公司出咗廣告請Pantry Assistant （茶水間助理），主要負責保持pantry清潔同埋收送下文件咁，目標係請一啲年紀比較大，又有相關經驗嘅姐姐（叔叔都得），可能係市道問題，第一日已經收到好多申請。
陸續約人上嚟見工之後，其中一個求職者真係令我大開眼界，個女人54歲，其實佢有做過類似嘅工作，本身好地地，雖然當時未見晒所有candidate所以未扑槌，但我相信呢個女人會進入考慮之列，點知佢最後搞啲咁嘅嘢……
個女人首先係遞個信封畀我，初時以為佢畀漏啲舊公司推薦信之類，所以我本能上都伸咗手去接，跟住個女人就同我講：「呢度$1,000小小心意，麻煩晒你呀真係。」
我：「咩$1,000？」
女人：「多謝你㗎！」
我：「多咩謝？」
女人：「你收咗佢啦，我真係好想入嚟做，唔該晒你，辛苦晒你！」
聽到之後都唔敢相信自己對耳，嗱嗱聲「隊」返個信封畀個女人，佢唔肯接，我就咁丟落張枱叫佢收返。
我：「你知唔知自己做緊咩？呢啲係賄賂喎！」
女人好似聽唔明咩叫賄賂，佢只係繼續講：「你收咗佢啦，如果唔夠呢，我之後每個月都可以畀$1,000你㗎！」
本來想鬧佢幾句，不過我最後決定唔喺呢個女人身上浪費太多時間，更加唔想佢再將個信封遞嚟遞去，所以就嗱嗱聲嗌個女人走，癲㗎咩！再咁樣兩個人喺間房糾纏落去，分分鐘惹埋官非都唔知咩事，而個女人見我唔肯收，臨走仲表現得好失望，佢唔係諗住咁樣見工真係會有HR肯收呀？
為咗避嫌，我立即將呢件事同阿姐講，當做向公司「備案」，因為我哋本身冇呢啲「備案機制」，點估到2023年嘅香港會有求職者去見工畀錢個HR呀？
阿姐同埋幾個同事聽完之後先係呆一呆，繼而就喺度講笑。
同事：「有冇鄉音㗎？係咪香港人嚟先！究竟佢之前去見其他工係咪又畀錢人呢？」
阿姐：「可能佢上一份工就係咁，要畀介紹費，又要每個月貢獻人工一部分先有得撈，你應該問清楚吖嘛！」
仲問咩清楚吖，個女人嘅行為踩界得嚟仲咁老土，容乜易最後關頭丟低$1,000個信封就走咗去㗎，到時佢再補多句：「靠晒你喇！」就直奔出office，咁我真係水洗都唔清，調返轉報警話我收咗錢冇請佢都唔出奇。
不過阿姐都講得有啲道理，個女人咁樣做，可能係之前試過，仲要work，亦有可能係對上一份工要將部分薪金貢獻畀上司或者介紹人之類，否則冇理由明目張膽咁樣賄賂，個女人嘅態度仲有種理所當然。
呢份Pantry Assistant嘅工作，我公司開出嚟嘅價位係$13,500至$16,000呢個範圍，坦白講唔算好多，亦唔算太刻薄，個女人都知道人工大約係呢個價，咁都仲肯封定$1,000「利是」，又話唔介意每個月「持續進貢」畀我，我都好想問佢一句：「究竟發生過甚麼事？」仲有，究竟係邊個教佢咁做㗎？
雖然我覺得呢個阿姐唔會係《辦公室日報》讀者，但都好想寄語佢，唔好再用呢啲旁門左道搵工喇！
我哋的確仲有幾個candidate會見，但呢個女人之前exactly係做Pantry Assistant，佢話喺舊公司仲會每日整茶點，坦白講正正經經interview已經足夠，搞埋啲利益輸送只係會弄巧反拙，玩下手隨時惹嚟不必要嘅麻煩，搵工啫，唔好搞到咁複雜啦！（完）
講開又講，睇咗我哋最新一集嘅YouTube未㗎？呢轉係《香港職場》喎！員工問老細借office影婚紗相同擺酒，話晒都聲音導航，唔睇都聽下啦😅
https://youtu.be/oGzgVWE18Dw
