為咗搵工而整啲假學歷，甚至係老吹工作經驗就聽得多，但係為咗返一份工而夾硬唔報自己讀過大學，唔報自己做過Manager，連last salary都報細數，我就真係第一次聽，而呢件事係發生喺我朋友身上。
話說我朋友叫Elaine，佢之前喺一間保健產品公司做Manager，Elaine自言Manager只係個title，加上嗰間公司曾經出現「逃亡潮」，蜀中無大將所以先咁快升咗佢，坦白講佢份人太謙啫，識咗Elaine咁耐，我知佢做嘢好搏，而且個腦轉得好快，仲要係大學生。
Elaine英文都好好，因為佢老公係鬼佬，但正正因為結咗婚，Elaine心態上突然轉變咗好多，佢希望以家庭行先，唔想再咁搏，更加厭倦咗晚晚OT嘅生活，佢話跟得鬼佬老公多，終於學識咗work life balance喎！
頭先講過，Elaine舊公司出現過「逃亡潮」，空穴來風肯定有因啦，你可以想像佢前老闆真係好難服侍，以前Elaine未結婚，為份糧會百忍成金，但後來佢唔想再咁喇，寧願賺少啲都想生活過得開心同埋冇壓力，結果做咗2年幾之後辭咗職，仲有半年係冇做嘢休息，佢話之前太chur，身心都好攰喎！
我冇Elaine咁叻，學歷唔夠佢好，英文唔夠佢好，鬥心……從來都冇，不過我有啲運仔，搵到一份好輕鬆嘅工，其實我都唔知點樣定義呢份工，title係叫admin，但其實工作內容只係幫一班地產sales印文件同做啲back up，主力係做嗰啲展銷會。
呢份工你可以話係勁廢，不過喺我嘅角度就勁筍，話就話朝九晚六，其實每日工作嘅時間加加埋埋應該冇一個鐘，坐喺一個得5個人嘅細office，5個女仔每日返工就係圍埋睇Netflix，傾計，仲有嗌外賣，嗌外賣仲有津貼，問你死未？
以前Elaine徹頭徹尾係一個事業型女性，佢聽到我份工咁hea都講過好羨慕，但你唔會覺得佢想做，點知有次食飯時我提到：「有個女仔辭職呀，佢話移民喎，老細問我哋有冇朋友介紹，你哋有冇friend搵嘢做呀？」
Elaine：「喂，我做呀！老老實實，有冇$13,000？」
我：「$13,000？我$19,000喎，一入嚟都有$17,000啦！以前咪同你講過囉，你唔記得咩？」
Elaine：「咁高人工？你又話份工冇嘢做嘅？介紹介紹！」
我：「咪玩啦，我記得你之前份工連埋佣有成$40,000，大雞唔食細米。」
Elaine：「生意好先有$40,000啫，佢底薪$32,000咋！」
我：「咁咪係囉，淨計老底都已經係我份糧嘅兩倍啦！」
Elaine：「今時唔同往日，你知唔知我逗嗰份糧嘅背後有血有淚㗎，晚晚OT最低消費8點先走得，半夜12點仲收到老細WhatsApp講公事，星期六日佢忽起條根又搵我，個老細唔係咁痴線，公司之前就唔會有人集體遞信啦，所以如果冇咁大壓力，仲可以日日煲劇，唔好話$19,000，我$13,000都制呀！」
我：「你制冇用㗎，我老細唔制呢！」
Elaine有所不知，我老細請人有一套獨特嘅諗法，可能佢都知呢個position嘅職務太廢，咁嘅工作量都要請5條女坐喺度，純粹係公司錢多又要有派頭，你知地產嘢㗎啦，輸人唔輸陣㗎嘛，何況賣樓仲要係暴利，我哋份糧對公司嚟講好濕碎。
不過咁，老細就係知道呢份工唔需要咩技能，所以佢十分抗拒請高學歷人士，之前有另一個女仔就係大學畢業，然後做咗幾個月唔做，老細話大學生心頭高，又要講理想，請呢啲人返嚟會做唔長喎！寧願要啲中五或者IVE畢業嘅人。
除咗學歷，Elaine想入嚟我公司做仲有兩個障礙，第一係佢之前個title，第二係佢之前份人工，如果我老細知道佢last salary有成三萬幾四萬，職位仲要係Manager，其實真係見都唔使見，望到Elaine份CV已經丟埋一邊。
Elaine：「哦，你老細驚人學歷高人工高，會做唔長，Easy啦，虛報高學歷同埋作大份糧就話難啫，我降低自己學歷同埋唔報上一份工咪得囉！」
個衰妹竟然諗到唔將大學學歷同埋上一份工啲資料擺落CV，其實我覺得都算係虛報嘅一種……
如果要講道德倫理，我幫佢隱瞞當然係錯，但作為朋友，我真係介紹咗Elaine去見工，本來有一個相當大嘅漏洞－－－你唔填讀過大學，咁你嗰幾年冇做嘢去咗邊呀？你唔填上一份工，咁你返嗰份保健產品公司嘅兩年幾又做緊咩呀？加埋佢後來半年待業，唔通有3年空窗期呀？
Elaine嘅做法就係，將大學嗰幾年做part time嘅經驗填上去，話自己一直搵唔到full time，以part time維生，而3年冇工作嘅空窗期，佢就話幫家人打理一間好細嘅精品店，但精品店已經執咗……咁都得？
因為係我介紹，所以老細in完Elaine之後就搵咗我傾兩句，最好笑係老細話：「你個friend好似一路都不務正業咁嘅，佢幫屋企人打理精品店得$6,000人工，咁都夠用咩？」
$6,000？Elaine個衰妹之前賺緊三皮幾呀！作到得返$6,000，我都服咗佢。
我：「可能佢份人冇咩嗜好啦，佢都唔係好大洗。」
最估唔到老細十分滿意，然後講咗句：「咁啱啦，呢度穩穩定定，萬零蚊佢應該做得好開心，佢又好似冇乜鬥心，唔會做做下又唔做，你叫佢聽日返工啦！」
唔係呃你，呢個世界真係有啲老細唔鍾意請有鬥心同埋有學歷嘅人，淨係想個員工安安份份唔好搞咁多嘢，唔想見到你做做下又走，跟住再不斷重複請人，結果，Elaine就做咗我同事喇，啱啱我哋幾條女先喺office煲緊Netflix套《盲婚試愛》，我只係喺度諗，報細學歷，報細last salary，仲有唔報上一份工，會唔會都係虛報嘅一種啫，不過Elaine而家又真係做得好開心，一個女人結咗婚嘅心態轉變真係好大。（完）
唔同老細有唔同要求，而且幾怪都有，以下兩個舊post就可見一二。
老闆娘專請怪同事 公司等同怪獸樂園
https://hkofficedaily.com/?p=15843
見工同我傾佛偈履歷一眼都冇睇
https://hkofficedaily.com/?p=20706