有個中學同學好多年前結咗婚，佢老公係印度人，兩個人喺一間IT公司認識，大部分時間都好恩愛，但每次老公講到想一齊回鄉探親，老婆就會話打死都唔去，唔阻止老公自己返，不過唔使預佢，因為覺得印度唔安全。
近日佢老婆見到段新聞，即刻forward畀老公，估唔到佢老公睇完都擰擰頭無聲出。
上個月，印度一個叫Alirajpur嘅城市有單性侵案，一個16歲嘅女仔被性侵，雖然捉到個色魔，但係當地村民就將個16歲女仔同色魔綁埋一齊遊街示眾，即係被性侵嘅人要一齊受罰。
喺遊街嘅過程中，村民唔單止針對個色魔，同時仲不斷侮辱嗰個16歲女仔，除咗言語攻擊同嘲笑之外，村民甚至出手打個女仔，最恐怖係村民之所以出手打人，原來係個女仔嘅屋企人帶頭慫恿……
除咗侮辱同毆打之外，圍觀嘅人仲拎手機出嚟拍片，後來有警察嚟到，拉咗6個人，鬧劇先至告一段落。
印度風化案頻生已經人所共知，當地女性被侵犯後往往得唔到保護同埋支持，明明係受害人，但係下場竟然比色魔更慘，所以印度女性遇事就選擇吞聲忍氣，因為佢哋覺得講完出嚟冇幫助，更甚係畀家人嫌棄，而報警後再被警察二次性侵嘅個案亦唔少，呢啲只係計傳媒見光嘅新聞，可能更多案例根本冇被報道過。
相對地，受害女性得唔到支援，亦令到色魔嘅膽愈嚟愈大，佢哋知道只要唔搞出人命，性侵女性根本就冇手尾跟，惡性循環就係咁樣出現，所以印度嘅性罪行一直猖獗，特別係一啲二三線城市。
還好我中學同學個老公冇強迫佢返印度，以往佢唔肯返，老公就自己一個返，兩公婆已經習慣咗呢種模式，雖然印度嘅大城市冇咁落後，未致於周街出現風化案，但係不安始終係不安，去到提心吊膽又何苦呢。