電話響起～
我：「你好，乜乜診所」
一把男聲：「唔好意思呀阻住你做嘢，我有啲嘢想請教你，真心嘅」
唔駛咁刻意講真心嘅。
我：「如果有咩唔舒服最好都係嚟睇醫生啊，我唔係醫生答唔到你啲咩啊」
佢：「嗯…嗯…嗯…」
嗯完就收線嚟睇醫生啦。
我：「我哋今晚收八點，你八點前嚟登記就可以啦」
佢：「嗯…不過我都想請教咗你先，拎咗個第一醫療意見先」
都話我唔係醫生囉，拎咩醫療意見啫？你唔打去管理處問？
我：「我俾唔到醫療意見你呀，我唔係醫生呀」
佢：「嗯，我明呀，我都係問咗你先穩陣啲咁啫」
你真係明咩？明咗啲咩呀你？
佢再講：「真心嘅，我下面啲毛毛仔…後面嗰度…有啲多」
一把火燒晒佢囉。
佢繼續講：「我應該點樣搞佢呀」
呢啲唔係需要醫療意見喎，你唔覺得係應該去美容公司問咩？
我：「唔好意思呀先生，我俾唔到意見你呀」
佢：「點解呀？你哋冇毛㗎咩？」
我：「呢啲問題應該唔需要睇醫生嘅，體毛方面嘅嘢你可能要問其他人啦」
佢：「我咪打咗嚟問你囉？真心㗎喎，我唔識你，你又唔識我嘅，大家對大家嚟講都係其他人嚟㗎」
呀，頂，又真係駁唔到，你好有道理。
我：「我真係答你唔到，冇其他嘢嘅話我收線㗎啦」
佢：「喂喂喂唔好住呀，我真心㗎，你唔好當我係變態痴線佬打嚟騷擾你啦，我真係後面有好多毛，多到好困擾呀，我想要白滑啲啫，好難咩？」
難呀。
佢：「你有冇咩意見俾到我呀？」
我：「冇呀」
佢：「我去問其他人算啦，我都唔知你驚咩，我又唔會隔住個電話搞到你，問吓啫」
嘟，佢收咗我線。
–
👉🏻即睇其他診所低能奇觀嘅文章
👉🏻《診所低能奇觀》 我冇嗌錯你個名呀
https://hkofficedaily.com/?p=15590
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。