投稿讀者：李維士
我份工係contract，10月做到12月，主要係幫公司處理寄畀客嘅聖誕新年product sample，佢哋聲稱如果做得好，有機會轉長工。
同事會每日print張list畀我執貨、包裝，同埋寄貨，但係有時都會臨時臨急加幾件，某次pack緊貨準備拎去寄，我阿姐收到個WhatsApp：「等等，有個客啱啱先update我新公司地址，pack埋呢件吖，費事佢等咁耐，你照呢個地址入單，電話同名就冇變。」
就喺我拎住佢部電話跟住個地址入嘅時候，又有另一個WhatsApp send嚟，佢應該係冇熄到「顯示預覽」功能，所以我見到個message係來自Boss，內容唔知係得一句定係我只能夠睇到第一句：「好掛住你呀！」
下意識放低阿姐部電話，我阿姐亦好快走埋嚟拎返走。
本身冇擺喺心，但係過咗半個鐘左右，阿姐無啦啦走嚟同我講：「老細想send msg畀佢老婆，點知send錯咗畀我，勁搞笑。」
我：「哦，係呀。」
係咪當我傻㗎？更何況你入佢個名做Boss啫，唔代表係我哋個老細吖，可能係你上一任老細呢，又或者你有個friend英文名叫Boss都得㗎喎，你咁樣解釋，反而同我證實呢個好掛住你嘅Boss，真係我哋公司個Boss，同埋我做contract，同老細連一句說話都冇講過，你唔講真係唔知老細已婚。
不過，我知我阿姐已婚，因為佢枱面有老公同個仔張相。
其實老細同阿姐分別已婚，但又……我係冇興趣知，亦唔想理，最黑仔係有一晚放工，我撞到阿姐上老細架車，唉，點解要畀我見到呀！公司幢大廈嘅位置係，大家都會行正門，咁後門係咩人行呢？揸車返工嘅人，同埋我呢種－－－－－食煙嘅人，因為停車場穿出去有個煙竇，呢幢大廈返工嘅人都去嗰度食，我純粹想放工食支煙鬆一鬆先行去搭車啫！
最尷尬係阿姐臨上車前見到我，錯愕一秒，隨即向我打招呼，老細就第一次同我講嘢，較低車窗嗌出嚟：「順唔順路呀，我哋都住香港區，香港區啱唔啱？」
我算好鎮定亦好有禮貌咁答：「唔使喇，我住葵興。」就算我住香港區都唔敢上啦，阻人偷食要燒春袋㗎！
最後慘過燒春袋，因為合約到期嘅時候，阿姐同我講因為budget問題，暫時唔續約或轉長工，但希望將來可以再合作，ok嘅，本身都係contract，冇抱太大期望，不過後來我見到呢間公司又出廣告請人，同一個position，你估係咪因為我見到啲唔應該見到嘅嘢，所以後來冇得續約呢？