「嗚～條女無左lu～～🤣👉」溝唔到女仲要畀人笑，我覺得個心好唔舒服。
我鍾意咗隔籬team嘅Janis好耐，但係直覺話我知女神好多人追，為免溝唔到女搞到日後喺office尷尷尬尬，我一直以嚟都係靜觀其變，得兩個同事知我暗戀Janis，一個叫Cliff，一個叫Derrick。
有一次去pantry斟水，見到Cliff原來同我女神Janis有兩句，據我所知，Cliff本身已經有女朋友，反而Derrick冇，所以我決定私下搵Cliff幫忙，感覺上安心啲。
Cliff講咗好多Janis嘅嘢畀我聽，佢兩個之所以會有交流，係因為大家都有帶飯嘅習慣，所以經常喺等叮飯時吹水，有時仲會同埋其他幾個同事一齊喺pantry食。
有咗呢個「線人」，我得到嘅資訊亦愈嚟愈多，最驚喜係得悉Janis近一年冇拍拖，對我嚟講簡直係天大喜訊，另外亦知道咗好多Janis嘅嗜好，例如佢鍾意行山同埋玩瑜珈。Cliff鼓勵我帶飯同佢哋一齊食，可惜我老母根本唔煮飯，咁我就轉嗌外賣，拎埋飯盒入pantry join大家食都一樣啫。
性格嘅嘢真係冇辦法，天生怕醜，Janis喺度我就唔敢講嘢，大部分時間坐喺度做聽眾，不過後來Cliff同返我講，Janis有提起我，仲話我好內向，Cliff話有落嘴頭sell我，喺Janis面前讚我為人老實，唔會口花花，有意無意叫我做筍盤，仲話Janis聽完之後笑而不語。
與其無了期痴痴的等，我就叫Cliff試下約Janis放工飲嘢，可能office以外我可以放鬆啲，Cliff都有照做，但係Janis話自己唔飲酒，跟住Cliff就提議放假一齊行山，雖然我係一個零運動嘅人，不過為咗親近Janis，幾大就幾大啦！
為咗呢次行山之旅，我由頭到腳嘅裝備都係新買，可惜冇運動細胞始終冇得扮，我全程行得好辛苦，好似行極都行唔完，唔怕老實講，我曾經諗過call飛行服務隊送我落去，因為真係連落山嘅力都冇，但又驚會上報紙。
嗰次好彩冇死，但我發現Cliff少咗同我講Janis嘅嘢，後來仲有同事傳佢兩個拍拖，我直接問Cliff有冇咁嘅事，佢都好坦白話係，仲因為Janis而放棄咗原本個女友。我好嬲，問佢點解幫我追Janis變咗自己溝，Cliff話佢兩個太多共同嗜好，曾經同Janis講我暗戀咗佢好耐，不過Janis直言唔鍾意我。
Derrick後來同我分析，佢話Cliff根本一早睇中Janis，我問佢點解咁講？
Derrick：「平時你行樓下條斜路都要搽白花油咁滯，搵你同Janis行山同推你去死冇分別。」
我：「應該未致於咁衰，我估Cliff係過程中起痰啫！」
Derrick繼續幸災樂禍：「點都好啦，嗚～條女無左lu～～代客泊車聽過，代人溝女就未聽過，呢個服務簡稱係咪『代溝』呀？」
啱嘅，我係抵畀Derrick串，雖然當初就算唔搵Cliff幫手，自己都未必追到Janis，但係今次經驗教識咗我，以後唔理輸定贏都好，女仔一定要自己追，唔可以假手於人。
－
講到男同事溝女，呢單先係經典😎👇
https://hkofficedaily.com/?p=16418