今日係我入嚟呢間公司嘅一周年，估唔到team leader會記得，佢仲請我食lunch，其實喺度做嘢真係幾開心，可能同事年齡都比較接近，大家有好多共話題，不過我一年前差啲就想直接quit咗份工唔做。
當時返呢份工嗰陣，我上一手同事仲未走，公司為咗等我易啲pick up，特登預留一星期畀新舊同事交接，但嗰個星期真係好難捱，因為上一手同事根本唔肯教我任何嘢，而且對我嘅態度好差，我到而家仲記得條女叫Amanda。
「嗱，呢部係影印機。」
有邊個會認唔到一部影印機？但佢完全冇講print嘢要入staff number等細節，後來仲叫我去影印，好在有人見我戇居居企喺度唔識操作，主動行埋嚟教我。
「嗱，呢個X drive，呢個Y。」
我問過呢啲drive有咩分別？Amanda話冇分別，其實冇又點使分開唔同drive呀？不過我始終唔可以坐喺度等人餵，結果就自己研究，請假form喺邊，claim form喺邊，逐個逐個file睇囉，唔使下下等人教既。
新入行，咩都唔識，有啲嘢唔係齋睇就明，或多或少都要開口問，而每次問親Amanda，佢事無大小都會一句ban埋嚟：「唔知喎！唔好問啦！唔得閒教你。」作為新人，唔通返咗一兩日工就同人嘈交兼投訴咩，唯有忍下囉。
最嬲係佢對其他同事笑晒口好多嘢講，對住我就好似殺父仇人一樣。
Amanda仲試過大大聲講：「教過你啦！又唔記得！」特登畀其他同事聽到，但其實佢真係完全冇教過我，平時仲對我呼呼喝喝，坦白講當時好想辭職，反正都係一日通知。
不過我覺得其他同事又好似冇乜嘢，所以咬緊牙關死捱，卒之畀我捱咗一個禮拜，捱到 Amanda走，然後我再慢慢從頭學過，好彩其他同事之後都肯教我。
做耐咗，我都好老實同其他同事講返之前嘅事，佢哋話Amanda份人不嬲都係咁，所以當初扭屎忽花話要resign，team leader一句都冇留，仲祝佢前程錦繡。
原來Amanda辭職後兩星期，曾經向team leader講想留返低，不過公司嗰陣已經請咗我，如果留Amanda，咁樣對我好不負責任，因為我真係辭咗份工跳槽。
同事仲話，其實Amanda以前都係咁樣對其他人，只係我嚟到之後，Amanda對佢哋多咗笑容，好似特登想孤立我，特登想迫我走，其他同事一早有同感。
我唔知Amanda嘅性格係對任何人咁樣，定係一心想我走，然後自己留返低，甚或後悔resign，所以遷怒我呢位新嚟嘅同事，不過點都好，工作上真係唔應該咁樣畀hard time人，慶幸自己心理質素仲可以承受到，否則我同呢間公司隨時擦身而過。
投稿讀者：Sin Yee
🧐 曾經有段稿都提及過上手同事黑口黑面，不過呢單就係有內情，同Amanda嘅情況完全唔同
https://hkofficedaily.com/?p=12699