忍無可忍想呻下，唔知大家身邊有冇一啲成日得把口，但從來冇實際行動嘅同事（或者朋友）？佢廢都算，自己做唔到但同時又要踩低人哋。
我同事阿喱早喺年幾前已經話要移民台灣，由於佢唔係咩專業人才，讀書又超晒齡，所以佢一開始已經話會搞投資移民。眾所周知，台灣投資移民大概需要150萬港幣左右，未計其他支出，但係阿喱本身冇儲錢習慣，唔好話150萬港幣，佢直情親口承認銀行戶口連3萬都冇，咁點樣投資移民台灣呢？
問佢打算做咩生意？阿喱話開珍珠奶茶，我哋幾個同事都反問：「人哋台灣係珍奶始祖，去到當地開舖，點解要幫襯你呢？」
阿喱話：「珍珠奶茶有幾難沖呀？你開乜都有人排隊㗎啦！何況台灣物價指數咁低，賺少少都夠生活，到時我星期六日唔開舖添呀，畀自己唞下。」
佢完全冇實戰經驗，行埋嚟就話好易，不如你儲咗錢先啦！
上年咪有段時間人人補領BNO諗住移民英國嘅，阿喱知道拎住本BNO就可以過去之後，絕對可以用「扯晒旗」去形容，佢話移民唔使錢喎！
屌你去到英國住唔使錢呀？食唔使錢呀？不過阿喱真係一個好偉大嘅思想家，佢已經上網book咗agent用zoom睇埋樓，又話搵工方面唔使擔心，好有信心可以搵到一份地產工作(佢完全唔係做呢行)，原因係咩？佢咁講：「嚟緊大把香港人會過去，其實我呢啲人好吃香，廣東話同國語都講到，實幫到英國啲地產公司，識中文緊要過英文啦！」
是撚但你啦咁。
阿喱唔止一廂情願覺得英國啲公司一定會請佢，條友仲睇埋車，係咁send啲link畀我哋睇，話呢架車好抵，嗰架車好靚……唔記得同你講，阿喱係冇車牌㗎，佢話去到先學車喎，繼而例牌講一句：「外國啲路咁闊，好易揸啫，自動波咪好似落機舖打機一樣，考車有幾難呀？」
唔知點解明明想移民台灣，跟住話零成本就揀英國，最新一期佢又轉咗心意，無厘頭話要移民日本喎！哥仔，日本冇移民，頂盡係移居，你搞清楚未先？
移居日本唔緊要，反正你都係空談㗎啦！不過阿喱連五十音都唔識，竟然夠膽周圍踩人。
我哋有個舊同事因為嫁咗日本人，所以兩年前移居大阪，阿喱無啦啦contact返人，一開口就問日本啲醫療點樣，福利點樣，生小朋友有咩政府津貼等等，佢又問呢位舊同事日文係咩程度，舊同事答佢N2，阿喱竟然咁樣話人：「下，你得N2咋？」
個舊同事已經好好脾氣，仲善意提醒佢無論N1又好，N2又好，並唔代表可以流利同當地人交談，始終上堂學到嘅日文太老正，生活上會遇到好多課本cover唔晒嘅口語、潮語同口音問題，阿喱好霸氣咁講：「得喇，我上台灣啲論壇，見人哋一年就上到N1，如果我用一年時間發力應該冇問題，好似你咁去兩年都係得N2就死啦！」
唔好意思，我真係覺得阿喱好仆街，舊同事亦有啲嬲，所以先cap圖將呢堆對話畀我哋睇，一個連五十音都未識嘅人走嚟踩一個N2程度嘅人，真係不得了。
未完呀，阿喱呢期仍然瘋狂咁幻想自己去到日本，佢問舊同事：「日本人英文係咪好差？我打算嚟開公司，自己既然係老細，冇理由我學日文就佢哋吖，用英文囉，東京人溝通到啩，唔係差成咁呀？」
舊同事本身只係想hea佢而講咗句：「其實你都唔一定要去東京既，嚟大阪陪吓我囉，呢度啲人夠熱情，可能適應上會易過東京少少，同埋東京以外嘅生活使費同埋租金都會相對平少少。」
跟住阿喱就勁喇，佢咁答：「到時開公司就一定揀東京㗎喇，邊有大公司會開喺東京以外㗎？」
幾撚犀利，手續都未知，錢又未儲，日文未識，佢已經幻想緊自己嗰間係大公司大企業。
想喺日本投資搞居留，唔係開到公司就大晒，你公司冇賺錢，一樣可以叫返你走，阿喱話：「做靚盤數啫，有幾難呀？何況日本經濟咁差，我嚟投資喎，提供就業機會畀班日本人喎，實歡迎我啦！」
我估你睇到呢度應該好想問一句：「點解仲要同條傻西一齊癲呢？屌柒佢吖嘛！」其實我未屌柒佢之前，已經畀阿喱快一步屌返我轉頭：「點解你好似成日想勒住我咁嘅，一路話外國生活好難、搵食好難，一路唱衰，唔通留喺香港好呀？你都on99！」
我都係想齊齊分析吓啫，唔通你話去邊我都一齊打晒飛機咁話「好呀好呀！」咁咩？唔係唔支持佢走，但都要有個周詳少少嘅計劃㗎嘛，我當你係朋友先唔想你衰啫！
幾位現役同事，仲有嗰位移居日本嘅舊同事都勸我咪同佢拗，佢哋話日日有條傻仔喺度發放笑話其實幾過癮，仲預言：「如果移民，第日我哋個個走晒，阿喱都未走到啦！更何況佢睇得所有嘢咁輕易，畀佢去到第二度生活，隨時慘過而家，總之千祈唔好話畀一個傻仔知佢係傻仔，一來佢自己唔覺，仲以為你唔抵得，二來屌佢都嫌廢事，由佢繼續做井底蛙囉！」
啱嘅，好過睇戲，阿喱份人亦配得起一個好戲名———「偉大的思想家」。