒，所有人都變晒……
（未完待續）
餓狼傳說 1 – 破天荒請女仔公司大變天
https://hkofficedaily.com/?p=18914
餓狼傳說 2 – 男版宮心計每日上演
https://hkofficedaily.com/?p=18923
餓狼傳說 3 – 拍拖幾個月欠街數十幾萬
https://hkofficedaily.com/?p=18928