雄哥：「見唔見積加Lin呀？」
我：「雄哥呀，跟我讀一次，”JACK”-uh-“lynn” ，讀吖。」
雄哥：「積－加－Lin！」
我：「唔係呀，”JACK”-uh-“lynn” ，再試下。」
雄哥：「你唔好煩啦，見唔見積加Lin啫，我哋成班倉嘅手足想請佢飲茶呀！」
真係不學無術，算啦！我再望下個鐘，12:30咋喎，office幾條友仔同Jacqueline都唔見人嘅？
平時最少講嘢嘅IT同事David爆咗句：「佢哋15分鐘前去晒食晏喇，食lunch buffet喎，12:15成班出晒去，Carson負責call Uber，聽到佢12點已經call車。」
得喇David，講完「15分鐘前」又強調係「12:15」，再堅定咁話12點call車，你篤灰嘅心意我收到，其實David平時都係T-Shirt短褲返工，仲試過著拖鞋，不過Jacqueline返工之後就改咗著恤衫西褲，咪以為匿喺corner做角落生物我就留意唔到你起痰啦！
全公司都睇中同一條女，自然就會產生競爭，問題係良性定惡性，好坦白講，對公司係良性既，而家冇人遲到，有時仲會自發性OT，佢哋當然唔係為我啦，總之Jacqueline喺office逗留幾耐，班餓狼都要常伴佢左右。
不過同事之間嘅感情就似乎出現咗惡性影響，早兩日我親耳聽到阿權大大聲鬧Kelvin：「做嘢上心啲好唔好呀？犯埋啲低級錯誤，仲有噚日個email做咩等到今日先覆？個客等緊㗎，professional啲好冇？」
我當堂打個突，平時遲到又早退，office hour睇馬經嘅阿權竟然叫人professional啲？再望真下，哦，原來Jacqueline喺度，想喺條女面前攞威，明白晒，只見Kelvin個樣好唔順氣，個眼神怨恨到呢，如果香港殺人唔使坐監，好肯定Kelvin會即刻隊冧阿權。
公司變成咁我都唔知開心定唔開心，班友仔講嘢斯文咗，衣著光鮮亮麗咗，返工準時咗，工作效率高咗，不過同事之間感情好明顯差咗，好似呢個又憎嗰個，嗰個又憎呢個，使唔使咁呀？一條女啫，又未去到天仙下凡，兄弟間搞到劍拔弩張好冇癮喎！
後來有一日，我叫Jacqueline入房講公事，期間話有個project想佢跟Carson學下點handle，Jacqueline竟然問可唔可以唔跟Carson？
我：「點解？發生咩事？」
Jacqueline好似羞於啟齒，依依哦哦唔想講。
我：「有咩唔怕講喎，因為Carson呢個job比較輕鬆，我唔想一開始畀啲高難度project你，係咪有難言之隱？」
Jacqueline：「我覺得Carson好鹹濕？」
我：「Carson好鹹濕？佢搞你呀？」
Jacqueline：「唔係，聽同事講咋！」
我：「聽邊個同事講？點樣鹹濕？放心，我會保密，同埋都要保護你，我唔想office有咩唔開心嘅事發生。」
Jacqueline：「因為阿恆同我講，Carson好鍾意叫雞，仲話好鍾意去啲咩141洗樓，阿恆仲話，未封關之前Carson每個星期都返大陸玩，試過畀公安刑事拘留定唔知咩，總之我好驚佢，不過阿恆叫我保守祕密，老細你可唔可以當冇聽過呀？但我真係唔想跟Carson呀！」
嘩，成班餓狼已經唔係暗戰咁簡單，阿恆哥，希望你明白喺第三者面前咁樣中傷他人，絕對可以構成誹謗㗎！我未聽過Carson去叫雞同洗樓，但好記得阿恆有次食飯分享自己揼邪骨嘅經驗，又雀仔按摩又魔鬼C餐，你咪又係鹹濕佬，扮咩紳士呀？
我同Jacqueline講考慮下個project點分配先，之後再通知佢，最後問咗句：「你老實答我，佢哋有冇講過我鹹濕，想知有冇人屈我啫，聲譽攸關。」
Jacqueline：「咁又冇，佢哋淨係話你係老婆奴。」
我：「OK，你返出去先。」
有老婆果然殺傷力低啲，班餓狼完全唔當我係對手，遠離江湖事真係好，不過從呢件事睇得出，Jacqueline真係好口疏，千祈唔好同佢講秘密。
Office每日都好似上演緊「男版宮心計」，班餓狼唔係互屌互憎同埋互相仇視，就係暗箭傷人再各出奇謀獻殷勤，由於我唔係competitor，所以個別同事反而會走嚟同我爆料，每隔兩三日就有花生食，流言蜚語聽到冇晒感覺，唯獨有單嘢就令我幾詫異。
阿權：「David條死仔平時凍飲加3蚊都唔捨得叫，而家走去送份萬幾蚊嘅禮物畀Jacqueline，玩銀彈政策喎！」
我：「買咩禮物要萬幾蚊？」
阿權：「Jacqueline之前話部私人notebook壞咗，拎返嚟畀David整，轉個頭David話部notebook太舊，送咗部MacBook畀Jacqueline，仲話加到16GB Memory、1TB Storage、裝埋Final Cut Pro，我check過喇，加加埋埋要成一萬六千幾。」
我：「咁豪？除咗結婚介指，我好似未送過over一萬蚊嘅禮物畀老婆，突然有啲慚愧。」
阿權：「咪係囉，佢係兵嚟咋，但Jacqueline都唔識用Final Cut Pro，你裝嚟做咩啫，有錢大晒呀！我知啲IT狗好多freelance，平時又冇其他嗜好，梗係捨得使呢啲錢啦！」
又唔好開口話人係兵，埋口話人係IT狗，阿權你自己咪又係狗公，仲係一隻窮狗公。
正當我以為Jacqueline會繼續運用佢嘅美色叱吒office，日日享受畀班狗公服侍之際，我竟然聽到一個消息，女－神－封－盤－了！贏得Jacqueline芳心嘅係其中一位男同事，佢亦隨即成為咗一眾餓狼嘅公敵。
可能我係做生意，份人比較注重投入同成本，我第一時間諗起David，萬六蚊部MacBook仲裝埋Final Cut Pro，今次血本無歸喇，真係比悲傷更悲傷的事。
（未完待續）
餓狼傳說 1 – 破天荒請女仔公司大變天
https://hkofficedaily.com/?p=18914
餓狼傳說 2 – 男版宮心計每日上演
https://hkofficedaily.com/?p=18923
餓狼傳說 3 – 拍拖幾個月欠街數十幾萬
https://hkofficedaily.com/?p=18928