有日一位媽媽嚟到診所。
佢問我：「你可唔可以睇吓我個仔呀？」
我望望，真係睇咗：「係咪睇醫生呀？有冇拎出世紙嚟啊？」
佢：「唔係睇醫生呀，你睇吓得㗎啦」
我頭先睇咗啦，可以走啦？
我：「我睇？我唔係醫生，幫唔到你啲咩㗎喎」
佢解開BB嘅褲鈕再問我：「佢咁樣套住咗係咪包皮過長呀？」
搵醫生啦，你哋唔好個個都當我係包皮專家啦，成日俾JJ仔我睇做咩啫，我唔係變態專睇細路J㗎！
我：「呢啲要問醫生喎，醫生先可以答到你，你俾BB出世紙我呀，我幫你登記呀」
佢：「長嘅係咪要做手術㗎？」
我：「等醫生睇咗先啦，真係有需要嘅醫生都會轉介你，同你講解清楚，你有咩唔明都可以問醫生」
佢：「唔做手術得唔得㗎？」
我：「俾醫生睇咗先啦」
我覺得我哋嘅對答好九唔搭八，你有你問，我有我答咁。
佢：「可唔可以我自己幫佢捲緊啲㗎？」
捲？點捲呀？
我：「…有啲嘢都係需要由專業人士做嘅，自己做就真係唔建議啦」
佢：「定係可以自己每日幫佢剪少少呀？」
你同個仔有仇咩？要咁樣逐忽剪㗎咩？
我：「太太你冷靜啲，唔好諗埋一二邊，手術真係要由專業嘅做，自己做係好危險，分分鐘有咩感染就一世㗎啦，不如真係登記入去睇醫生問醫生好冇？睇一次應該可以解答晒你嘅問題，唔駛自己估自己諗呀嘛」
佢望住個仔條JJ…可唔可以幫佢扣返粒鈕呀？入面真空太性感，我驚一陣有音樂噴泉表演睇呀。
佢望咗陣再答我：「但係我唔想同佢睇醫生呀，佢仲咁細，大啲先睇好似好啲，價錢會唔會有唔同㗎？」
通漲嘅問題，我答你唔到。
我：「我哋暫時都係三百蚊嘅，有需要去到做手術嘅話就等專科嗰邊覆你幾錢」
佢：「咁呀…咁我睇定啲先」
佢抱住BB離開診所。
喺佢出門口前，我真心提佢：「太太你記住有咩都唔好自己做呀，要交俾醫生做呀」
BB，希望你唔駛受苦啦。
–
👉🏻即睇其他診所低能奇觀嘅文章
👉🏻《診所低能奇觀》 聞聞佢
https://hkofficedaily.com/?p=16664
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。