追咗公司個女神 發覺佢卸妝後有啲樣衰

7年前嘅事喇,當時我一直暗戀公司一位女同事,佢份人好真,笑起上嚟好甜,平時喺office係典型OL look,迷倒辦公室𥚃面嘅老中青。

經過我一番努力,又成日喺工作方面扮晒熱心幫佢,大約用咗半年時間,我終於追到女神返嚟,之後大家嘅感情好穩定,而且雙方並唔係玩玩下嗰種人,所以相處後我更加愛佢。

當時個世界仲係正常,可以一年去幾次旅行,記得第一次同佢去日本,住喺新宿一間叫E-Hotel嘅酒店,我女神返到去點都唔肯卸妝,死都要我沖涼先,咁我錫佢吖嘛,無所謂啦,然後輪到佢沖,女神沖完之後即刻熄晒全部燈,一個箭步反身就上咗床。(唔知大家有冇去過呢間東新宿嘅E-Hotel,四正但房嘅size好細,由床行去洗手間係幾步之遙,不過東京好多酒店都係咁㗎喇。)

*我必須強調,女神所謂化妝並唔係批盪,佢只係淡素娥眉,絶非濃妝,唔係少林足球阿梅嗰啲,呢樣要還佢清白先。

問過女神,點解唔畀我睇佢卸妝後嘅樣,佢話卸妝後唔靚,驚我唔鍾意佢,我話點會呢傻豬,兩個人最初可能會睇樣啫,跟住就係講夾唔夾同埋有冇交流,不過女神始終唔肯,話想我永遠記得佢個靚樣喎。

咁都未算,你一定會問:「朝早起身咪見到囉!」本身我都係咁諗,點知女神係會較定鬧鐘起身化妝再瞓,記得當時大家諗住瞓到10點先起身梳洗再出街,而佢竟然較8點嘅鬧鐘,趁我神智不清去化妝,最抵死係化完之後返上床瞓到10點再起身。

你有張良計,我有過牆梯,你較8點吖嘛,我就較7:45,係要睇到你唔化妝個樣,但係第二朝7:45醒咗,我睇一睇佢個樣,冇嘢喎,學暴龍哥話齋,一啲事都冇,望住女神瞓喺我隔籬,感覺真係好滿足。

我讚女神:「其實你瞓醒一樣咁靚,化唔化妝都正。」佢聽完好開心,往後嘅日子,我哋嘅關係比之前更加close,你知一對情侶愈嚟愈熟,就唔再介意喺對方面前醜態畢露㗎啦!所以後來我發覺,除咗返工嘅日子之外,女神好似……樣衰咗喎,有時星期六日同佢打完羽毛球,又或者大家再去旅行,漸漸覺得唔對路,又未去到崩壞咁嚴重,但個樣的確係衰過之前咁囉!或者呢啲就係歲月催人老啦,走樣都係合理嘅。

再之後我哋去咗法國旅行,又係一個瞓醒嘅朝早,我望一望女神,oh my god,真係醜樣咗,又好似完全冇眉毛咁,但我冇任何嫌棄嘅意思,只係覺得佢捱殘咗,又啱嘅,我哋公司嗰排真係好忙,人人都做到好辛苦,所以完咗個project我哋先會攞大假一齊去歐洲旅行。

然後,我喺法國向女神求婚,浪唔浪漫呀?佢而家做咗我老婆喇!Yeah!

喺求婚成功當晚,女神向我剖白:「其實,嗰次喺東京嘅第二晚,我一早知你set咗7:45鬧鐘,所以自己再set個6:45嘅鬧鐘,你7:45見到我瞓喺隔籬嗰陣,我已經再早一個鐘起身化完妝再上返床㗎喇。」

……

佢為咗唔畀我睇卸妝後個樣,竟然喺日本set個6:45鬧鐘,計埋時差,當時即係香港時間5:45……

原來你有張良計,我有過牆梯並唔係最後答案,因為天外有天,螳螂捕蟬,黃雀在後。

法國,發覺,我喺法國發覺原來一直被騙。

唔娶都娶咗,可以點啫,咪畀心機愛佢,錫佢,照顧佢囉!呢篇文係老婆而家坐喺隔籬夾我打嘅,所以上面咩淡素娥眉咁深嘅字,都係佢搵畀我,指定要我咁樣形容,另外上面有句「佢而家做咗我老婆喇,Yeah!」都係佢指定要咁打,我背脊一直畀把刀隊L住……

我愛我老婆,化咗妝同冇化妝一樣咁愛,特別係婚後,日日喺屋企睇住佢個真面目,我依然咁愛佢,一切如昔,從未變過。

今次投稿,主要係因為上星期同老婆食咗餐飯,佢話好難食,覺得唔抵,想拎返500蚊稿費幫補下,平衡下心理,唔好意思呀聶生,大家男人唔使講嘢,你明就得㗎喇。

最後,祝每一對喺辦公室認識嘅情侶,最後都可以開花結果。

⭐IG仲有個小延伸,係老公嘅求救訊號🤣

其實你老婆好好㗎喇,撞著呢啲「偽IG女神」先大鑊
https://hkofficedaily.com/?p=2537

error: