《Nikita》2 綿羊嘅善良被視為軟弱 獅子嘅善良先會被歌頌

大姐話Nikita以前喺公司有個花名---「順得人」,唔係因為佢喺順德出世,而係佢成日開綠燈,同事叫佢做乜都冇問題,好抵得諗。

Sales話張單好急,叫Nikita抽調其他客嘅貨,ok冇問題;Sales話個期太後,要搵工廠特別安排OT,日以繼夜趕掂佢,ok冇問題;Sales話個客MOQ都未到但想要discount,叫Nikita砌掂張invoice,因為要氹得個客開開心心,ok冇問題。

久而久之,換嚟嘅結果就係,10次當中有1次抽調唔到其他客嘅貨,就係Nikita唔幫手;工廠OT咗10次,第11次唔肯OT,就係Nikita冇盡力同廠爭取;一次又一次未到MOQ都要discount,老細見到詐型,Nikita揸返緊,Sales覺得Nikita係衰人。

客嗰方面,未找到數但想出貨先,ok講個信字;生產完先至要改單,ok拍硬檔幫手諗掂佢;有額外要求想加嘢,但唔想加錢,ok得啦,最緊要大家開心,keep到關係。

又久而久之,答應咗Nikita會找數嘅客超過一年都未找,我哋跟單其實要負責追埋數,再追唔掂就丟去畀會計部跟,結果換嚟會計阿姐鬧,Nikita自己打去追,除咗畀個客敷衍之外,仲試過被惡言相向,同當初苦苦哀求要數期嘅態度係兩回事;嗰啲幫手改過單同埋加嘢嘅order,原來唔係一次半次,班客見Nikita好相與,次次都有特別要求,上次明明係格外開恩幫忙,之後就會話Nikita:「搞錯呀,之前都得啦!今次又唔得。」

其實啲麻煩嘢全部係Sales搞返嚟,有時要生意就乜都答應個客,不過肯蝕底嘅Nikita反而受晒,會計怨佢都唔會怨Sales。至於客就唔使講啦,話之你開咗99次綠燈,只要有一次紅燈,佢哋就覺得你係衰人。

大姐:「其實好人同衰人嘅定義,喺職場上真係好飄浮,對好多人嚟講,你唔幫手一次,你就係衰人,唔理你之前幫過佢幾多次,社會上識得感恩嘅人只係佔好少數。」

綿羊嘅善良被視為軟弱
獅子嘅善良先會被歌頌

靜靜地同你講吖,大姐就係嗰隻獅子,佢平時咩都唔理,一到關鍵時刻或者有爭拗先出手,個個都當佢係救世主,其實作為下屬就最清楚,佢「救世」之前,都係一直睇緊啲人點死,冷眼旁觀啲Sales急到瀨尿,有咩唔得就撻老細個朵出嚟,出手嗰陣就自己鋪晒紅地氈。咁大姐係咪衰人?我只可以話大姐唔會害人,但你亦唔使旨意喺佢身上拎到任何著數,佢好識得保護自己,做到呢個位始終有佢嘅能耐。

Nikita以前就係嗰隻綿羊,太善良,喺別人眼中,佢嘅善良已經一早被視為理所當然,所以say一次no就會畀人埋怨,唔幫一次手就會被視作衰人,Nikita辛辛苦苦做幾多嘢都好,喺好多人心目中都係冇地位,唔及大姐鐵石心腸但偶爾做一次好人。

我無意貶低大姐,純粹係一個對比同埋形容。

大姐:「當年Nikita成日做到喊,喊完之後佢就嬲,嬲完之後自己都放唔低,佢有同我講過想睇心理醫生咁滯,雖然係半講笑形式,我亦唔覺得佢心理有問題,但Nikita的確係做得抑鬱,佢唔明白個遊戲係點玩法,成日覺得你對人好,人哋就理所當然要對返你好,如果職場係 1 + 1 =2 咁簡單,人心就唔會咁複雜啦,出嚟做嘢,個個都係講自己嘅利益,你搵到真心友係你幸運,但唔係必然。」

其實Nikita嘅蛻變都成功咗一半,平時我覺得佢好衰,西口西面,但係而家幫咗我一嘢,唔知點解令我心存感激,但另一邊廂我亦飾演緊舊版嘅Nikita,Sales怨緊我點解畀Nikita聽嗰個電話,然後激嬲咗個客。

我:「嬲?」

Sales:「梗係嬲啦,期又趕唔到,又要畀你哋鬧,我哋搵客返嚟畀你哋跟單鬧走晒。」

我:「先唔講冇可能趕到個期,佢未找數喎!」

Sales:「佢而家話要投訴呀!」個Sales完全無視我講嘅重點---未找數,佢只係一直講緊個客點樣不滿,一直講緊個客要得到嘅嘢,一直focus佢自己同個客嘅利益。

呢個時候,大姐笑住行埋嚟講:「佢有其他嘢幫我跟緊,噚日Nikita最後同個客講過電話,畀Nikita幫你follow吖,你張單銀碼好大?」根本大姐就知呢張係細單。


Sales:「吓,Nikita跟?張單……都唔係好大,畀啲細嘅follow就ok啦……」佢口中個「細」即係我呢啲junior小角色。

Nikita喺個位答咗句:「我跟。」佢真係答多一粒字都冇🤣 你估下呢張單最後點?

(未完待續)

==========
《Nikita》第一集喺呢度可以睇得返

https://hkofficedaily.com/?p=16561


error: