「我想問下你算唔算係小龍個老闆？有個女人打嚟話想傾兩句，定係我直接駁畀老闆？」Receptionist突然走埋嚟問，其實小龍係我舊下屬，身份上我只係佢上司，並唔係老闆，不過Receptionist咁樣講我反而仲驚，唔通係小龍之前跟開嘅客有唔滿意？
我：「佢有冇講自己係邊間公司呀？算啦，唔好驚動老闆，你將個電話直接駁畀我先。」如果有鑊氣就梗係截咗先啦，小龍已經走咗半年㗎喇，有咩事最後咪又係我頂。
電話駁咗入嚟之後我聽到一把女人聲：「喂，你係小龍老闆呀？求求你畀次機會小龍啦，佢平時好乖好聽話，你畀多次機會佢啦！」
我：「請問你係邊位？」
「我係小龍嘅媽媽，佢可能有時會駁下嘴，不過性格好好㗎，你唔好炒佢啦！」
我：「哦，你係伯母……我冇炒小龍喎，係咪有咩誤會呀？」
「你唔好呃我啦，如果佢有咩做得唔好，你可以鬧佢㗎，最緊要畀多次機會佢，你大人有大量啦老闆！」
我：「首先我想同你講清楚，我係小龍前上司，唔係老闆，其次係我冇炒小龍。」
「你冇炒小龍？即係佢自己辭職呀？點會呀？佢同我講公司炒佢㗎，你真係可以鬧佢喎，我係佢媽媽，好了解呢個仔嘅性格，你鬧佢一定肯聽㗎，畀次機會佢啦！」
我：「不如咁啦，其實隔住個電話我都唔知你係咪小龍媽媽，有咩事你問返佢本人會好啲。」
「我真係佢媽媽嚟㗎，如果你需要，我可以上嚟畀張身份證你睇，到時我哋見到面再傾下，你畀個機會佢啦！」
我已經數唔到佢講咗幾多次「畀個機會」，我唔肯再講落去係因為防人之心不可無，當時唔知對方確實身份，如果係有人惡意套料想問小龍啲嘢咁點算？我唔可以排除呢個可能性，所以多次叮囑個女人如果真係小龍媽媽，不如直接同個仔溝通仲好啦，更何況我都冇炒你個仔，係小龍自己遞信走㗎喎！
收線之後我第一時間打畀小龍，真係阿媽當然無所謂啦，最驚係啲不法之徒啫，都係同當事人講聲比較妥當。
我：「小龍，頭先有個女人打嚟，佢話係你媽媽，仲叫我畀次機會唔好炒你，你知唔知發生咩事？」
小龍：「有冇搞錯呀，打到嚟公司，對唔住呀麻煩到你！代我阿媽同你講聲sorry！」
我：「真係你媽媽呀？我聽個電話啫，有幾麻煩吖，反而我唔知你咩事？走咗半年喇喎，點解你媽媽會無厘頭打個咁嘅電話嚟嘅，仲要話係我炒你？」
小龍：「對唔住呀，係我講大話，因為唔可以講自己辭職，我一定要話自己畀人炒……你講咗畀佢知我係自己辭職？」
我：「講咗一句啫，不過你媽媽唔信，佢話你一定唔會自己辭職，冇嘢吖嘛？而家做緊咩呀？」
小龍：「我而家全職教鼓，教人打鼓。」
簡單啲交代下先，之前小龍係公司嘅Sales，亦係我下屬，佢喺度做咗唔夠兩年，業績不過不失，唔標青，但都唔使墊底，佢當日辭職係話唔鍾意做一啲跑數嘅工，佢話一直以嚟都好大壓力，純粹抱住「搵食頂硬上」嘅心態，所以長期覺得唔開心，提唔起勁，每日都有一種想搵藉口唔返工嘅諗法。
如果一個下屬咁樣同你講，唔通仲勉強留人咩！
以前做同事傾計嘅時候，小龍透露過自己有夾開band，我仲以為佢係主音，而家先知佢係鼓手，原來仲有收學生，咁應該打得唔錯啦！
我：「有一樣嘢我唔明，你都走咗半年喇喎，你媽媽而家先打嚟嘅？」
小龍：「因為最近先穿煲囉，我教鼓，嗰陣辭職係計過夠學生先至resign，雖然錢係搵少咗，但夠食咪得囉，問題係邊有人朝早嚟學打鼓吖，頭幾個月我照以前咁樣朝早出門返工，然後就去自己租嘅band房換衫同繼續瞓。」
我：「唔係吖，著西裝教打鼓咪仲型！」
小龍：「咪玩我啦！」
根據小龍所講，佢大部分嘅學生都係下晝至夜晚先嚟上堂，再長期扮返office工都唔係辦法，而且小龍媽媽好想佢做文職打寫字樓工，如果話自己辭職會好麻煩，所以就報稱被公司炒。
小龍補充：「不過我估唔到阿媽會打嚟，佢應該又摷我啲嘢，搵到啲公司合約之類，跟住個電話號碼打去。」
咁樣做人好辛苦喎小龍……最大問題係我覺得小龍冇火，畀我一種慣咗嘅感覺。
其實小龍都係29歲啫，或者以社會嘅角度嚟衡量已經係中年，但我覺得仲好後生，呢個時候唔做自己鍾意嘅事，唔通七老八十先嚟做咩，既然佢覺得教人打鼓係開心嘅，咁咪放手去做囉，又唔係偷呃拐騙，使咩作個大話扮自己被炒呢？
當然，我置身事外梗係講得輕鬆，相信小龍媽媽平時會比好多壓力個仔，有乜理由打去公司求個仔嘅老闆唔好炒人呢，就算小龍真係被炒，你咁樣幫佢求返份工，個仔返嚟做點樣面對其他同事嘅目光呢？希望佢兩母子可以坦誠溝通下啦！（完）
《辦公室日報》YouTube嘅「日本職場男公關風俗店獵頭」已經出咗第二集，大家睇咗未呀？
https://youtu.be/-50oZUjrmxo