秘書似瘦版陳瀅 男友背景仲好勁

公司半年前嚟咗個秘書,真心靚,唔止男同事眼甘甘,連我哋成班女人都覺得佢靚,而且呢個秘書性格仲幾好,對任何人都好Nice,所以過咗冇耐我同佢已經好friend,最大原因係秘書坐我隔籬,久而久之變埋固定飯腳。

如果要形容秘書個樣,公司同事就話佢似瘦版陳瀅,都有幾多男同事走嚟撩佢講嘢㗎,不過實際追求就冇,頂盡都係借頭借路呃偈傾,可能office啲男同事比較怕醜啦!

窈窕淑女,君子好逑,秘書喺呢度做到第二個月嘅時候,終於有人忍唔住出手,初初我都唔知係邊個,因為追佢嗰個人淨係識得送花過嚟,平均一個星期收一札,有時就會搵順豐速遞寄禮物,照計係男朋友或者出面啲追求者啦,問秘書佢又唔講,結果就不了了之,見到啲花同禮物已經成為常態。

有次放工我哋一齊走,卒之畀我見到佢男友喇,架車停咗喺街口,佢男友好有禮貌咁同我say hi,然後秘書提議車埋我,咁就唔客氣喇!雖然我唔識車,不過一坐上去已經覺得好大好新好靚,沿路秘書keep住同我傾偈,佢男友嘅電話就響個不停,只見佢用hands-free同人講公事,好似有幾百萬大生意咁喎。

第二日傾緊去邊度食lunch嘅時候,秘書男友突然打嚟話要約佢食晏,咁我咪識做囉,點知秘書話唔好意思丟低我,叫我一齊食,佢男友亦唔介意,咁好啦🙈以為去返平時嗰幾間茶記普通食,原來秘書男友已經book咗附近一間酒店嘅中菜廳,溝女啫,使唔使咁大陣仗呀?

行去酒店嘅時候我同秘書講:「你男友真係好好,又接你,又陪你食lunch,又成日送花同禮物,好有情趣。」

秘書:「啲花同埋禮物唔係佢送㗎,好在你而家講咋,雖然男朋友都知,不過唔想佢再呷醋。」

合理嘅合理嘅,瘦版陳瀅又點會咁少人追吖。

去到酒店中菜廳,佢男友又嗌龍蝦又嗌鮑魚,另外叫人蒸咗條唔知咩斑,lunch咋喎,早兩日我阿媽生日嗰餐都冇咁豐富,不過難得有人請咪照食囉,佢男友話多謝我咁照顧秘書,又話上次冇正式介紹,連隨派埋卡片畀我,場面都幾搞笑。

食完飯返到公司我同秘書講:「你男友好似唔錯喎,事業有成,食個lunch都咁豪。」

秘書:「佢係咁浮誇㗎,唔使理佢,下次我哋同佢去平時嗰間茶記。」聽得出佢兩個感情好好,係sweet嘅。

呢排秘書男友多咗過嚟同佢食lunch,咁我都識做嘅,唔通一味黐餐咩!有一日我買咗外賣返office食,一打開個飯盒老細就行埋嚟:「食呢啲?飯盒冇益㗎!同我出去食啦!」

我:「但係買咗喇喎,唔食呀?」

老細:「請你食好嘢,擺低個飯盒啦!」

其實我呢間係普通中小企,所以老細都算親民,大家未致於好熟,但關係ok嘅,既然一個二個爭住請我呢個師奶食飯,咁咪卻之不恭囉!

點知落到樓,老細帶我去茶餐廳,呢樣都算喇,我同老細講:「呢間茶記……咪即係我頭先買飯盒嗰間囉……」

老細:「係咩?我以為你嗌街尾嗰間茶記咋。」

妖!我本身就食緊呢間茶記個飯盒,你話請我食飯,點知又係去返我買飯盒間茶記,咁你叫我落嚟食做乜呀!仲以為你會好似秘書男友咁請我去隔籬街間酒店食貴嘢。

結果我又係叫咗個A餐,然後打電話同茶水姐姐講有飯盒多咗,問佢食唔食,總算冇浪費食物,真係無啦啦搵嘢嚟搞。

老細連個餐都未到就露出狐狸尾巴,原來佢知我同秘書friend底,知我哋兩個幾乎日日一齊食lunch,今日見得返我一個就特登走嚟收料。

老細:「香港啲女仔真係好難追,我已經每個星期送花送禮物,佢都係唔肯同我出街,你估係咪身份問題呢?即係佢覺得我係老細所以要避忌。」

我:「原來啲花同禮物係你送㗎?」難怪秘書上次叫我唔好喺佢男友面前提啦,原來啲嘢係條蛋散老細送嘅,差啲死呀我上次!

