終於唔使戴口罩，心情梗係舒暢啦，吸啖空氣都清新啲，不過除罩呢樣嘢真係令我又愛又恨，因為同部門有個叫阿Sing嘅同事把口臭過坑渠，阿姐曾經兜口兜面問佢點解咁大口氣？係咪呢排熱氣？阿Sing當時答：「今朝唔記得刷牙，趕時間。」
疫情前同佢講嘢簡直生不如死，而家除咗罩之後我哋又要面對呢個問題喇，其實阿Sing口臭應該係關生活習慣事，佢office hour會不斷落街食煙，而且基本上以啡代水，一日飲N杯咖啡，煙同啡呢個組合你都預咗唔慌好聞啦！
最慘係我哋遞埋啲Extra同Eclipse畀佢都唔食，你估真係請你食咩，想你個口冇咁臭，我哋冇咁受罪咋！Eclipse都好貴㗎！
阿Sing個身仲有一浸除，佢來來去去得一件tee同一件外套，或者你會話大把人都係一set衫走天涯，唔通要日日唔同好似fashion show咁咩！啱呀，我哋唔係要求同事做model，但唔該你洗下吖，有味㗎！冬天還好啲，夏天佢啲汗味加埋煙味係非常攻鼻，坐佢附近好難受。
有同事曾經話同一樣嘅衫唔等於冇洗，可能阿Sing就係唔想襯嚟襯去，決定同一件tee同一件外套怒買十件八件。
「好似話Facebook個老細朱西伯格都係咁，衣櫃裡面得同一款tee，所以阿Sing未必係冇換衫，只係佢啲衫件件一樣！」
講得出呢句說話嘅同事……好明顯唔係坐阿Sing附近，工作上亦甚少同阿Sing接觸。
我反駁返佢：「阿Sing件tee有撻咖哩汁，而我每日都見到呢撻咖哩汁，咁你話呢？」
「會唔會係款嚟咋，類似嗰啲潑墨嘅pattern咁呢！」
潑你老母咩！同一件衫就同一件衫啦！你試下同阿Sing同一個部門自己聞下浸除啦！
連負責幫我哋做清潔個阿姨都講過，阿Sing個位超多垃圾，隻杯好多漬都唔洗，其實阿姨曾經睇唔過眼想幫佢洗杯，不過阿Sing唔鍾意，叫阿姨以後唔好掂佢隻杯。
阿Sing係用一隻私家杯飲茶飲咖啡，從來都唔洗，其實茶都算，但咖啡有漬，第二日佢就咁直接再沖另一杯，所以隻杯裡裡外外都好多漬，講真洗一洗刷一刷有幾難呀？你就咁用熱水泡一泡前後唔使3秒，一日唔洗一次，3日洗一次囉，一個星期洗一次都得啩！
Ok，同事個人衛生問題唔好咁多事，不過早兩日就有單嘢搞到大家爭啲作嘔，話說我哋office要搬位，因為有個department要移位，同事自己搬一搬自己啲枱枱櫈櫈，好短距離移一移㗎啫，但係阿Sing嗰日補假冇返。
阿Sing冇返，Admin嗌咗隔籬部門一個大隻仔幫手，正呀！冇人想掂阿Sing張枱，點知大隻仔雙手擺喺枱底準備托一托嘅時候講咗句：「嘩！桔手嘅，下面有釘呀？」
當時我哋都唔知發生咩事，大隻仔呢頭講完，嗰頭就烏低身睇下枱底，可能暗得滯，佢仲用手提電話開著電筒照，然後就聽到佢「Uggh」一聲。（即係好似啲人飲醉酒嘔Uggh一聲，或者係大肚婆作嘔Uggh一聲咁，唔知個Uggh字點寫，希望你明。）
我哋望過去嘅時候見到大隻仔標晒眼水，問佢有咩驚人發現，大隻仔話成個枱底都黐滿鼻屎，因為乾晒，所以好桔……
大隻仔可能想我哋明白佢嘅感受，所以叫我哋埋去睇，仲係咁話：「真係鼻屎嚟㗎，好污糟，你哋睇下就明。」
成班同事聽到大隻仔形容已經想嘔，仲埋去睇？傻的嗎？何況阿Sing份人有幾嗱渣大家心中有數，你估我哋未見過佢撩鼻屎咩？差唔多每日都見到啦，只係唔知佢會黐落自己枱底咁癲啫，你搵張紙巾有幾難呀！
阿姐同Admin當日都先後打電話畀阿Sing，主要係話佢好污糟，問佢點解要黐啲鼻屎喺枱底，聽返阿姐講，阿Sing喺電話裡面係咁答：「咩呀？冇呀！一兩次之嘛！得啦！我聽日自己搬枱。」
之後點，搬枱係兩日前發生，跟住就唔使戴口罩，即係阿Sing返嚟嗰日大家都除晒罩，冇人想同阿Sing講嘢，阿Sing亦都繼續扮冇事……
借個位宣傳下，《辦公室日報》YouTube嘅日本職場男公關風俗店獵頭已經出咗第二集，我哋擺咗好多心機去拍，事前事後亦都做足準備功夫，希望大家多多支持，最緊要你哋鍾意睇！
https://youtu.be/-50oZUjrmxo
另外，講起核突同事，有冇人記得《惡作劇》呢個連載？
《惡作劇》上 咖啡浸鍵盤 M巾放櫃底
https://hkofficedaily.com/?p=20885
《惡作劇》下 監控好折磨 因電郵結怨
https://hkofficedaily.com/?p=20895