我以前好憎母親節，唔係每個人都有健全嘅家庭，父母喺我好細個嗰陣已經離婚，阿媽離開屋企之後再冇搵過我，所以由細到大我同冇阿媽係冇分別，偏偏電視就成日利用母親節大肆宣傳節目，感覺就好似不斷提醒我冇阿媽，感覺份外難受。
同老婆由拍拖去到結婚初期，我基本上係唔會出席佢屋企嘅母親節飯局，喺呢度想澄清少少，外母其實對我好好，平時喜慶節日，或者外父外母生日，我都一定會到，只係由細到大對母親節感覺好差，我同老婆一家相處係冇問題，甚至可以話感情唔錯，加上老婆有同外父外母透露前因後果，所以佢哋都好體諒我。
講起外父外母，佢哋雖然恩愛，但可能外母係獨生女嘅緣故，聽講自細就被寵壞，所以有時會向外父發脾氣，試過幾次鬧完交仲粒聲唔出返外家，係要等到外父低聲下氣去氹返佢，喺我眼中其實係幾搞笑，不過老婆就話一啲都唔好笑，仲話佢阿媽次次都係動真火。
後來，外母嘅媽媽因病走咗，即係老婆嘅婆婆，出席喪禮嘅時候，外母好傷心，記得外父同我老婆講咗句說話：「我哋以後唔好激你阿媽喇，以前佢唔開心就會返外家，而家你阿媽冇外家喇。」
老婆嘅公公一早走咗，而家婆婆走埋，外母仲係獨生女，係呀，真係冇外家喇。
我聽完有啲哽咽，亦好似開咗竅一樣，雖然自細感受唔到母愛，好憎母親節，但我唔應該畀呢種感覺永續，何況外母又對我咁好。
唔知係咪做嘢辛苦呢？老婆其實三十幾歲㗎咋，不過已經好多白頭髮，每隔幾個月就要我幫佢染黒，初初唔明佢點解突然貪靚，直至有一次老婆同我解釋：「阿媽之前見到我好多白頭髮，佢問我做嘢係咪好辛苦？然後佢慨嘆自己個女老咗好多，仲覺得佢自己都唔擺得幾耐，自從婆婆走咗之後，阿媽好似走唔返出嚟。」
我：「所以你就定時定候染頭髮，等阿媽覺得你後生啲，等佢唔好覺得你搵食艱難？」
老婆：「係呀，我想阿媽見到我後生啲，唔好覺得自己都愈嚟愈老。」
聽完老婆咁講，我之後都會主動幫老婆染頭髮，有時返外母屋企食飯之前，仲會特登幫佢檢查係咪好多白頭髮標返出嚟，如果唔多，就徒手幫佢「蚊」，因為我都唔想外母咁悲觀，想佢覺得自己同個女仲好後生，仲有好多日子。
而家無論咩節日都好，我都會盡量enjoy，我冇欠世界任何嘢，呢個世界亦冇欠我，但如果繼續帶住恨意去生活，就肯定係同自己過唔去，所以今個母親節，我都會幫老婆染靚個頭，再一齊同外父外母食飯。
母親節，父親節又好，甚至平凡日子都好，希望大家珍惜眼前人。
投稿讀者：雷先生