請人頂大肚婆產假 人哋生完仔都未請到

半年前,有個客打嚟話要搵個會計,臨時工,頂個大肚嘅同事,講明冇機會轉長工,大肚同事返到就要Out。

由於我搵開長工,搵臨時工已經唔係我強項,首先你唔使諗住撬啲做緊嘢嘅人,唔通想人哋辭咗份長工去幫你做幾個月咩,換言之只可以搵啲本身冇嘢做嘅求職者。

捱義氣幫個客搵咗幾個求職者,點知佢仲嫌三嫌四,又嫌人冇做過大公司,又嫌人學歷唔夠,又嫌人哋叫價高,20幾歲就話後生冇經驗,30幾歲就話老咗學嘢慢,ok fine!食自己啦你!

前兩日有個同事問我:「你個客搵到人頂個大肚婆未呀?」

「未呀,農曆新年嗰陣同佢講恭喜發財,佢自爆搵咗幾間獵頭公司,同埋登咗幾次招聘廣告都搵唔到,猛咁話而家啲求職者好唔掂。」

「咁佢仲要唔要人呀?」

「唔使喇,個大肚同事坐完月,下星期返工喇。」

然後我哋兩個都忍唔住笑咗出嚟。

你嫌棄啲求職者嘅同時,有冇諗過你只係畀一份冇未來嘅工作人哋?

error: