想記念一下自己啱啱升咗做Sales Manager，喺呢間公司工作亦踏入第12個年頭，點解可以做咁耐都唔走？老實講，梗係為咗份糧啦，你估係真愛咩！但其實12年前剛入職嗰陣，我做到第二個月已經遞咗辭職信。
12年前我係半途出家轉做Sales，之前幾份工都係做普通文職，學歷唔高，人工都唔高，我唔係大學畢業，當時想賺多啲錢咪試下做Sales囉，諗住多勞多得吖嘛！但其實做Sales都要講天份，仲記得我頭兩個月嘅業績係— 0，真係一張單都開唔到。
嗰陣時除咗開唔到單已經好挫敗，另外仲會畀同事單單打打。因為我冇生意，所以其他方面盡量做到足，例如準時返工呢啲基本嘢，估唔到咁樣都有問題，有個Sales同事喺我影印時走埋嚟扮整文件，然後喺我隔籬細細聲講咗句：「你咁準時返工做咩啫，返7點都係多餘啦！你都開唔到單，咁鍾意準時返工去做文員吖嘛，做咩行街啫！」
唔係話佢講得冇道理，但呢個同事當時嘅面口係極衰，所以我先會到今時今日仲記得，仲要大家都係男人，使唔使好似啲女人宮心計劇情咁呀？
其他Sales同事都唔同我講嘢，佢哋食lunch係聯群結黨出去，從來都唔會叫埋我，而家諗返仲係唔明點解要孤立我，公司又唔係行公佣。
其實一個人食lunch冇咩大不了，我好enjoy添，只係當自己team成班傾食乜永遠唔預你，傾閒計永遠唔侵埋你，去食飯又永遠都唔叫埋你，嗰種感受係幾難頂。
當然，除咗所有嘢唔count埋我，佢哋亦都唔會教我任何嘢啦，我喺office就好似透明人間咁囉！
眼見就過試用期，其實我唔辭職，照計都會畀人炒，長痛不如短痛，我主動入房搵Manager遞信，點知佢唔收，叫我再堅持下，12年前嘅事，當中嘅對話細節已經唔記得晒，淨係記得都傾咗半個鐘，最後我唯有將同事杯葛我嘅冷暴力講埋出嚟，唔係想篤灰，只係如實反映，想令Manager知道我點解做唔落去。
事隔多年，得呢句說話我係記得，Manager叫我畀多兩個月時間自己，佢話：「唔好理人哋點講，當時見工我揀咗你就一定有原因，我信我嘅眼光。」
當Manager講完呢番說話之後，佢就畀咗幾個客戶嘅電話我，叫我逐個打去，嗰陣係夏天三十幾度，熱嘅程度係你行出街唔使郁，齋企定定都會出汗，Manager本身係唔使出去跑，但佢竟然逐個逐個陪我去見。
有時佢會同個客聲明會一路傾一路錄音，之後得返我同佢兩個嘅時候，Manager就會播返啲錄音同我慢慢分析，一路教我第日遇到相同嘅情況要點樣同客傾，坦白講，當時我嘅感覺好似係上緊補習班，仲要由個master教我。
嗰段日子之後，我應承自己要畀心機做，就算係走，最低限度都要開到張單先走，做唔掂而辭職，同埋做得掂都決定辭職，係兩件好唔同嘅事，而且老土都要講句，我的確係對個Manager心存感激，佢咁畀心機教我，我都唔想丟佢架，希望盡力回報知遇之恩。
破蛋嘅日子比我想像中快，Manager陪我出去見客唔夠一個月，我終於開到第一張單喇，銀碼係細啲，但總算起咗步，我諗自己除咗技巧增強咗之外，信心亦都大咗好多，然後第二張、第三張、第四張，仲有更多嘅生意就接踵而來。
我記得過咗大半年之後，有一個月我嘅底薪連佣金出成7萬幾咁多，或者好多人賺7萬幾蚊可以不費吹灰之力，但係對我呢個唔係大學畢業嘅人嚟講，呢筆收入真係好可觀，當然唔係個個月都咁好數啦，至少我喺呢度叫做搵到食，而唔係呃飯食吖！
Sales呢行流動性好大，12年過後，嗰陣排斥我嘅同事都轉晒人喇，同事都換咗幾批，我亦由一個junior變成senior，再由senior變成AM，上年Manager退休，公司本來想請人空降，但最終決定內部提升，啱啱升咗我做Manager。
雖然之前個Manager退咗休，不過我仲會每個月搵佢飲一次茶，而就算我未升之前只係AM，呢段時間亦會好比心機教新人，因為我仲記得自己係點樣一步一步走出嚟。最後有個小小嘅結論，職場上梗有人想你走或者想你死，但其實唔需要理人哋點講，我哋應該將focus放喺睇好自己嘅人身上，唔好辜負嗰啲真心對你好嘅人，係咪太positive？做咗12年Sales佬係咁上下啦！
講起好上司，有冇新讀者未睇過《Nikita》呢個連載？
《Nikita》1 一個人由幾時開始決定唔再善良
https://hkofficedaily.com/?p=16561
《Nikita》2 綿羊嘅善良被視為軟弱 獅子嘅善良先會被歌頌
https://hkofficedaily.com/?p=16577
《Nikita》3 要學識唔好對住任何人都善良
https://hkofficedaily.com/?p=16593