「阿姨呀，呢度你係寫工作經驗喎，呢份咩工嚟㗎？又冇公司名，我睇唔明。」我阿姨經人介紹去見茶水間助理，雖然識人好過識字，但嗰間公司堅持要佢print埋張CV出嚟，阿姨之前啲工唔係做樓面就係清潔，根本未打過CV，連電腦都唔識用，所以最後就搵咗我幫忙。
阿姨用原子筆喺張紙上面寫低咗自己嘅工作經驗同個人資料，我就幫佢排好晒打到整整齊齊，但係打打下唔知佢張紙寫乜，呢個時候我老豆都行埋嚟插嘴：「咩呀，做過咩工呀？做雞呀？」
我老豆就係咁，成日以為自己好好笑，結果我阿媽聽到即刻開波鬧老豆。
阿姨冇佢咁好氣，淨係向我解釋：「冇公司名㗎，人哋叫我做乜咪做乜囉，我都唔知點講畀你聽。」
我：「咁即係做乜先得㗎？一係唔好打落去啦，呢份唔知咩工你都係做咗一年幾啫！」
阿姨：「但我又真係做過喎，一係你打演員得唔得呀？」
我：「演員？咩演員？你拍過戲㗎咩？」
阿姨：「主要係做嗰啲粉絲同食客囉！」
我：「你講咩呀？你唔講清楚好難幫你打落去喎，漏空佢啦，你話嗰一年做家庭主婦咪得囉！」
結果阿姨都係唔制，佢覺得嗰一年幾真係有做嘢，堅持要寫落CV度，聽完佢講一轉，我終於知道份工係做乜喇，原來係職業fans！佢講咗幾個歌手名畀我聽😅真係要google先識，主要係去舉牌、尖叫、拎簽名，總之就要幫個歌手做勢，咁都可以係一份工？點搵返嚟㗎？唱片公司請你？
阿姨：「唔係呀，朋友介紹，有判頭㗎！日日出現金，其實好開心，不過就唔穩定囉！當兼職咋，一個月好彩都有幾千蚊。」真係好多朋友介紹工作畀佢，你睇人脈幾重要🤣
我：「有咁筍嘅兼職你唔介紹我嘅？」
阿姨：「唔啱你哋啲後生仔啦，介紹我個朋友40幾歲，我哋成班師奶去做，都冇後生仔。」
我：「不過呢啲歌手其實都係得廿幾歲，歌又唔出名，樣又未見過，有fans已經好怪，仲要請成班40幾50歲嘅師奶去舉牌拎簽名同歡呼，真係有說服力咩？」
阿姨：「我理得佢有冇說服力啫，有糧出就得㗎啦！不過做歌迷好辛苦，我都係鍾意做食客多啲，又舒服又穩定。」
我：「食客又係咩情況？有錢搵仲有得食？」
阿姨：「冇得食㗎，齋排隊咋！嗰陣時主要幫呢間迴轉壽司，判頭話要做到好有人氣，要長期有一班人喺壽司店門口企喺度，好似拎咗籌等緊咁呀，呢份舒服好多，喺商場有冷氣，好過做歌迷有時要日曬雨淋。」
阿姨講嗰間壽司店我就識，算係有好多分店，個老細初初好高調，而家靜咗好多喇，以前我都覺得奇怪㗎喇，又唔係話好好食，又唔係平，但次次行過都有一大棚人喺門口，搞到我好懷疑香港人嘅味蕾係咪有問題，原來當中有職業食客扮排隊等位，妖！
我：「而家冇得做喇咩？我星期六日得閒喎，介紹我吖，賺少少都好，扮拎籌之嘛，我得㗎！」
阿姨：「冇做好耐啦，我個朋友都冇做喇，佢話有次舉牌上咗電視，畀啲仔女係咁話佢，我排壽司店都撞過幾次街坊，有個樓上嘅阿叔每次路過都見我排，問我係咪好鍾意食壽司，費事喇，後來咪搵咗份清潔囉，我呢啲算唔算特約演員呀？不如你幫我喺CV度打特約演員啦！好聽啲吖嘛，好過有一年幾時間空白唔知點答。」
我：「信我啦阿姨，我哋呢啲後生仔如果有真空期就會畀人問，你呢個年紀其實一年半載冇出去做嘢好閒啫，一般人會理解你有家庭有仔女，漏空佢啦！點解釋你去扮fans同埋扮排隊呀？」
結果阿姨冇將呢part工作經驗擺落CV，好可惜……佢見工時忍唔住同個HR講，人哋超有興趣係咁追問邊個歌星要請fans，又問邊間迴轉壽司店要搵人扮食客做勢，阿姨見完工返嚟仲好得戚咁同我講：「都話啦，人哋好想知㗎！見工個姐姐仔同我傾咗好耐，仲問我拎啲相嚟睇添！」
計埋今日，阿姨去見嗰份茶水間助理已經係半個月前喇，佢仲未收到電話，而家又開始心急喇：「你估係咪間公司唔鍾意我做過粉絲同食客呢？冇理由唔請我㗎喎，話晒都有人介紹，你覺得我好唔好主動打去問下？」
我真係唔知佢相隔半個月都收唔到call，關唔關嗰份職業fans事，可能係有其他求職者interview表現更好，又可能仲有其他求職者未見晒，不過我都希望阿姨份工有著落嘅！祝佢好運啦！
吹到公司有50人 老細請臨記扮返工
https://hkofficedaily.com/?p=18438