上星期見咗一位求職者，當我隨意講咗一句：「你都算幾穩定喎，之前嗰份做咗差唔多6年。」其實我係想讚佢，並冇追問轉工理由嘅原意，點知就觸發咗呢位求職者嘅神經，我冇諗住知，但佢有諗住講。
「本身可以做更耐㗎，我都冇諗過呢個時候要周圍搵工，真係畀佢玩死，你張form冇得填離職原因咋，我得罪咗個新嚟嘅上司，佢嚟咗半年，一直搞風搞雨，最後炒我唔緊要，賠唔返啲假期畀我咪同佢玩大啲囉！」
本身呢位求職者無論談吐同衣著都斯斯文文，但係講起舊公司就忽然變咗另一個人，佢又開咗個頭，我夾硬轉話題會好怪，所以都順住落咁問：「賠返啲假期？咁而家件事完咗未？」
跟住就開啟咗佢嘅大掣……
「完咗啦，我有11日大假未清，佢叫我最後嗰個月返少11日，可以早啲走，我梗係唔肯啦，張合約都冇話唔可以將啲假轉返錢，咁即係我可以決定放假定折現啦，佢哋最初企硬一定要我早走，得！要玩我實奉陪！」
然後呢位求職者就滔滔不絕講佢嘅復仇大行動，唔好話stop佢，我連嘴都插唔到。
「我舊公司係做飲食，我就係back office，你都見到啦！我call咗消防先，話佢哋啲餐廳違反消防條例，你咁多間食肆喎，我逐間投訴都有排同你玩，跟住就call控煙辦，然後call食環，逐間逐間搞你。」
我：「咁……你舊公司真係有嘢違規定係點？」
「有啲有，有啲冇囉！消防嗰啲應該就冇嘅，門口擺個煙灰缸呢啲就走唔甩啦！」
個求職者對自己嘅部署似乎好滿意。
「最衰而家唔使安心出行，佢哋好彩呀，唔係我日日同佢玩，咁多間分店，我就唔信個個客入嚟都有DO安心，不過唔緊要，控煙辦嗰度都搞到佢好頭痕，我又報埋ICAC呢！」
我：「ICAC都關事？」
「梗係關事！佢有啲分店係店長店員介紹人入嚟做吖嘛，我點知佢哋私底下有冇利益輸送呀，一次過查晒佢啦，我call埋食環呀，投訴埋佢啲食物衛生情況囉！」
消防、食環、ICAC、控煙辦……當中究竟涉及幾多個部門呢？差在未引用埋國安法，不過最恐怖係個求職者講呢句：「得控煙辦叫做到下嘢，其餘消防、食環、ICAC都話冇問題喎，咁我就再搵部門投訴囉！」
我：「仲可以投訴啲咩？」
「唔係呀，我意思係我向消防投訴，佢哋話冇嘢違規，我再搵相關部門投訴返消防呀！又投訴返食環同ICAC，佢哋唔處理啲投訴吖嘛，我咪投訴埋佢哋囉！」
求職者餘怒未消，仲繼續講：「舊公司知係我做呀，打嚟叫我唔好再搞事喎，咁就啱喇，最怕你唔打嚟，我男友係警察，同佢玩到底！你而家恐嚇我呀？香港邊條例唔畀前僱員投訴呀？你妨礙司法公正呀？」
我：「都……玩到幾大喎！」
「唔玩到咁大佢哋唔知驚，最後你知唔知點呀？」
我點都要畀啲反應啦，否則你投訴埋我點算呀？
我：「係囉，最後點呀？」
「最後我舊公司再打嚟，話唔好再咁樣搞落去，將嗰11日大假啲錢折現返畀我。」
我：「哦，即係你都追得返。」
「唔係追返呀，我當佢賠㗎！佢當時叫我提早走，啲大假冇得折現，咁我咪提早走囉，但我唔忿氣呀，點解我冇得揀呀？我一定要早走㗎？而家又早走，仲有得賠返啲大假，咁就差唔多！」
吓！即係你又早走，最後又有得將大假折現返cash，真係賺盡喎！
我唔係驚自己行差踏錯有嘢畀佢投訴，而係驚將來公司有啲咩唔合心意，佢會搵不同政府部門搞我，同埋佢講男友係警察嘅時候，曾經講埋係唔知咩區咩衝鋒隊，因為我唔識呢啲加上冇特別記，所以先覆述唔到出嚟，聽得出佢視警察男友係手上嘅一張皇牌，嚇死我咩！點敢得罪你呀？
所以…我最後…係冇揀呢位求職者，戴定個頭盔先，純粹係有另一個candidate嘅經驗同interview表現更好啫，position就得一個，我點都要作出抉擇，唔好投訴我呀！
唔係話佢舊公司一定冇錯，始終我唔係局內人，可能有好多細節我係唔知道，不過將件事搞到咁大，同埋而家再講返都仍然歇斯底里，我個人覺得有少少over，希望呢位求職者會平伏心情再搵工啦，下次唔使同個初見面嘅HR或者department head講到咁詳盡嘅，恩怨情仇呢啲嘢自己知就夠㗎喇！(完）
終於知點解見工唔好Bad Mouth
https://hkofficedaily.com/?p=16749