之前喺上環見咗份工，in我嘅係一位男HR，最初傾談過程一切正常，但我唔知係佢style鍾意目不轉睛望住人講嘢定係點，我發現呢位男HR完全冇望過份CV咁滯，而且佢係托住個下巴望我同埋interview，總之成個感覺好奇怪同尷尬。
去到尾聲，佢問我有冇咩想問，當時我已經對呢個人有啲抗拒，求其答暫時冇嘢想問，然後呢位男HR好輕佻咁講：「但我仲想知你多啲嘢喎！」
最初冇諗太多，以為係問工作上嘅嘢，所以我就叫佢隨便問，佢嘅態度依然輕佻：「嗱，你叫我問㗎咋，平時鍾意做咩呀？夜晚會唔會去飲下嘢？」
我淨係吓咗一聲，佢跟住話：「冇嘢嘅，因為有時會OT，睇下你係咪好多活動，會唔會阻你平時去飲嘢食飯咁啫。」
我已經盡量得體地回答，話OT都冇辦法，工作行先，私人活動會自己安排時間。不過呢個男HR仲未完：「我仲有一個問題，你有冇男朋友？」
呢次真心忍唔住，當時我覺得無論佢咩意圖都好，呢啲都係我私人事，所以我答：「如果同工作冇關嘅私事我唔想答。」
佢應該feel到我唔耐煩，笑笑口話隨意問下，有消息即刻通知我，因為有機會再做2nd in。
坦白講呢個男HR應該有40幾歲，我得25歲咋，你咁樣同我interview法，我完全唔覺得nice或者風趣，我只會覺得你猥瑣咋阿叔！
打算有2nd in我都唔會再嚟㗎喇，雖然搵工好難，但我唔想同呢啲人做同事，點知即晚已經收到佢WhatsApp，最開頭我唔知係邊個，因為佢唔係我個friend，我冇入名，佢WhatsApp又冇相，然後佢自己話係今日見工嗰位HR，有冇搞錯呀！Add我私人WhatsApp！真係極度唔專業。
佢一嚟就用2nd in做藉口，話WhatsApp聯絡求職者方便啲，又叫我唔好介意，不過我亦都閂晒閘，話自己對份工冇興趣，所以唔會去2nd in，當晚佢叫我再考慮清楚，話人工可以傾，但我冇再覆佢喇。
隔咗一日，呢個猥瑣男HR又WhatsApp我，係下晝5點幾嘅時間，佢問我做緊咩，問我今晚出唔出嚟，我當時先醒起唔記得block佢，但諗到佢有我CV，地址電話咩資料都齊，所以我盡希望用和平方式打發佢走，已經講明唔想出去，亦唔想再2nd in，希望佢唔好再WhatsApp我，不過條友好似當冇件事，再隔多日又喺夜晚11點幾send msg嚟，呢次佢竟然直接話想我做佢女朋友，叫我畀次機會佢。
成件事我覺得好嘔心同打晒冷震，因為我去見工，去做一件咁正經嘅事，點估到會撞著一個咁痴線嘅人，我以前interview通常係見女HR，比較少見到男HR，今次真係第一次有咁嘅事發生。另外，我都係普通女仔一個，有艷遇我會開心，但一定唔係同阿叔囉唔該！
本身想用和平方式解決，但最後真係冇辦法，我又唔想齋封鎖佢WhatsApp，真心驚呢啲阿叔會去屋企樓下等我，因為我唔熟佢，唔知佢會有幾變態，所以決定用一個方式趕走佢，就係話如果再收到佢WhatsApp，我會搵佢老細講。
呢條變態佬竟然錄個voice msg過嚟：「哈哈，你係咪咁呀？我知你唔會咁對我嘅，你咁溫柔。」
我打返字覆佢：「唔係講笑，再騷擾我就同你老細投訴。」
佢覆：「你都未見過我老細，又唔識佢，你又唔肯嚟2nd in，我好想你做我同事呀！」
我冇再覆任何msg，因為本小姐已經有準備，我一早上LinkedIn搵到呢間公司其他人嘅資料，只要撳一個掣，copy and paste一堆字，佢公司所有同事就會知。
我將佢老細同埋幾個manager級同事嘅LinkedIn profile打開，screen cap截圖，喺WhatsApp send過去畀呢個猥瑣HR睇（我意思係想表達：再不停騷擾，我就會喺LinkedIn聯絡你所有同事，特別係老細同埋幾個manager）。
個猥瑣HR見到啲LinkedIn截圖之後，send返個msg畀我：「Sorry Sorry…🙏🏻我唔會再搵你了…🙏🏻🙏🏻」
雖然呢位HR冇講咩咸濕嘢，亦冇喺interview過程中同我有任何身體接觸，但我真係冇expect去見工會換嚟呢種騷擾，希望永遠唔會再遇到呢啲人，我想搵份工啫，唔好搞咁多嘢啦！