足足8個月前，headhunt問我有冇興趣做一份Brand and Business Development嘅工，咁當時的確係有嘅，因為剛剛辭咗職，咁咪試下囉！
Headhunt一早講明個position最盡開得$25000人工，我ok，見完headhunt之後幾日，就被安排上嗰間公司直接interview。
第一次interview正常嘅，過程普通過普通，見hr傾一大輪，同日就收到headhunt嘅feedback，話會約我做second in，不過arrange時間就足足等咗接近一個月。
Second in上去係見另一個manager，見完又返去等消息，期間我追問headhunt，headhunt追問個客，卒之兩個星期後，嗰間公司畀咗個test我做，叫我做完send返去，然後成件事又好似沉咗落水底。
隔多3個星期，headhunt終於call我話個test冇問題，但係佢哋法國office有個比利時老細想in我，要再上去做第3次interview，今次玩視像，當時我都有見其他工，咁唔爭在囉。
In完個比利時佬，又好似個循環咁返去等通知，等幾個星期，追問，再有一個唔知咩test，test完又石沉大海，其實嗰度玩咗三四個月㗎喇，突然有一日，嗰間公司直接call我，原來幫我跟呢個job嘅headhunt已經冇做，吓！咁都得？不過間公司call我又唔係有offer喎，而係香港呢邊仲想見多我一次，但撞正疫情home office，想約我一個月後……玩完未呀你哋？
我話唔好喇，過程實在太漫長，唔想再無限loop，但係佢哋氹咗我好耐，又話係final interview，我話到時未有新工就見啦。
已經冇擺喺心，無啦啦headhunt公司又有人搵我，問我係咪仲見緊嗰份工，因為有新headhunt接手，而家會再介入幫我follow，其實我係咪得罪咗佢哋，Headhunt同間公司聯手玩我啫，點解見一份工會搞到勁複雜㗎！
當時我老公已經決定去倫敦生活，大家再喺當地搵工作，所以我都疊埋心水移民，點知呢個時候，新嘅headhunt再contact我，話想我去多一次interview，原因係嗰間公司又換咗個新嘅department head，希望見埋我最後呢次……
我直接同headhunt講即將去倫敦，所以唔考慮喇，而且搞咗好耐，個headhunt叫我「幫幫手」in多次，我話咁樣冇意思，幫咩手啫？就算對方請咗，我一樣唔會返工，唔係想我為你放棄去倫敦呀？佢聽完之後就自動收皮。
上個月我同老公到咗倫敦，有一日出去食嘢，嗰間公司個HR send WhatsApp畀我話confirm offer，唔使再interview，可以直接返工，但係打唔到畀我，結果要用WhatsApp通知，我話唔需要喇，佢仲追問點解唔考慮，係咪有其他offer？我都費事再解釋。
真係唔知好嬲定好笑，睇返啲email，原來我第一次上去呢間公司interview已經係8個月前，就算唔係移民，真係等你個offer都餓死咗啦，headhunt轉咗人，你公司都轉埋department head喇，我個job幾萬蚊就話啫，請個$25000嘅position，使唔使in 4, 5次，做兩個test，等8個月呀？
人生好得意，如果佢哋一早畀offer，可能老公未必會咁果斷嚟倫敦，就係因為我當時冇工作，佢又想轉換環境，所以我哋就開始咗人生新一頁，希望之後喺倫敦搵工，唔會再有一啲等足8個月嘅offer啦！你睇字都覺得好攰，難為我同佢哋玩咗咁多個月。
投稿讀者：Noel
🧐 雖然呢個interview過程長達8個月咁耐，但係2018年我有單真人真事都好搞笑，當時有個客想請臨時工頂大肚婆，結果招聘嗰陣一直嫌三嫌四，最後人哋生完BB都未請到……
請人頂大肚婆產假 人哋生完仔都未請到
https://hkofficedaily.com/?p=16480