「喂Hello，想搵你見工㗎，N－I－P即係姓咩？」
「姓聶。」
「你個英文名點讀呀？」
「Dempsey.（我加重音讀畀對方聽）」
「你CV加埋中文名吖嘛，約你聽日下晝3點見工ok？」
「冇問題呀。」
雖然電話另一邊個男人好似冇乜禮貌，我個姓又唔識讀，英文名又唔識讀，但係我已經失業兩個月，老竇老母日日喺屋企煩我，真係度日如年，有工咪見咗先囉，仲揀呀？
第二日跟地址去到觀塘，好討厭呢個地方，人多車多，不過都係嗰句，唔通仲揀咩。上到去間公司，冇燈、冇人、撳極個bell都冇人應，地址冇錯吖，收咗工呀？
喺呢個時候，身後嘅電梯門打開，有個男人望一望我然後問：「你係聶生？」
我：「係呀。」
「唔好意思，頭先出去見客傾耐咗，等咗好耐？」
我：「哦，唔係，啱啱到啫。」
個男人踎低用鎖匙開門腳個鎖，再起身撳密碼推門，同我一齊行入office，問題係……個office咁樣嘅喂？有張乒乓波枱、有部大電視、有部PS、有梳化、有雪櫃，呢度社區會堂嚟㗎？冇一個office應該有嘅辦公室設備嘅，正常工作枱都冇張喎。
「喂，坐吖。」男人指住張梳化示意我坐低。
佢著嘅係便服，而我就成套西裝打領帶，兩個男人坐喺梳化，個情景好似我sell緊佢買保險，總之好錯配。
「叫我阿Sam得喇，或者嗌森仔都得。」
我：「哦，Hello Sam。」
「喂你英文名點讀呀？」
我：「Dempsey.」我故意讀得好慢畀佢聽。
「擔屎呀？咁得意既，唔緊要啦，我叫你聶仔好冇？聶生聶生好奇怪。」
我：「冇問題，都係一句啫，請問呢度係……office？」
「係呀，我都係啱啱租，乜都未有，而家陸續請緊人㗎喇，啲嘢就慢慢添置。」
成件事好鳩屎喎，又嘥咗車錢嚟觀塘呢個鬼地方見工，是諗但啦，好過留喺屋企畀老竇老母煩住晒，求其見完就走，即刻起身撇又好奇怪。
我：「請問呢間公司做咩㗎？」因為我send咗好多份CV出去，真係搵唔返當初嘅JD，不過我係清一色搵跟單文員工作。
「網購囉！你主要職責係幫啲貨影相，然後upload去我哋個website，打幾句形容下啲貨，另外我會請人寄貨呀，計數呀，聽下電話呀，應該呢個禮拜請晒人㗎喇。」
我：「明白，不過我冇做過網購，見好似同我以前啲工唔同。」
「手板眼見功夫嚟啫，我自己都未做過啦。」
🤦🏻♂️你未做過咁你開公司請人？
我：「唔好意思呀Sam，了解下，即係…你係呢度老闆，而家啱啱開始請人，呢間新公司，我有冇理解錯？」
「係呀，好簡單㗎咋，最緊要大家同事做得開心，你見到嗰啲PS呀，乒乓波枱呀，可以隨便玩㗎，我都係買嚟畀同事玩。」
呢度撚有同事咩？玩手指呀？雖然我未做過生意啫，但你會唔會諗得太簡單呀？
我：「哦，好好喎，呢度都幾多娛樂。」扮下嘢都要啦，唔通笑佢白痴咩，兩個男人共處一室，容乜易畀佢兜嘢桔，附和下先，最緊要安全離開，冇事既冇事既。
「你之前幾錢人工呀？你CV冇寫。」
我：「25000！」其實我上一份工得18000，不過既然冇心做，又見佢咁鳩屎好似樣樣嘢都理所當然，除咗希望呢位阿Sam知難而退之外，仲想睇下佢驚訝嘅表情。
「咁就…28000啦好冇？轉工點都唔可以少過之前既，試用期之後先齊頭3萬蚊。」
我：「3萬？」
「唔係，而家28000，試用期後先3萬，聽日返工有冇問題？」
我：「O…k…呀。」我唔識畀反應，直至嗰一刻為止，我仍然覺得呢個阿Sam係亂柒咁嚟，但係28000絕對喜出望外，之前我份工純粹做一個散仔跟單，同事全部係師奶，老細又從來唔加人工，而家你同我講份糧多過以前一萬！！！
就當你間公司下個月執笠，我其實都冇嘢輸吖，咪當返一個月散工囉，又有錢賺，又唔使留喺屋企。
「咁你聽日返半日先啦，約你兩點 APM食飯，跟住一齊去買電腦，你到時睇下想用邊部，電腦你熟㗎嘛？」
我：「哦，都ok熟，咁我畀啲cert同reference letter你….影印先。」講完都覺得奇怪，呢度唔見有影印機。
「唔使㗎啦！Cert呢啲嘢好死㗎啫！聽日兩點APM，同埋呢，唔使著西裝㗎，便服得㗎喇，咁你梗係唔好人字拖咁過份啦，聽日見啦！」
我：「哦哦，多謝Sam，聽日見。」
一落到公司樓下，我即刻打畀女朋友講呢單經歷，因為內心仲有一絲顧慮，唔通聽日APM買電腦先嚟呃我錢？細心分析下先，佢去到叫我畀錢買，然後當部腦係公司資產，再拎出去轉賣，其實唔係冇可能喎，何況個office仲古古怪怪可以隨時搬走。
女朋友喺電話度講：「呢條友一係有錢仔，一係戇鳩仔，橫掂你留喺屋企都周身唔聚財，聽日咪出嚟睇下係咪騙局囉，最緊要你唔好帶咁多cash，袋住一嚿水喺身好喇，唔好帶提款卡，唔好帶信用卡，唔好畀位佢叫你出住錢先。」
我：「都啱，驚閪呀？APM大庭廣眾，唔通佢會夾硬搶我嘢咩，有事咪走人囉！」
本身想約女朋友食飯慶祝搵到新工，另外想同老竇老母講見成咗份工，但係阿Sam呢個人真係相當有可疑，所有祝捷活動hold一hold先。
第二日準時去到APM，我印證咗女朋友嘅一番說話～～～「呢條友一係有錢仔，一係戇鳩仔。」原來阿Sam叫兩飛，佢係一個有錢嘅戇鳩仔。
———–
🙋🏻♂️《我老細係二世祖》系列令我諗起之前一段投稿，不過當時有錢嘅唔係老細，係個新入職員工
以為同事死要面 實情原來好有錢
https://hkofficedaily.com/?p=14271