其實唔係每個男人都鍾意所謂嘅IG女神。
有個男會員阿恆之前喺活動中認識到另一位女member，就叫佢做IG女神啦！第一次出街都正正常常，第二三四次就開始嚟料喇。
阿恆：「搵地方食飯都唔容易，唔好話普通茶記，就連間餐廳都要揀到靚一靚可以打卡嗰種，然後幫佢影相閒閒地一餐飯影20張以上，同埋佢又要擺好多作狀嘅pose，例如望遠方呀，扮到好憂鬱好迷惘呀，影到隔離枱啲人都望住晒。」
我記得IG女神都有同我交換IG，即刻上去望一望先，咦！又係喎，而且餐餐都係食啲類似all day breakfast嘅物體，所以成個IG嘅食物相都係千篇一律，就係all day breakfast款加個好粉好矇矓嘅色tone，跟住擔天望地，明明碟食物喺正前方，佢又望咗去幾千公里咁遠嗰種構圖。
阿恆：「其實頭幾次都冇咩所謂，女仔鍾意影相好正常，直至最近呢次真係頂唔順，我哋明明約咗喺銅鑼灣食飯，book埋枱7點鐘，佢忽然話不如約6點半去鰂魚涌嗰頭等，飲杯嘢先喎。我心諗飲咩呢？7點都訂晒枱喇，仲要兩個地方有啲距離，咁係咪要cancel booking或者打去改時間呢？原來佢話想去影怪獸大廈。」
我：「啱啱上咗佢IG，唔……其實我feel到佢攰過你，因為日日都好似要搵一個景點打卡，不過你將就下啦，有個IG女神做女朋友唔係幾開心咩，好多男人恨都恨唔到呀，喂，女神喎。」（職責所在，呢個係我最溫和嘅講法）
阿恆：「但我掃過佢IG啲like，發覺好多都係中東佬包晒頭，我估佢係買like，淘寶嗰啲好興包月，唔知幾錢就包你每個IG post有幾百個like。」
我：「有啲咁嘅嘢㗎咩？」我又走去掃一掃，係喎，有個post企海傍又係眼神望到阿拉斯加咁遠，句message仲打「心繫香港」，我心諗你心繫乜鬼吖，日日吃喝玩樂打卡，Click入佢啲like度睇，400幾個人like，有300幾個都係鴨都拉拿、穆罕默德、阿伯拉罕嗰啲英文名，啲頭像真係包晒頭，呢位IG女神似乎主打中東市場喎。
阿恆：「都唔緊要喇，諗住照去啦，然後佢話準備咗部大機畀我，唔想用手機影，問我識唔識較光圈快門？唉！Sorry，真係唔得，如果發展落去會好攰，有時放工想大家輕輕鬆鬆食餐飯咋。」
阿恆的心情我懂。
話說我公司隔離team有個senior又係好鍾意扮IG女神，雖然係senior，不過嗰位女同事其實30歲都未夠，某次佢條team請咗個男仔返嚟，結果返咗3日就冇做，後尾聽返原來個新男同事連續3日lunch都同個senior食，餐餐都要幫手影幾十張相先食得，食物未嚟先影十張，食物嚟咗再遠鏡近鏡又十幾張，個男仔話影完之後自己碟意粉已經乾晒，日日咁樣返工攰過擔泥，影得唔好仲要畀個senior埋怨，你selfie唔緊要呀，下下要人前前後後起身又跪低咁影真係好擾民㗎。
你哋身邊有冇呢啲「偽IG男女神」？唔知係咪得我一個有呢種感覺呢，其實唔係artist但又要影埋啲扮明星扮憂鬱望遠方嘅相，真心好惡頂，不過佢哋自己通常唔覺。