同事轉行做保險 唔幫佢買即反面

保險有用,我亦有需要買,但只會同信得過嘅人買,因為一份好嘅保險,由一個差嘅經紀去跟,隨時會貼錢買難受。其實保險份份都大同小異,最重要係個經紀上唔上心,老唔老實,有冇責任感。

我有個舊同事叫阿Jack,有一日佢Whatsapp我哋阿頭,話聽日會返嚟坐下,又話會買埋西餅,阿頭即刻同我哋講:「大家執生,阿Jack聽日上嚟。」

當時我哋仲未知阿Jack轉行賣保險,但都估到唔係開呢瓣,就係開傳銷,再唔係就倫敦金,最後謎底解開,係保險。

當日阿Jack真係有上嚟,但冇買西餅,然後逐個sell我哋,好多同事都推咗,包括我在內,不過阿Jack同一晚再WhatsApp我,係咁問我人生有咩計劃,同我傾退休,成個人唔同晒,以前佢係討論邊個女同事大波同埋點樣射波之嘛,而家你同我傾退休生活?

我再三表明唔買,阿Jack就由氹變成發爛渣,喂,呢啲嘢邊有得迫㗎?咁當然我冇直接話覺得佢信唔過啦,做人留一線,他日好相見,可惜阿Jack唔係咁諗,佢最後一句WhatsApp msg我照讀出嚟:「做咗咁耐同事,叫你幫手開張單都唔肯,保險又唔係我食你啲錢,保障嚟㗎,以後唔好做friend喇,心淡!」

唔講唔知以為我借佢錢唔還。

我哋唔同阿Jack買保險,阿頭又叫我哋執生,係因為呢條友做嘢不嬲冇交帶又鳩屎,朝朝返工都遲到就算喇,佢係連約客都可以遲大到,有次我同佢join見客,結果我同個客喺coffee shop等咗成粒鐘,問題係有啲文件喺佢手上,人哋等到黑晒面。

當時另外有個好重要嘅project,嗰幾晚同事齊齊OT,阿Jack直頭請埋病假,成個project冇跟過,完咗就咁啱好返。公事以外,有同事借咗隻PS嘅Game畀阿Jack,提咗佢好多次都冇還,直到佢離開咗公司都冇還過。

因為曾經共事,我哋太了解阿Jack嘅為人,你試幻想下,將來有事要入院,有事要claim保險,阿Jack會點樣去跟張保單?可靠嘅形象,仲有別人對你嘅信任,係靠日常生活同埋瑣碎事去累積同建立。

不過阿Jack把口又真係氹到人開單,原來有個女同事耳仔軟買咗,我哋當時就講咗句:「祝你好運。」另外提議佢搵其他保險朋友睇下保單內容。

話口未完,女同事都未搵到朋友幫佢睇下份保單,阿Jack已經冇做喇,結果張單咪變咗孤兒單囉。

都係嗰句,保險呢樣嘢本身冇問題,同邊個買先至係問題。

投稿讀者:我全家都好幸福

🙋🏻‍♂️ 講開買保險,之前有個讀者嘅哥哥都做過,全家買晒,結果亦變晒孤兒單,佢哥哥後來轉行做地盤……一日咁多。

「地盤冇學歷都做得啦!」話人哋份工易做,結果捱一日冇做
https://hkofficedaily.com/?p=14771

另外仲有一單,Speed Dating最憎遇到嘅客---Sell保險
https://hkofficedaily.com/?p=10324

error: