我喺facebook見過一個post，有人話年紀愈大，如果你嘅朋友愈嚟愈少，咁就要好好反省。我睇完之後一笑置之，乜唔係相反咩？定係寫呢幾句說話嘅人，唔識得區分「識嘅人」同埋「朋友」兩者之間有咩分別？
年紀愈大，識嘅人愈嚟愈多，因為始終會累積，但係你嘅「朋友」應該係愈嚟愈少先至健康，唔係性格差咗，而係你要有足夠智慧辨別邊啲係無效社交，邊啲係另有目的，因為時間、生命、精力，全部都有限，你必須作出選擇同判斷。
好多人以為有財有勢先會畀人搵著數，其實唔係，每一個人都有自己嘅價值。好似我工作嘅地方，有啲同事未必係高層，但佢可以幫你收風，你可以喺佢身上知道老細最近搞緊咩、鍾意咩、係咪炒人、邊條team cut budget……等等。
我有個下屬鍾意咗個女仔，一直做緊兵，佢唔係有錢，個女仔亦唔係要佢送樓送車，只係每隔兩三個月就要佢送嘢，對上一次係送個五千幾蚊嘅LOEWE藤籃袋，不過佢哋手仔都未拖過。
以前酒吧有個女客人唔算靚，唔係富婆，不過好大波，啲仔埋身只係想呃蝦條，冇人打算同佢發展真感情，亦冇人想騙財，純粹爽完一晚就bye bye。
會計個阿姐成日喺公司附近一間酒樓飲茶，耐唔耐佢就將公司冇人要嘅sample畀個知客，所以會計阿姐永遠唔使等位，就算lunch time有幾十人喺門口排緊隊，佢同班下屬都可以若無其事直入酒樓嘆茶，當然太full都要等一等，但肯定唔使拎飛，肯定優先入座。
唔好以為你有頭有面有錢先會有利用價值，其實公司一個小職員、平凡嘅觀音兵、酒樓嘅知客，一樣會吸引到別有用心嘅人，當然，有人樂於等價交易，但總有人會厭倦被盯上，厭倦被滿肚密圈嘅人打主意。
人際關係會為你帶嚟好處同方便，但都會令人好攰，你喺某啲位置會分唔清邊啲人係真，邊啲人係假，特別係身處高位。
我唔反對其他人交朋結友，亦唔係生意失敗見盡人情冷暖先對人失去信任，我只係更加識得分辨好朋友、朋友、熟人、同事、泛泛之交、工作夥伴……呢一堆人際關係嘅區別。
而家公司雖然好大，同事都鍾意成班一齊食飯，但係我好enjoy自己一個食，唔係擺架子，而係一邊食一邊上網睇劇睇post真係好正，每日已經要見咁多人，食lunch絕對係中場休息，或者人哋見到會覺得好奇怪，但我唔需要解釋，亦唔需要被理解。
做人其實唔使太複雜，亦唔需要好多人簇擁住跟出跟入先叫做多朋友，好好愛自己，自然會有人愛你，就算冇人愛你都唔緊要，因為你應該自己愛自己。
我咪話有個下屬Derek從不出席任何公司活動嘅，試過食lunch撞見佢喺同一間餐廳，但係我唔會走去同佢一齊坐，我知道走埋去只會令佢唔舒服同唔自在。
Derek入嚟第二年，佢同我講唔去annual dinner，HR叫我同佢傾傾，因為覺得咁樣好唔畀面，我由一開始已經唔打算勉強佢，只係要盡返team leader嘅職責了解下，Derek心路歷程同我唔一樣，佢唔係生意失敗先看破世情，佢係有人際過敏症……
–
長假期 1
https://hkofficedaily.com/?p=16020
長假期 2
https://hkofficedaily.com/?p=16037
長假期 3
https://hkofficedaily.com/?p=16042