老細:「係呀,我送㗎,但好似打動唔到佢,我都知靚女多人追㗎喇,你覺唔覺佢好似陳瀅?」

我:「全公司都咁講㗎喇,其實……一係你約佢食lunch囉,食lunch應該唔會推你嘅。」

老細:「食lunch又唔好,始終喺公司附近,費事同事見到多說話講啦,你就唔同,你係師奶一名,冇人會講我哋壞話。好坦白,interview嗰陣我已經覺得呢個女仔好靚,以為請咗返嚟可以近水樓台啦,點知都係咁難追。」

我:「慘,其他求職者真係慘,你根本見到陳瀅已經失晒理智,淨係打算請佢。」

老細:「係呀,咁真係靚吖嘛,話時話,你同佢咁熟,知唔知佢有冇男朋友?」

我梗係知佢有男朋友啦,不過唔可以私下爆秘書啲嘢畀人知,唔關追唔追求嘅事,正常你當個同事係朋友都唔會向老細爆料啦,篤灰要畀人燒春袋㗎!雖然我係女人冇春袋,但都唔會出賣秘書。

要比較的話,秘書男朋友外型好啲,起碼年紀冇相差咁遠,佢兩個都係30歲左右,而我老細就40頭,不過假假地都有間公司,陳瀅就好啦,有咁多選擇。講起呢個問題,我就開始八卦陳瀅男朋友嘅背景,因為秘書份人好低調,我決定拎佢男友張卡片search下,睇下佢間公司同埋份工係咩料。

唔search猶自可,一search真係不得了,陳瀅男朋友嗰間原來係投資公司,人哋都係老闆,因為我唔識呢啲嘢所以有眼不識泰山,再search多啲就更震撼,喂!富二代嚟㗎喎!財經雜誌同網站都有佢嘅訪問,有埋相唔會假,google好多佢嘅相,呢個就係上次放工車埋我,仲有請我食鮑魚嗰個男人,另外有篇訪問係喺佢屋企做,似足電視劇豪門咁嘅佈局,獨立屋有花園,唔怪得lunch食呢啲啦,咁平時秘書同佢晚飯又食咩㗎?

陳瀅好有口德,冇周圍同人講老細追佢,而我亦都好口密,冇同老細講陳瀅男朋友任何事,但係老細條煩膠始終死心不息,雖然送花疏咗,不過都維持一個月有一兩扎,又間唔中搵我呻,講得最多嘅一句就係:「香港女仔真係好難追,估唔到老細想追個秘書都咁艱辛。」

其實我好想同老細講,唔係艱辛咁簡單呀,係mission impossible!除非陳瀅男友唔要佢,咁都可能有一線曙光,不過我相信陳瀅都有自己嘅waiting list慢慢揀,至於收兵,我覺得陳瀅真係唔需要,佢男友太有錢喇,最近有單新聞仲係佢男友收購另一間公司,啲銀碼係億億聲,億億聲港紙呀,唔係精子呀!

頭先老細又同我講:「你覺得我係咪行錯咗第一步,最初應該唔好請佢,寧願私底下追佢,佢係咪覺得我同佢身份距離太遠呢?其實我冇階級觀念㗎喎!」

收啦!即係咁,陳瀅個男友買起你間公司都仲得呀!唔關老唔老細事,不如知難而退啦!以上係我心諗啫,冇講出嚟,費事hurt老細啦!

我反而問過秘書,佢男朋友咁有米,使咩打份牛工呀?陳瀅話覺得男女感情可以變得好快,而家只係拍拖階段,女人都係靠自己好啲喎,又啱嘅,靚女得嚟又謙卑,又識諗,如果我係仔都鍾意佢。

error: