請咗個經常跳掣嘅員工 多愁善感日日緬懷過去

你個page成日都係員工投訴老細,我都想用老細身份講下員工。

我呢間係公司仔嚟㗎啫,計埋我得6個人,早排要請個designer,total見咗4個candidate,自己公司又唔係勁,人工又唔算特別高,無謂搞咁多嘢喇,嗱嗱聲請個人就ok。

我請咗個女仔叫Kate,其實佢唔係最突出嘅candidate,但佢係最慘嗰個,因為interview嘅過程當中,Kate話佢之前間公司執笠,生活有啲傍偟,老公亦受到疫情影響就快失業,咁我覺得呢個女仔都幾誠懇,亦似乎係咁多個candidate裡面最需要呢份工,咁我就決定請佢喇。

返工初期冇問題既,仲幾熱心,係多愁善感咗啲,經常同同事講點樣唔捨得舊公司,好掛住啲舊同事,同老公相處嘅喜怒哀樂都講晒出嚟,有幾個女仔都同Kate互add Facebook,佢哋話Kate一日出七八個post緬懷過去,睇睇下開始頂唔順就hide咗佢。

我覺得冇問題嘅,Kate只係感情豐富啫,又冇影響工作,唔需要理同事私底下post咩啦,只係由此可見佢係多愁善感。

由於我哋嘅工作有時唔太趕,我開頭就由得阿Kate自己去控制時間,佢仲好型咁講咗句:「老細你唔可以咁㗎,你唔畀deadline我,我會懶㗎。」

員工咁自律,夫復何求呢。

不過慢慢地,我發覺Kate交嘢愈嚟愈慢,甚至完全冇做,佢另外又接咗啲私人freelance,仲要喺公司高談闊論,咁都算啦,一早知阿Kate屋企情況,唔影響公司就無謂同佢計較。

後來佢有個design做到一半冇晒下文,咁我就同阿Kate講:「上次個design可唔可以20號畀我呀?」強調少少嘢先,呢個所謂「design」,係一幅poster,我叫佢20號畀我嗰陣,其實只係5號,而我5號同佢講呢句嗰陣,我係上個月20號已經order阿Kate做。

阿Kate突然好大聲咁同我講:「你唔好催我啦!最憎人催我!」

我好愕然,甚至有啲嬲,先唔計時間,你最初叫我畀deadline,話咁樣先唔會懶,我而家畀deadline,你忽然跳掣?

最初請佢返嚟覺得呢個女仔只係大情大性,大癲大肺,識耐咗先知道呢啲詞語太美化,用「跳掣」會適合啲。

一星期前阿Kate可以同同事攬頭攬頸,又叫同事去佢屋企玩,一星期之後,阿Kate每晚都會msg我投訴所有同事蝦佢,咁究竟點蝦呢?原來係冷氣開得大,佢想熄冷氣但其他同事唔肯,梗係唔肯啦,公司地方細,嚴格嚟講又冇窗(因為唔會開),唔開冷氣真係會焗Q死,我提議佢喺office著多件衫,或者調較一個暖少少嘅溫度,大家互相遷就,不過阿Kate仍然每晚msg我,搞到我晚晚要幫佢心理輔導。

阿Kate可能要兼顧freelance,佢喺公司嘅design愈嚟愈求其,連客都向我反映,但你知design呢啲嘢好主觀,咁我唯有畀下意見,而阿Kate都例牌跳掣,下下都大大聲發晒脾氣,有時唔講真係以為佢先係老細。

佢之前咪成日掛喺嘴邊話舊公司同舊同事點好點好嘅,無啦啦有幾日唔知做咩,返到office係咁鬧舊公司冇良心,鬧舊同事係八婆好有機心,然後再隔幾個星期,又話舊同事好好,又話出嚟食飯一齊想當年,好想同人做一世姐妹……總之好跳,觀點同心情都係大上大落。

後來阿Kate話出面份freelance想佢轉長工,又話出面freelance個老細係佢師父同偶像,好在我對呢個員工已經冇期望,否則你咁樣同現任老細講,我真係會有hard feeling,既然係咁,我梗係成人之美,畀阿Kate過檔幫佢個師父兼偶像啦!之前晚晚同佢做心理輔導,其實最需要接受輔導嘅人係我先啱。

走咗兩個月,阿Kate打返畀我,佢話freelance個老細好仆街,成日鬧佢,班同事又好冷漠,問我可唔可以返嚟做……

我:「請咗人啦,公司生意又差,都唔知過唔過到今年,如果之後有需要會第一時間搵你。」

我咁講ok嗎?都算好仁慈啦係咪?

好怕請到呢啲多愁善感又跳掣嘅員工,日日傷春悲秋緬懷舊事,鍾意就發脾氣,咁大個人仲好似要其他同事不停關心佢,做嘢已經好攰,希望我經一事長一智,第日唔好再請到呢類人。

投稿人: Jerald

🙋🏻‍♂️ 既然開咗個頭講老闆哀歌,咁不如重溫下呢段,好人開公司得兩種下場,一係上市,一係執笠https://hkofficedaily.com/?p=13896

error: