記得你曾經有個故事係同事叫Christine，但一直以嚟就畀人叫咗Christy、Chris、Katie……我覺得演變成呢啲名都有個譜，我老細直頭係唔係都嗌錯，而且錯到九唔搭八，例如我叫Thomas，唔知咩事佢會叫我做阿Sam，咩料呀？
我哋老細大約60幾歲，所以大家初時都懷疑佢係咪有痴呆症之類，但經過同事們嘅研究，老細記中文名係完全冇問題，呢度有位新入職嘅女仔叫阿怡，老細次次都會叫到佢個名，就算係男同事都好，只要係中文名就一定叫得到。
另外，老細嘅數口同記性亦都好好，邊間公司欠佢錢一定記得、原材料呢幾年嘅價位變化又記得，連人哋幾年前張單大約係咩銀碼，甚至係有邊幾隻item number，老細都可以如數家珍咁講出嚟，真係唔似有老人痴呆。
不過一講到英文名佢就會亂晒籠，我有位同事叫Ivan，前前後後做咗7年㗎喇，都叫做資深啦，老細其實一路都嗌佢做Terry🤔🤔🤔大佬呀，Ivan叫咗Bryan或者Calvin仲情有可原，但Ivan同Terry差好遠喎，裡面連一個英文字母都唔中喎！
最好笑係Ivan嘅last day，老細路過pantry見佢派緊散水餅，然後就行埋嚟拍一拍Ivan膊頭：「畀心機呀Terry，第日有時間返嚟探下啲同事啦！」我哋成班人聽到都廢事出聲，因為嗌錯英文名已經係家常便飯，點知Ivan竟然想糾正老細。
Ivan：「其實我叫Ivan呀，哈哈！」咁大膽，應該係同last day有關🤣
老細都識得跟住笑：「哈哈，Ivan Ivan，叫錯你做Terry添，哈哈！」
㗰氣啦！嗰日放工Ivan搭正6點say goodbye走人，老細就6:30再行入pantry斟水，見到我嗰陣咪又係同我講：「嘩！Terry買咗咁多散水餅食唔晒呀？你哋拎返屋企啦，呢啲擺喺公司惹蟻呀，知唔知Terry去邊度做呀？」
係咪呢？Ivan轉頭已經變返Terry，咁我唯有答唔知啦，因為我都唔識邊個叫Terry🤦🏻♂️
除咗Ivan叫咗做Terry，老細仲將Zuki叫咗做阿May、Olivia叫咗做Catherine、Henry叫咗做阿John、Ricky叫咗做Andy……數唔晒，總之你叫英文名就一定嗌錯。
雖然老細會記得晒人哋公司同我哋落過幾多單同埋落啲咩貨，但如果個客係用英文名，唔係用陳生張生呢啲稱呼，老細都一樣會嗌錯㗎！有次個client上我哋公司，老細就兜口兜面嗌人做James……
「我叫Raymond呀，做咩成日叫我做James嘅？你係咪有個客又叫James呢？」
你估下老細點答……老細話：「唔好意思，我成日記錯，可能你個樣似James，你覺唔覺有啲人個樣係特別襯某啲英文名㗎？我覺得James呢個名襯你呀！」
係咪痴線㗎！覺得人哋個樣似James就嗌人做James呀？唔使問阿貴，Ivan個樣一定好似Terry啦！好心你咪亂柒咁幫人改英文名啦！
雖然我哋知道世界上並冇呢個學名，但同事們已經私下稱老細嘅情況做「英文名識別困難症」，有啲人係面盲症認唔到樣，而老細呢種係聽到英文名就會即時錯亂，我本身叫Thomas，老細一樣長期嗌錯我做阿Sam，後來我索性話自己中文名叫阿賢，結果老細就冇再嗌錯喇，直至而家都嗌得啱我做阿賢。
不過Ivan就搞笑啲，佢早兩日打嚟話去見工差啲畀老細累死。
Ivan：「條友癲㗎喎，嗰封reference letter開頭仲好地地，有我個名有埋身份證，點知最尾一段無端端變咗I am delighted to recommend Terry for the Sales Manager position at your company. I would be happy to provide more information about Terry……」🤣🤣🤣
Ivan打返嚟同HR講，要求再出過一封reference letter寄畀佢，HR表示老細見佢做咗7年，所以先會親手打下面嗰part，不過就打錯名，HR都唔好意思，因為睇漏最尾一段。
Ivan話自己都有疏忽，點會咁大意唔睇清楚就拎去interview，見工嗰陣對方問佢：「你唔係叫Ivan咩？點解呢度寫你叫Terry嘅？」
結果Ivan將老細有「英文名識別困難症」嘅事講出嚟，搞到in佢嗰個人都哈哈大笑，好在最後都有出offer。
點解有人喺記英文名方面會出現咁大障礙呢？不過我總算喺Ivan嘅遭遇裡面學到一啲嘢，就係公司出reference letter一定要對清楚，因為唔係個個都咁好彩，假設對方唔識笑仲要唔相信你，到時去interview就凍過水喇。（完）
關於office裡面嘅英文名故事，又點少得以下呢兩個吖🙈
同事英文名撞到七彩 4個Cherry 5個Alex
https://hkofficedaily.com/?p=17101
英文名太難讀冇人同我接觸
https://hkofficedaily.com/?p=20651