投稿讀者：Paco
唔知大家覺唔覺得，職場上如果做好人，無論你係打工定係老闆，其實都好難發圍，留意下啲搵到錢嘅公司同埋上位好快嘅高層，佢哋本身都有返咁上下仆街。
不過我老闆絕對唔仆街，佢亦係我咁多份工裡面，最有同理心同埋人情味嘅老闆。
我公司好細，得13個人，老闆唔鍾意員工OT，佢一直標榜要有自己嘅生活，之前幾波疫情都畀我哋home office，最近第四波殺到，佢又率先叫各同事work from home，反而有個已婚嘅男同事好唔情願，佢話wfh會畀老婆仔女煩住，寧願返公司做嘢，但係老闆唔畀，仲捉咗佢入房講夫妻相處之道同埋湊仔經，鼓勵嗰位男同事多啲同另一半溝通，唔好當公司係避難所。
有時無可避免要OT，呢個老闆亦永遠唔會自己走先，唔止留喺公司幫手，佢仲會order好多外賣返嚟，強調一定要請班伙計食晚飯先安樂，順帶一提，其實OT本來已經有補水，佢唔係想用幾盒餸同幾盒飯代替OT錢。
有一次，某同事因為屋企發生咗啲事，無計可施之下走咗去問老闆借糧，老闆話唔得，因為唔想搞亂公司盤數，但願意私人借出嚟，然後二話不說就開咗張支票。呢件事係由借糧嗰位同事親口同我哋講，佢話好感動，因為老闆甚至冇深究同埋追問佢屋企發生咩事，咁就開咗張五位數嘅支票。
我哋成班人當時仲講笑，叫呢位同事記得準時還錢，另外又講咗句：「呢啲咁好嘅老闆開公司得兩種下場，一係上市，一係執笠。」
第四波疫情爆發，老闆叫我哋work from home兩星期，一人送咗部notebook畀我哋，佢話方便大家工作，同埋呢部notebook係最後一樣送畀我哋嘅禮物，因為2020年受疫情影響，生意一落千丈，今年冇辦法出到bonus，覺得好對唔住班伙計，另外預告公司會喺農曆新年前結業，雖然知道各行各業市道都唔好，但仍然希望大家可以趁未來兩個月時間盡量搵工。
作為員工，我哋當然知道公司今年入不敷支，仲有一個致命傷係，老闆成日畀班客拖數，佢太好人喇，總係開方便門畀人，總係一次又一次畀寬限期啲人，對於佢嘅人品，我哋一致推崇，但同時認為佢真係唔適合做老闆，太善良嘅人喺商界同職場係好蝕底。雖然我咁講有啲好灰，不過無可否認，好人永遠都係畀啲仆街累死。
好唔捨得呢間公司、呢個老闆、呢班同事，但問心嗰句，今年生意咁慘淡，可以捱到農曆新年前先結業，已經比預期中撐得耐。估唔到當日我哋隨口講嗰句：「呢啲咁好嘅老闆開公司得兩種下場，一係上市，一係執笠。」竟然一語成讖。
人嘅性格冇得變，我都明白跟呢種老闆肯定冇發達，但如果佢將來東山再起，我仍然會毫不猶豫再跟佢搵食，希望仲有呢個機會啦！