雖然我未算圓滑，但絕對唔會周圍得罪人，所以唔明點解喺公司會不斷被人整蠱，初時我仲以為係同事嘅無心之失，直至最後發生M巾嗰件事，我先開始意識到事態嚴重。
先講講我曾經遭遇乜嘢惡作劇，有次朝早返緊工嘅途中，同team嘅同事Leo send咗張相畀我，係一杯倒瀉咗嘅咖啡，成張枱都係，keyboard仲要浸咗一半，睇相都見到啲咖啡入晒鍵盤罅，Leo仲有句message話：「Iris，搞咩呀你？」
我人都未返到公司，當然唔知咩事啦，更何況我認得嗰隻係pantry畀客用嘅Ikea杯，自己有私家杯根本唔會用公家嘢，所以好肯定嗰杯咖啡唔係我前一日飲嘅。返到去之後已經嚟唔切追究，因為要不斷say sorry同埋唔該幫我清理嘅同事。
事件不了了之，然後就輪到receptionist收到追數電話，對方指名道姓講我個名，話我爭人錢唔還，用粗口鬧receptionist，但係個電話駁畀我嘅時候永遠會cut線，同類事情斷斷續續發生咗幾次，好在平時同receptionist關係好，事情先叫冇鬧大。
人生中從未向財務公司或者大耳窿借錢，自問理財尚算可以，只有朋友向我借，我未試過問人借，卡數亦都係月月清，信貸紀錄良好，所以好肯定係惡作劇，否則又點會每次駁入嚟畀我就收線呢？你要我還錢，唔係要講清楚咩？
Receptionist最無辜，佢話已經硬食咗好多次粗口問候，雖然我解釋得好清楚，但相信Receptionist唔多唔少都有懷疑過我真係借錢唔還，只係諗極都唔明惡作劇嗰個人點解好似想敗壞我名聲。
再之後就耐唔耐有人撕爛或者塗污我枱面上嘅文件，搞親嗰啲documents都係比較重要，好明顯係揀過先落手啦！呢個人毫無疑問係身邊嘅同事，唔明白動機係乜嘢，就當我好乞人憎，都未至於要搞咁多小動作啩！你行事都要好小心先唔會被發現，花咁多功夫喺我身上值得咩？
因為被惡意破壞嘅文件真係好重要，有次包括一份已經簽晒名嘅contract，所以我不得不向上司講有件咁嘅事，雖然佢同埋幾個同事一睇已經知係有人玩嘢，冇理由係我撕爛份contract搵自己笨柒，但無可否認呢單嘢要執手尾真係好麻煩，老細要簽過，個客要簽過，仲有一間第三方公司都要再簽名，過程中又要向人解釋呢，總之勞師動眾搞到好多人。
陰陰濕濕嘅整蠱行為未停過，Lan線被剪斷4至5次，charge電嘅iPhone線都被多次剪斷，枱頭電話線亦被剪斷過一次，因為Lan線要麻煩到IT同事，因此惹嚟唔少怨言，IT個William就曾經畀說話我聽：「真定假呀你？再係咁唔該你自己買定啲Lan線喇，冇咁多幫你換。」
對方擺到明就係一種挑戰行為，好似要正面話畀我聽：「係呀！明搞你，吹呀？」同team同事個個都知，係唔知邊個同我咁大仇口啫，大家諗爆頭都諗唔到。
差啲講漏咗一單，某日我一如以往lunch time叮飯，打開雪櫃發覺成個飯盒唔見咗，一度以為自己唔記得帶返公司，而喺我一臉疑惑仲自言自語嘅時候，本身已經喺pantry叮完飯食緊嘅另一位同事Amanda就問咩事，我照直講：「冇呀，自己大頭蝦囉！噚晚阿媽整咗我最鍾意食嘅雞翼，點知忘記拎返嚟。」
Amanda：「頭先見到垃圾筒有個飯盒喎，仲見到幾隻雞翼，我丟垃圾嘅時候仲諗緊邊個咁大嘥。」
我即刻打開個垃圾筒蓋，真係見到自己個飯盒……
其實嗰次好心痛，因為係我前一日order阿媽整定鹽焗雞翼，屋企人辛辛苦苦煮畀我，而家全部畀人丟落垃圾筒。
Amanda：「唔係你自己丟？冇理由其他人未問過就丟你啲嘢吖。」
我：「係囉……真係唔知，算啦！我都係嗱嗱聲落街買嘢食先，2點仲要開會。」
當時我有啲懷疑係Amanda做，一入嚟佢已經叮完食緊，即係佢起碼5至10分鐘前入咗pantry，而我係朝早9點幾返到公司將飯盒放雪櫃，換言之對方一定係9點幾至1點呢段時間「做嘢」，諗諗下都唔係，個飯盒丟喺最上面，如果冇其他垃圾遮蓋，咁應該係發生咗冇幾耐啦！
後來啲惡作劇好似稍為靜咗落嚟，以為從此太平啦，點知有次我跌咗個10蚊銀落地遍尋不獲，然後拉咗個櫃桶出嚟搵（office三格有輪可以推嗰種櫃桶），竟然見到有兩塊用過嘅M巾喺櫃桶底（因為有輪，個櫃桶係升起冇貼住地面），我當時嚇到大叫，一來驚，二來真係好嘔心，因為啲M巾係用過，深紅到黑色，塊塊都攤開冇捲埋，啲同事行埋嚟睇都覺得好核突。
「勁唔衛生囉！」
「擺咗喺度幾耐呀？」
「我諗你消消毒好喎！」
「你應該係同呢兩塊用過嘅M巾一齊做嘢好耐，黑色㗎喎！」
有安慰說話，有嘲笑聲音，有幫我諗方法清理嘅人，亦有幸災樂禍睇戲嘅人，突然間覺得office好似一面照妖鏡，人情冷暖短短幾秒鐘之間望清。
唔使向上司report，因為佢都在場見到，不過除咗一齊猜猜度度，又的確做唔到啲乜，因為公司根本冇任何閉路電視。
乜都忍夠啦，以上惡作劇起碼維持咗兩年有多，今次實在太過份，已經忍無可忍喇！我決定去買偷拍用嘅隱藏式鏡頭返嚟，一定要捉到呢個人，否則只會夜長夢多。
倒咖啡落keyboard、追數電話、撕爛塗污文件、丟飯盒，攝用過嘅M巾落櫃桶底，細心回想就發現嚴重程度一次比一次升級，唔搵出真相只會有得震冇得瞓，點估到對方下次又會做咩？
（未完待續）
🐱 男朋友隻貓救咗我一命 – 情侶座
https://hkofficedaily.com/?p=20877