我記得你個page講過一單介紹朋友入公司做，結果搞到反目嘅故事，而我就有一單親身經歷，我唔算係介紹朋友，但都搞到好唔愉快。
呢件事兩年前㗎喇，無啦啦提起係因為最近受夠。
我間公司都算有啲名，有個friend阿Leung一直都話羨慕，有次佢喺求職網站見到我公司出招聘廣告，仲要係我個department，所以就直接打嚟叫我介紹。
當時已經明確表示自己冇特權，始終公司唔係細，我一個小職員唔可以左右大局，但係阿Leung話唔介意，只求有得in，我咪叫佢循正路send CV嚟囉，我最盡係同manager講一句：「有個朋友叫Kelvin Leung話send咗CV嚟，你啱先見啦，我申報定，唔知你鍾唔鍾意請一啲本身同下屬係朋友嘅人。」
首先我有盡到一個朋友嘅責任，等於highlight咗一個叫Kelvin Leung嘅人，其次係我唔想真係請咗之後，Manager先知道我同佢係認識，所以就當係利益申報。
我唔知Manager真係覺得佢份CV唔錯，定係點都要應酬下我個friend，結果阿Leung收到call嚟見工，我事前完全收唔到風，反而係阿Leung之後話我知過兩日上嚟interview，咁我就叫佢加油啦！
阿Leung問我interview有咩要注意，同埋有冇咩流程，我將自己當年嘅經驗同佢講晒，呢幾年有冇咩改變就唔知喇，總之就傾囊相授。
Interview完咗，阿Leung返去等消息，佢有叫我問Manager會唔會請，但我講咗唔想因為朋友關係而影響公司決定，咁樣對其他應徵者唔公平，所以就拒絕阿Leung嘅要求，佢當時已經有啲怪責我。
等下等下就過咗一個星期，Manager話已經揀到心水candidate，不過唔係阿Leung，我私底下同返佢講：「喂，公司請咗人喇，後日返工，冇揀到你，你唔好再等呢份工喇。」
阿Leung聽完梗係唔開心啦，呢樣係人之常情嚟嘅，但佢竟然遷怒於我，又嬲Manager唔揀佢，話好想知道原因喎。
坦白講，我都想知點解，反正已經塵埃落定，咁就幫阿Leung問下啦，當係幫佢改進下interview技巧都好吖。
Manager好好人，開心見誠同我講阿Leung嘅問題：
1）英文唔好，真係連好基本嘅應對都有問題。
2）問非所答，問佢上一份工點解resign，佢話因為辭咗職……(Manager話聽到O晒嘴）
3）狂插舊公司，講到之前每一間公司都對佢唔住，個個都想害佢。
4）填form連First Name同Last Name都搞錯。（Manager算好厚道，話佢可能太緊張冇睇清楚，不過就幾大意。）
5）瘋狂un腳，基本上阿Leung係「震」住咁interview，一路in一路un。
Manager建議我同返阿Leung講，因為有助佢之後去其他公司interview可以改善，將來會準備得好啲，咁我本身個出發點都係想咁，結果如實相告阿Leung，點知條友覺得以上5個問題根本唔係問題，佢話英文好唔好見仁見智，佢只係答得簡潔啲，話英文唔係佢母語。
問非所答嗰part，佢話：「咁我真係辭職吖嘛，辭職咪唔做囉！」
狂插舊公司嗰part，佢話：「咁之前啲公司真係仆街吖嘛，唔通唔講呀？」
至於First Name Last Name佢話係一時錯手，仲話我Manager捉呢啲位好多餘，un腳方面就冇回應。
呢兩年阿Leung周圍同啲朋友講我同埋我公司壞話，明明之前覺得我呢度好正，interview衰咗之後就講到一文不值，話我唔幫手落嘴頭，唔想有friend入嚟做，仲話我跟一個咁嘅Manager冇前途，話呢個Manager太小心眼太小器，唔識得請人，唔知用咩做標準。
其實佢私底下向我發洩係冇問題嘅，重點係佢周圍同人講到咁偏頗，搞到個個朋友都問我有冇咁嘅事，有啲一嚟已經同我講：「聽講你Manager好衰㗎喎！」聽講？聽邊個講？報紙講呀？
最近我、阿Leung，同埋另外兩個朋友出嚟食飯，其中一個人講起轉工，阿Leung又搵到位舊事重提：「你都好快啲轉工啦，你間公司咁垃圾，點解會做咁耐㗎？冇前途㗎喎！如果換轉係我，寧願冇工返都唔會再繼續做，嘥時間！」
可能積積埋埋忍得太耐，今次我真係著咗，直接同阿Leung講：「其實你都未入過嚟做，憑咩話我公司好垃圾呢？你連入嚟嘅門檻都未達到，你點樣知道冇前途？係咪interview衰咗就一定要唱人哋公司呢？我Manager已經好厚道，當年叫我提點你interview有咩可以改善，我唔係要幫自己公司講好說話，但唔可以我哋唔請你，你就一味係咁講到我哋有問題㗎喎！」
阿Leung呆一呆，以為佢會反省下，點知佢咁講：「使唔使咁認真呀？唔係咁小器呀？得啦得啦，知你係港豬，幫公司護航。」
我真係覺得呢條友冇得救，不過仲有其他兩個朋友喺度，我唔想搞到氣氛咁尷尬，好在當時已經埋緊單，大家say個bye就走得。
好多人同我講，我唔應該介紹個friend嚟interview，但我真係冇介紹，只係叫佢自己send CV，何況當時冇同Manager單聲，最後冇叫阿Leung嚟見工，呢條友一樣會埋怨我，所以我係好被動。退一步睇，我反而覺得阿Leung好可憐，佢一味將問題歸咎於別人，從來唔會正視同檢討，人生大部分時間用嚟抱怨，某程度上佢已經得到應有嘅懲罰。
投稿讀者：Noah
👇重溫兩個關於介紹朋友入自己公司做嘅故事：
介紹朋友入公司做 最後連朋友都冇得做
https://hkofficedaily.com/?p=14263
朋友介紹工作講條件 每月人工要貢獻二千
https://hkofficedaily.com/?p=13411