朋友：「Jenny，下星期二有冇時間返part-time？」
「咩part-time？要做啲乜？幾錢？」
朋友：「70蚊一個鐘，乜都唔使做，著得formal啲坐office扮做嘢就得喇。」
「拍咩戲？我唔上鏡㗎喎，費事屋企人見到我做茄喱啡。」
朋友：「係就係茄喱啡，不過唔使上鏡㗎，畀個鬼佬睇咋。」
呢件事已經係三年幾前發生，原來朋友個老細去咗啲唔知咩貿發局嘅採購展，當時投咗個細攤位，臨場又真係有啲外國buyer enquiry，雙方交換卡片傾生意，其中一個鬼佬去到差唔多落單嘅階段，就提出想直接去佢office傾，順便視察下佢間公司。
由於朋友個老細一早講咗公司規模約50人，喺參展商個登記list亦係咁填，霎時間鬼佬話要visit真係手忙腳亂，因為朋友間公司根本得3個人，已經包括埋個老細。
「咁你有人都冇用㗎，你office咁細，就算租嗰啲co-working space，再額外加錢放埋公司水牌，一睇都知係共用空間啦！」
朋友：「所以我老細已經搵咗地方，而家租緊個office嘅業主，喺同一棟有個大單位放緊租，有晒辦公室傢私，佢肯用日租形式租畀我老細，大家互惠互利，大前題係鬼佬嚟之前未租出去就得，不過而家距離下星期二得返幾日，應該唔會突然租到出去啦，所以係爭啲臨時演員扮staff囉！」
「咁都得？算唔算商業詐騙？」
朋友：「咩算唔算？直頭係商業詐騙啦！不過咁，老細又唔會呃錢嘅，佢都係做正經生意，只係參加嗰啲展覽要作大啲，因為好多buyer會睇你公司規模，佢又唔會做咩詐騙行為，係充大頭鬼做啲門面嘢囉！」
「70蚊一個鐘要做啲乜呀？過嚟坐一個鐘就走咪好戇居。」
朋友：「唔會唔會，老細話就算鬼佬開完會即走，最低消費都計畀你哋3個鐘，即係最少$210，唔止3個鐘就照加，坐多一分鐘都計你一個鐘，要求係著得formal啲，要有notebook拎返嚟扮工，因為嗰間大office冇電腦，一定要大家拎私人notebook扮。」
由於當時我冇正職，結果就答應咗，拎埋notebook著咗條裙去「扮工」賺咗$210，個鬼佬留咗一個鐘左右已經離開，嗰日淨係抬高頭望住鬼佬微笑示意一下，佢就係咁易望咗office兩眼，然後就同老細入房開會。
不過聽返朋友講，嗰單生意最後都做唔成，好似係價錢問題，鬼佬嚟香港搵咗幾間公司傾，最後揀咗另一個supplier合作，搞咁大壇嘢都係得個桔，難為個老細請咗40幾個臨記，當佢40個，每人$210，呢度都$8400，未計嗰間日租臨時office，慘！
投稿讀者：Jenny
講起茄喱啡，大家記唔記得呢個連載？
《茄喱啡 1 你個candidate係御用妹仔喎》
https://hkofficedaily.com/?p=17293
《茄喱啡 2 老細想要高海寧電話》
https://hkofficedaily.com/?p=17304