早兩日見咗一位男性求職者，言談間已經覺得佢有啲跳，講嘢好誇張，不過每個人有唔同嘅性格，如果求職者比較活潑我都唔介意嘅，而最搞笑係佢主動要話我知上一份工嘅辭職原因，當時我係冇問亦冇要求佢講。
「你唔問我對上份工點解會辭職嘅？」講真我做咗13年HR，其實甚少問candidate嘅辭職原因，走得就梗係有concern㗎啦，一係前途問題，一係人工問題，一係同事問題，來來去去嗰幾味，interview主要睇以後，唔係睇以前吖嘛！
我：「因為點解辭職唔係最重要，我嘅職責係睇下你適唔適合我哋公司而家呢個職位，你有特別原因？如果你想講可以講。」
「係呀，我想講下，因為我上一份工個老細死咗。」
我：「死咗？」
「Yes，返返下工心臟病發死咗，就咁伏喺張枱度，我哋成班同事發現嗰陣已經太遲。」
我：「咁恐怖？然後公司就冇埋？」
「唔係呀，公司仲喺度，不過你知呢啲嘢好邪㗎嘛，老細就坐我後面，點知會唔會陰魂不散㗎！」
我：「你就係因為咁所以辭職唔做？」
「梗係啦，心理上唔舒服，成日形住老細個鬼魂會喺後面望住我做嘢，不過我再對上一份工個老細直頭失蹤，到而家都好似生死未卜。」
心諗，咩料呀？跟親啲老細唔係死就係失蹤？
我：「點樣生死未卜呢？」你講完都係想我繼續問啫。
「我再對上一份工做珠寶㗎嘛，有次老細帶批石去墨西哥，然後喺油站畀班賊夾咗去，跟住就人間蒸發喇，公司都run唔到落去，成班同事排住隊辭職。」
呀……我究竟信唔信好呢？
我：「咁樣，你都算係嗰種職場黑腳喎，啲老細唔係死就失蹤……慘過執笠。」唔係寸佢，只係我都唔知比咩反應好喇！
「咁又唔係喎，呢兩份工之前仲有一份工，即係resume上面2016年嗰份呢，間公司仲喺度，而家愈做愈大添！」
我：「哦，咁都好啲，都唔算黑腳。」
「不過嗰份我之所以辭職，係因為個女上司喺會議室想強姦我。」
嗱嗱嗱！我就唔懷疑呢個世界有痴女嘅，我亦唔知佢口中嗰位女上司咩情況，但我眼前呢位求職者呢……戴個頭盔先，30幾歲，身高應該同曾志偉一樣（可能仲矮啲），髮型唔係M字額咁簡單，係W字額，肚腩好似懷孕咁，而個樣就……sorry，唔係想得罪人，有啲似林曉峰溝埋湯令山，我唔係想陷你個《辦公室日報》於不義，只係照直講啫，而林曉峰同埋湯令山仲要靚仔過我眼前呢位仁兄，咁你自己諗喇。
我：「強…姦？點姦法呢？」
「嗰個女上司捉咗我入會議室，講講下嘢就強吻我，仲一手抓住我下面，試圖想撳我落地，又係咁想除我條皮帶。」
頂你個肺吖，聽聽下我又幾想聽埋落去喎！
我：「跟住呢？」
「跟住我咪推開佢衝出會議室囉，唔係靚就大晒㗎，知唔知尊重兩個字點寫呀？」
哦，原來個女上司仲要係靚嘅痴女，明白了。
我：「有冇同老細講或者報警呢？呢啲係性騷擾喎！」我淨係想盡快結束個interview啫！
「報警冇用啦，呢啲嘢講出嚟都唔好意思，我自己辭職走咪算囉！」點樣樣㗎你？既然講出嚟都唔好意思，咁你又主動同我講？我都冇問過你辭職原因，你一連講晒三份工嘅辭職原因畀我聽，一係死，一係失蹤，一係強姦，一份誇張過一份，聽頭兩個已經差啲嚇暈，好在有第三個加返啲笑料中和下咋！
最後我使出咗HR嘅「大絕」，就係以下呢段對白：「我哋仲有幾個candidate會見，有消息通知你吖！但係如果一個星期內仲未收到通知，咁即係代表我哋已經揀咗第二個，今日好多謝你抽時間上嚟。」
其實我好驚呀，再喺會議室傾耐啲，出到去個版本會唔會變成我呢個HR想污辱佢㗎？間房仲要冇CCTV，我唔想聽日做新聞人物呀！
「好呀，我都多謝你叫我上嚟見工，可唔可以得閒打畀你傾計㗎？加你WhatsApp得唔得？」
我：「唔使喇，如果有消息我會用公司電話打畀你，我有啲嘢要做，唔送喇。」然後我頭也不回入返去做嘢，真又好假又好啦，就算單計interview嘅表現我都唔會揀呢位求職者，祝我未來幾日唔會惹上咩麻煩……我會重新審視下自己揀CV嘅眼光㗎喇！（完）
講到女上司同男下屬呢個話題，點可以唔重溫以下嘅經典呀？風扇喎！嘔喎！
聖誕party飲醉酒 去咗上司屋企抖
https://hkofficedaily.com/?p=20404
無意發現女上司秘密 合約員工疑不獲續約
https://hkofficedaily.com/?p=14950