搵咗工5個月終於都有著落，曾經灰到以為我喺呢個社會已無立足之地……女朋友為咗鼓勵我特登送咗隻杯，佢話想我日日飲水都記起佢，另外仲送咗個入咗我哋合照嘅相架，呢樣我真係冇擺出嚟，第一日返工無謂咁張揚啦，相架就放住喺櫃桶先！
其實第一日返工係幾愉快，同事又肯幫忙，Welcome lunch都好多嘢講，個阿頭又好似幾nice咁，點知去到放工嘅時候竟然有事發生。
搭正6點嗰陣，我已經聽到外面好嘈，但我坐得比較遠，真係唔知發生緊咩事，淨係聽到有同事講：「佢哋話係家榮嘅阿爸阿媽喎，搞咩大吵大鬧？」
同事雖然都唔知咩事，但我估佢有一樣嘢係知：「邊個係家榮？」
同事：「咪你上一手囉，不過佢走咗兩個月啦！」
唔係八卦，只係女朋友約咗我當晚食飯慶祝搵到新工，一早book晒枱，所以咁嘅環境我都要行出去。
一行出去我就見到震撼嘅場面，有個阿伯瞓咗喺地下，旁邊有張輪椅，另外有個阿婆就大字型攤喺公司門口。
我見到個畫面都好緊張，加上已經有幾個同事圍觀，我就隨便問句：「咩事？阿伯跌親呀？要唔要扶起佢先？」
因為我當時都唔知個阿伯係點樣跌出輪椅，但呢對相信係家榮嘅父母其實有少少似「碰瓷黨」嗰啲陣勢，即係攤喺馬路話你撞到佢嗰隻，何況咁多同事有男有女喺度都冇人出手，係咪驚走埋去扶佢哋要賠錢呀？
結果錢就係錢，但唔係賠錢，原來係兩個老人家控訴公司唔出糧畀佢個仔家榮。
阿婆喊住講：「你哋冇陰公呀！半年都唔出糧！我個仔要貼錢返工！今日你哋一定要交代清楚！」
其中一個男同事開聲：「你哋走啦！再唔走我報警㗎！」因為我第一日返工，我都唔知呢位出聲嘅男同事係乜水。
阿婆：「報警吖！你哋老細咁冇陰公，有汗出冇糧出，你唔報警我都報，你知唔知我個仔幾抑鬱呀？佢有咩事唯你事問，你報警呀！搵埋東張西望！你以為我個仔唔做，咁就唔使出返啲糧呀？」個阿伯一直都瞓喺度冇出聲，得個阿婆叫囂。
我太趕時間，又幫唔到手，加上唔知頭唔知路，既然約咗女朋友食飯趕時間，當時就唯有走先啦，費事一陣吳幸美上埋嚟，我第一日返工就要上鏡……其他同事見我孭晒背囊亦叫我快啲走，好似唔想我知道有咩內情咁，雖然成件事與我無關，但見到兩個老人家咁樣攤喺公司門口，其實內心都唔好受。
走嘅時候仲有相信係同一層其他公司嘅人圍觀，畢竟係放工時間，入到電梯嗰陣又有兩個人喺度講件事，內容大致係：「間公司都幾衰，搞到人哋父母嚟幫個仔追欠薪。」因為佢哋見住我喺公司行出嚟，唔知係咪特登畀說話我聽。
食飯嗰陣我同女朋友講返件事，大家都覺得嗰對老人家好可憐。
我：「第一日就見到呢啲，份工仲返唔返…」
女朋友：「不如搵過份啦，返工冇糧出仲慘過搵唔到工，你車錢都蝕埋，你都話有個男同事好唔友善咁叫兩個老人家走啦！」
我：「唔怪得阿婆話佢個仔貼錢返工啦，半年冇糧出都好傷喎，其他人點解仲要喺度做？」
女朋友：「有冇再check下你公司係咪呃人㗎？唔怪得上一手會走啦！佢哋請你都請得好急，上星期五見完，星期一就打嚟叫你星期二返工。」
傾咗成晚，我同女朋友嘅共識都係返唔過，搵過另一份新工好似比較安全啲。
我：「弊！你送畀我隻杯呀，仲喺公司枱面！」
女朋友：「算啦，下次買過隻畀你囉！」
我：「相架呢？有我哋幅相㗎，你點知佢哋拎咗會點用？」雖然個相架喺櫃桶，咁我唔做遲早都會清㗎嘛！
結果我決定第二日照返，起碼拎返隻杯同埋相架先，跟住再辭職囉！同埋就算返得一兩日工，公司都係要出糧畀我，即使佢哋衰到唔肯出，咁我都係蝕兩日啫，拎返個相架要緊。
不過劇情最反轉嘅係，第二日件事終於水落石出，因為成班同事已經一早討論緊，原來前一晚我走咗之後，嗰兩位老人家始終唔肯定，警察都上埋嚟，結果嗰位叫家榮嘅舊同事亦返咗嚟接走父母，仲猛咁同其他人講唔好意思。
後來我先知嗰個主張報警嘅男人係高層之一，而老細亦都好嬲，覺得呢件事損害到公司聲譽，可能真係驚有人call東張西望……最終家榮行埋一邊向佢哋承認係自己半年冇畀家用，但又驚畀父母話，所以就用公司拖糧做藉口，佢完全估唔到兩老會衝上嚟「追討欠薪」。
聽講老細嬲到痴晒線，我亦證實咗根本唔存在拖糧嘅情況，因為數數手指，我都返咗兩個半月，之前兩個月係好準時出糧，其實點會個個都唔拖淨係拖一個人吖！雖然家榮係講大話，但佢父母嘅反應的確好誇張，或者家榮為咗自保，將拖糧嘅虛構情節作到似層層啦，為人父母聽到個仔畀人蝦，又難免會動真火嘅，不過你要吹水就麻煩唔好畀兩個老人家知道公司地址吖嘛！
坦白講我要多謝女朋友送嘅小禮物，雖然佢一直主張唔好做，驚我會被欠薪，但我第二日仲返工就係想拎返啲私人物品，差啲畀呢條家榮累死，畀唔畀家用係你嘅個人決定，但唔好作到天花龍鳳吖，一陣兩個老人家跌親整傷真係手尾長！
以上雖然係「一場誤會」，不過都真係有公司拖數當老奉！
調解欠薪糾紛老闆指員工應付責任
https://hkofficedaily.com/?p=20393
Freelance收唔到錢「我們都得了大脖子病」
https://hkofficedaily.com/?p=4161