長假期對於朋友唔多嘅人會唔會好難捱？至少我自己唔會，好似呢個復活節加清明節嘅5日長假，我除咗可以做下自己嘢之外，亦可以好好放空同休息，坦白講係幾enjoy。
例不出席公司所有活動嘅Derek同我講，佢有人際過敏症，其實我都有相同症狀：
1）好怕收到同埋回覆訊息
某程度上有WhatsApp恐懼症，有人send msg畀你會感到壓力，你未必唔鍾意send msg畀你嘅人，只係唔想花太多時間回覆，因為渴望有個人空間同時間，但唔覆又好似冇禮貌，覆咗又驚來來回回沒完沒了。
2）朋友約你好多次先至出一次
同回覆msg道理一樣，你未必係對約你嘅人反感，只係同人出街好易攰，自己出街反而冇乜問題，就算人哋約你好多次先至出一次，臨出去之前你都想搵藉口推卻，呢樣嘢同人群恐懼症有啲相似，一多人就會焦慮。
3）容易被自己情緒淹沒，亦容易受他人情緒影響
只可以歸咎自己係一個太敏感嘅人，出現負面情緒就好難恢復，如果真係發嬲，就算道理喺自己呢邊，甚至對方已經自動收皮，你仍然會覺得情緒低落同埋不安。
好多專家、醫生、作家都會叫你睇醫生，因為人際過敏症多多少少都有抑鬱症狀，不過老老實實，有幾多人會因為咁樣去睇醫生呢？去睇心理醫生本身已經係一個心理關口。
喺呢度提供一個自救嘅方法，就係遠離「過敏原」，「過敏原」唔係指咩病菌病毒，呢度係指「人」。人際過敏症講到尾係因為有「人」令你唔舒服，呢個「人」係邊個就因人而異，我以自己做例子，公司有個客令我非常唔舒服，佢每次搵我都係想拎著數，雖然我有足夠經驗同埋智慧全身而退，但係對住呢啲人會非常厭惡。
每次呢個客send msg畀我，就算未打開嚟睇，淨係見到佢個名已經好煩躁，佢就係我其中一個「過敏原」。
Derek嘅「過敏原」就嚟自某啲同事，覺得對住佢哋好唔舒服，所以就盡量避席，Derek只係想搵一個方法令自己開心啲，所以我從來冇強迫佢做任何嘢，我認為一個人活喺世上，唯一嘅終生大事就係學識點樣令自己開心。
我為咗遠離自己嘅「過敏原」，三十幾歲人先走嚟電話分類，本身用開嘅number已經畀咗太多客，冇辦法，唯有另外出一個number，呢個number少過10個人知道，其中有兩個係父母，因為驚老人家有咩事通知唔到我，對於我並唔反感嘅朋友，我只能夠講聲抱歉，太耐先覆msg唔係討厭，只係我有人際過敏症，想盡量減少生活壓力。
有啲人面面俱圓，朋友多到食生日飯都可以食足兩個月；有啲人鍾意低調，唔需要太多朋友，總係覺得話不投機半句多。其實呢兩種人都冇問題，佢哋只係按照自己喜愛嘅方式生活。
所以當幾個同事不斷叫Derek喺長假期出去玩，人哋推咗幾次都仲繼續追問嘅時候，我笑住幫手解圍：「放過Derek啦，唔通佢要陪女朋友又講畀你哋聽咩！」
今個長假期，相信Derek同我一樣，雖然冇咩節目，但係過得好自在，因為我哋呢種人一早學識成為自己最好嘅朋友。
都係嗰句，好好愛自己，自然會有人愛你，就算冇人愛你都唔緊要，因為你應該自己愛自己。
–
長假期 1
https://hkofficedaily.com/?p=16020
長假期 2
https://hkofficedaily.com/?p=16037
長假期 3
https://hkofficedaily.com/?p=16042