見工遇著狗公 飽受電話滋擾

想講下自己嘅見工經歷,早排去interview,好似冇乜特別啦,隔咗一日,個男HR打返畀我,老實講我真係以為有offer,點知佢講咗5分鐘都未入正題,內容係~~~「你今日返工有冇畀人蝦呀?」、「頭先lunch食咗咩?」、「而家間公司係咪好多男同事追你?」

愈聽愈唔對路,我亦唔客氣直接問:「唔好意思,請問你打嚟係咪搵我second in?定係有其他資料要我補充?」

個男HR又真係夠膽死答我:「唔係,我哋請咗人喇,不過我想同你keep contact。」

What???

佢係完全唔要面,我搵工㗎咋,唔係要搵老公呀!就算你請我都係咁話啦,仲要講到明已經請咗人,不過要同我keep contact,我係咪應該感動呀?

呢個HR每隔幾日就打嚟,但我一次都冇聽,跟住佢就Whatsapp我,叫我唔好誤會,又話自己冇惡意。

過程中我並冇拖泥帶水,已經直接打msg回覆,叫佢唔好再搵我,因為咁樣係騷擾緊我私人生活,咁大個人啦,唔好做啲幼稚行為好冇!

可能係我block咗佢WhatsApp嘅緣故,早兩個禮拜,佢夜晚8點幾直接打電話嚟,一開口就話自己飲醉酒,叫我而家出嚟飲嘢,仲話可以叫老細請我,聽到嗰下真係勁嬲,入咗去做肯定永無寧日,我對份工冇興趣,對佢個人更加冇興趣。

因為太嬲,我答咗句:「關我咩事?你唔好再打畀我!」然後就cut線。

嗰陣我食緊飯,全家人坐晒喺度,老豆老母即刻問我發生咩事,我將成件事同佢哋講,兩老同埋細佬仲嬲過我,而個HR竟然繼續扮醉打嚟,佢三個都爭住聽,最後細佬爭贏,接咗個電話就一輪咀狂爆粗,我老豆又喺後面嗌咗句:「聽日就打去你公司投訴。」結果個HR嚇到收咗線。

本身我老豆堅持打去投訴㗎,但觀察咗一個星期,我又真係冇再收到任何msg同電話,所以就冇再跟進。

最後我想講,如果有啲女仔見完工之後被滋擾,唔好驚自己Resume填晒information而唔敢鬧對方,因為你仍然可以打去佢公司投訴,嗰個係佢搵食嘅地方,佢一定驚過你,所以唔使啞忍同埋客氣。

投稿讀者:Sofia

編按:喂,兩個故事有啲相似,會唔會係大家都in埋同一間公司,遇到同一個男HR🙈

HR用WhatsApp示愛狂追求職者
https://hkofficedaily.com/?p=14219


error: