辭職被上司情緒勒索 同事極端手法搞破壞

我公司係distance learning school,即係喺香港修讀一啲海外大學課程,廢話我唔多講喇,總之有個同事Gary同阿頭因為辭職問題結怨,然後就搞咗啲破壞性嘅行為,無疑Gary係唔成熟,但某程度上我又諒解佢。

職場有人辭官歸故里,有人漏夜趕科場,本來就係好正常嘅事,偏偏我哋阿頭就有啲唔同,只要同事一遞信,佢就會當對方係仇人咁看待,打份工啫,簽咗賣身契咩!大家一場同事,點解唔可以祝福人呢?

對上一個走嘅同事話自己想休息下,結果瀨晒嘢,阿頭話既然冇下家,拍硬擋幫手做多陣,直至請到新人為止喎,不過都唔見佢落力請人,結果拖下拖下,足足拖咗3個月,最終嗰個同事要同佢反晒面先走到,所以話「想休息下」、「想抖下」,又或者係「未搵到工」,似乎都係好危險嘅答案。

話自己搵到工又得唔得呢?都得,但阿頭會問長問短,喺邊間做?邊頭返工?幾錢人工?有咩福利?總之就要問到篤,你今日唔答,佢聽日又再問,男人老狗日日走去疲勞轟炸下屬,煩唔煩呀?

今次輪到Gary辭職,理由係同屋企人移民,雖然我唔知真定假,不過呢啲唔係重點啦,咩辭職理由都係下台階啫,都係嗰句,最緊要好嚟好去。

然後阿頭就當住我哋班同事面前訓示Gary:「移民?仲要去英國?你知唔知你哋就好似當年大陸人嚟香港咁,其實啲英國佬好憎你,唔通又同你講咩!清醒下啦!香港幾好都有,交通又方便,買嘢又方便,交稅都係交好少咋!完全唔明白你呢一脫人係點諗!」

除咗講埋啲謬論之外,阿頭仲畀好多壓力Gary,基本上每一日都會同Gary講一次:「啲嘢你跟開㗎嘛,唔好諗住丟畀其他人接手呀?請人都冇咁快請到啦!」

未完,仲有情緒勒索,阿頭三日唔埋兩日就會同我哋講以下說話:「已經忙到乜咁㗎啦,啲學生又就嚟畢業勁多嘢搞,呢個時候仲辭職,妖!」

雖然阿頭懶係自言自語或者望住我哋講,但主要目的都係畀說話Gary聽啦!

我同其他幾個同事都有提出幫Gary一齊跟埋啲嘢,不過Gary拒絕咗我哋嘅好意,佢話自己仲有時間,一定搞得掂,叫我哋唔使擔心,與此同時,阿頭擺到明玩嘢,人哋都要走啦,仲不斷加重Gary嘅工作量。

嗰陣我覺得Gary嘅EQ真係好好,又有責任感,點知好戲在後頭。

阿頭成日話workload好重,又埋怨同事辭職,不過佢竟然喺呢個時候拎大假去旅行,其實唔止Gary工作量大增,連我哋其他幾個同事都係,因為要做埋阿頭嗰份吖嘛!

Gary喺呢個時候突然人間蒸發,其實佢有打電話返嚟同HR「講數」,當時Gary應該係30號last day,佢16號唔返,同人事部講用1號至15號嘅人工去cover,大家冇拖冇欠,聽講HR話唔得,同埋要請示我哋阿頭先,但Gary完全唔理,大家亦已經再搵唔到佢。

本身Gary要用呢種形式告別都冇辦法,不過問題係學生啲畢業證書正正係由Gary處理,外國學校嗰邊已經寄咗成疉證書返嚟,有晒校長簽名同埋學校嘅Seal 印,而Gary亦好明顯玩嘢,啲證書係用一個硬圓筒由外國寄嚟,圓筒喺佢枱面,裡面一張證書都冇。

由於搵唔到Gary,唔知啲證書去晒邊,所以大家都好慌,即刻打電話通知阿頭,身在韓國旅行嘅阿頭聽完大發雷霆,同時亦好緊張,猛咁指示我哋周圍搵下,又叫我哋不斷call Gary問清楚。

Gary就搵唔到喇,證書就零零碎碎搵返幾張出嚟,有啲喺佢枱底,有一兩張就攝喺九唔搭八嘅file中間,呢個時候阿頭竟然急到改機票提早返香港,連去旅行都消假,如果Gary知道佢去得咁唔安樂,應該會好開心。

反轉成個office都搵唔齊啲證書,最終驚動埋老細,但係老細鬧唔到Gary,所以就直接向我哋阿頭發炮。

最後點樣搞掂件事?搞唔掂呀!唯有同外國學校嗰邊坦白講整唔見證書囉,要重新再搞然後再寄嚟香港,嗰邊鬧我哋唔專業,即使最後印過簽過再落埋seal印,成件事都係遲咗,所以同一時間都畀班學生嘈,啲學生唔係十幾廿歲,全部都係大人,因為我哋啲course係for在職人士,有人仲話因為我哋張證書遲咗,搞到佢in唔成份工,揚言要報東張西望……唔知佢最後有冇報。

如果你問我點睇,我會覺得Gary處理嘅手法唔成熟,明白佢點解會咁做,因為Gary畀阿頭情緒勒索嘅過程,其實我哋全部人都睇到,簡單嚟講就係你點樣對人,人哋點對返你,不過Gary嘅手法太極端喇!

而家我哋返工仲會耐唔耐「起返」啲證書出嚟,因為Gary真係將啲證書同transcripts四圍塞,其實班學生就最慘,我都唔知Gary咁樣做有冇後果,為咗呢個阿頭唔值得吖嘛!

希望阿頭經歷完呢次教訓之後,第日唔好再情緒勒索同埋打壓遞咗信嘅同事啦!(完)

鑑於Facebook最近將觸及率壓到好低,呢種情況已經一而再,再而三咁發生,所以《辦公室日報》嘅YouTube會係我哋未來其中一個大方向,其實拍片真係比起文稿辛苦好多,希望各位會多多支持,follow《辦公室日報》嘅YouTube,我哋亦會不斷製作高質素同埋有深度嘅影片內容,多謝你哋每一位❤️

YouTube video

追夢20年!日本臨時演員最難忘同酒井法子同框,Speed Dating都有臨記做媒!?
error: